လ္ဂုၚ်၊ ဂျူလာၚ် (၁၇)
ဟိုတ်နူတၚ်ပိုၚ်ကၞာတ်ဒစးဒုၚ် ကံၚ်ဇြဳပၞာန် ပိတၚ်ဂှ်တုဲ ပရေၚ်ဆဵုဂဗသဳကၠဳ သွက်ဂွံဒှ်ကၠုၚ် ဟွံမွဲပုဟ်ဂှ် ညးသ္ၚဳဂၠိပ်ပရေၚ်ဍုၚ်ကွာန် ကဵု သၟာပရေၚ်ဍုၚ်ကွာန်ဝှ်ကြံၚ်တံ သ္ၚဳဂၠိပ်လဝ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ဂှ် မိက်သ္ဂောံကဵု ပေါဲသဳကၠဳဆဵုဂဗ ပရေၚ်ဍုၚ်ကွာန် က္တဵုဒှ်မ္ဂး ညံၚ်ဂွိုအ်ပလီုပလာ်၊ ထ္ပက်အဇာ အလဵုအသဳ ကေုာံ သွက်ဂွံစၟတ်သမ္တီ သၞောဝ်သ္ဇိုၚ်ဒက်ပ္တန် ၂၀၀၈ နဒဒှ်မူသ္ဇိုၚ်ဂှ်ကီု တၚ်ပိုၚ်ကၞာတ်ဒစးဒုၚ် (၃) တၚ်ဂှ် ထ္မံက်ထ္ၜးဟီုဂးလဝ် အဃောမဆဵုဂဗလဝ်ကဵု ညးစၞးတၟေၚ်အာဇြဳယာန်ဂှ်ရ။
တုဲကၠုၚ် နူကဵုဂိတုဂျောန် (၃၀) စဵုကဵု ဂိတုဂျူလာၚ် (၃) တေံဂှ် ညးစၞးတၟေၚ်အာဇြဳယာန် ပရက်သုတ်ဃောန် မကၠုၚ်စိုပ်လဝ် ကၟိန်ဍုၚ်ဗၟာ နဒဒှ်လၟေၚ်တရဴညး အလန်ဒုတိယဂှ်ဝွံ သီုကဵုဂလာန်ကံၚ်ဇြဳပၞာန် မဟီုဂးလဝ်တံ မပါလုပ် စပ်ကဵုလၟေၚ်တရဴညးတုဲ လလောၚ်ပ္တိတ်လဝ် ပ္ဍဲဂိတုဂျူလာၚ် (၆) ဂှ်ရ။
တၚ်ပိုၚ်ကၞာတ်ကံၚ်ဇြဳပၞာန်တံဝွံ ဒှ်ဒၟံၚ်သၟဝ်သၞောဝ်သ္ဇိုၚ်ဒက်ပ္တန် ၂၀၀၈ တုဲ ဟိုတ်နူဒစဵုဒစးဒၟံၚ်ကဵု မူ အလဵုအသဳညဳသၟဟ်ဂကူ NUG ဂှ်ရ သွက်ဂွံပ္ညဳပ္ညပ်သဳကၠဳဂှ် ဒှ်ဟွံမာန်ပုဟ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူသီထောံအဝဵုတုဲ ၂၀၀၈ ဂှ်လီုအာယျ၊ စၞး ၂၀၀၈ ဂှ် ဖေဝ်ဒရာချာတာ ၁၊ ၂ ဂးတုဲ တိတ်ကၠုၚ်ဣရ၊ တန်တဴကဵု လ္တူဏံတုဲ ဗီုပြၚ်အုပ်ဓုပ်ကောပ်ကာဲအခိၚ်အကြာ ကဵု သၞောဝ်သ္ဇိုၚ်ဒက်ပ္တန်တၟိ သွက်ဂွံတိတ်ဟီုမ္ဂး လ္ပာ်ဏံဂှ် ဍေံတံ (NUG) ဂ္စါန်ဒၟံၚ် ကဵုကောန်ဍုၚ်အရၚ်တံရ၊ အေဂှ်တှ်ေ နကဵုမူမ္ဂး ဒစဵုဒစးအာတုဲဂှ် ပိုယ်တံ ဟီုဂွံ၊ ဟိုတ်နူဒစဵုဒစးဒၟံၚ် သာ်ဏံဂှ်ရ အခိၚ်လၟုဟ် နူကဵုအကာဲအရာ ဟွံတၟေၚ်တၞဟ်ခြာညးသ္ကအ်ဂှ် အရာမပ္ညဳပ္ညပ်သဳကၠဳဟီုဂှ် ဗီုလဵုမှ ဒှ်ကၠုၚ်မာန် ဟွံသေၚ်ပုဟ်” ဂှ် ညးသ္ဂးရ။
သၟာပရေၚ်ဍုၚ်ကွာန်ဝှ်ကြံၚ်မွဲတၠ ဥူဖေတာန်ဂှ်တှ်ေ နကဵုကံၚ်ဇြဳပၞာန်ဂှ် ဟွံဗလးကဵု က္ဍိုပ်သ္ကိုပ်ကၟိန်ဍုၚ် မရပ်စပ်ထိၚ်ဒက်လဝ်တံ မပါလုပ် သီုကဵုက္ဍိုပ်သ္ကိုပ် NLD တံဂှ်မွဲသာ် ပရေၚ်ဆဵုဂဗသဳကၠဳ ဒှ်ဟွံမာန်ပုဟ်ဂှ် သ္ၚဳဂၠိပ်လဝ်ရ။
“ပ္ဍဲအကာဲအရာသာ်ဏံဂှ် သွက်ဂွံသဳကၠဳဟီုမ္ဂး ကိစ္စ လ္ပာ်ဍေံတံ (စကစ) မကၠောန်လဝ်တံဂှ် ဟွံဖအောန်ဖျေံမွဲသာ် ပွမအာတ်မိက် လ္ပာ်ဇကုသၟး မုမိက်ဂွံဂွံဏောၚ်၊ ဗီုလဵုဒးကၠောန်ကဵုဏောၚ်၊ ဗီုလဵုမ္ဂး ဟွံဒှ်ပုဟ် သာ်ဏံတံဂှ်ဝွံ အရာမထေက်ကဵုကၠောန်တံဂှ် ဟွံကၠောန်မွဲသာ် စဵုဒၞါဒၟံၚ် လ္ပာ်ဇကု အဓိကရဂှ် အဲညာတ်၊ ဒံၚ်တုဲ ဒှ်သဘဴဖျေံဒၟံၚ်အစဳဇန်ရောၚ်ဂှ် ညာတ်ကေတ်ရ” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန် ထ္ၜးဟိုတ် စရၚ်မာဲတုဲ မသီလဝ်အဝဵုဂှ်ဝွံ ကၠောန်ၜိုတ် တၚ်စၞောန်ပျးကာတၟေၚ်တုဲမ္ဂး ကၠုၚ်စိုပ် သၞာံ ၂၀၂၃ ဏံ ကၠောန်ဗဒှ် ပေါဲရုဲမာဲ ဗၠးၜးဗဗွဲဓဝ်တုဲ ကလေၚ်လှဲပြံၚ်ကဵုအဝဵု ကုဗော်မဂွံဇၞးဂှ်ရောၚ် သာ်ဝွံ လလောၚ်တြးလဝ်ရ။
မွဲလ္ပာ်ဂှ်ပၠန် အလုံမွဲကၟိန်ဍုၚ် အကြာဒပ်ကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ်လ္ၚဵုတံ မပါလုပ် ဂကောံဒပ်စဵုဒၞါညးဍုၚ်ကွာန်တံဂှ် ပေါဲဗ္တိုက်တံ ဆက်သ္ကာတ်မြဟ်ဒၟံၚ်ရ။
ပ္ဍဲကဵုအကာဲအရာပရေၚ်ဍုၚ်ကွာန်လၟုဟ်ဂှ် နကဵုကံၚ်ဇြဳပၞာန် ဒးဒေါအ်ကဵုပရေၚ်ပကီုပရာပ်တံတုဲ ကုညးရပ်ဒက်လဝ်တံဂှ် ကလေၚ်ဗလးကဵုမှဟေၚ် ပရေၚ်ပ္ညဳပ္ညပ်သဳကၠဳ ဒှ်မာန်ရောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ် ထ္မံက်ထ္ၜးလဝ်ရ။
“ပေါဲသဳကၠဳပရေၚ်ဍုၚ်ကွာန်မွဲမွဲ ဂွံဒှ်ကၠုၚ်ဂှ် တၚ်အာတ်မိက်အဓိကဂှ်တှ်ေ ပြဝပကီုပရာပ် ဓဇန်ကြမ်ကြ အလဵုအသဳကံၚ်ဇြဳပၞာန်တံဂှ် ဒးဒေါအ်ကဵုရောၚ်၊ တုဲပၠန် ကုက္ဍိုပ်သ္ကိုပ် NLD ဂွံဒုၚ်ရုဲစှ်ပ္တိုန်လဝ် မရပ်ဒက်ထိၚ်ဒဝ်လဝ်တံဂှ် ဒးကလေၚ်ဗလးကဵုရောၚ်၊ (၂) တၚ်ဏံ ပါမှဟေၚ် ပရေၚ်ပ္ညဳပ္ညပ်သဳကၠဳ ဟီုဂှ် ဒှ်ဏောၚ်” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တၚ်နၚ်တံဏံဂှ် လ္ပာ်ကံၚ်ဇြဳပၞာန် ဟွံဖ္ဍိုက်ဗပေၚ်ကဵုမွဲသာ် ပြဝမကၠောန်ၜိုတ်ကၠုၚ် သွက်ညးဂၠးတံ သ္ဂောံသ္ပကၠုၚ်စၟတ်သမ္တီတံဂှ်ဝွံ ဒှ်သဘဴကၟာတ်ထောံတြၚ် ကုပရေၚ်သဳကၠဳပ္ညဳပ္ညပ်ဓဝ်ရဂှ် ဥူတာန်သဵုနာၚ် သ္ပလဝ်တၚ်စၟတ် ဟီုဂးလဝ်ရ။
သွက်ဂွံသောၚ်ကလး အကြေပ်ဂြတ်ပရေၚ်ဍုၚ်ကွာန်ကၟိန်ဍုၚ်ဗၟာဂှ် ဍုၚ်ကြုက်လေဝ် ကဵုကၠုၚ်ဇြဟတ်ဂရိုဟ် ကုကံၚ်ဇြဳပၞာန်တံ နွံကၠုၚ်တုဲ အာဇြဳယာန်ဝွံလေဝ် သွက်ဂွံထ္မံက်ရုပ်ရဴ တၚ်တုပ်စိုတ် (၅) တၚ်ဂှ် ပွမအာတ်မိက်တံ နွံဒၟံၚ်ရ။
ပ္ဍဲကဵုတၚ်တုပ်စိုတ် က္ဍိုပ်သ္ကိုပ်က္ဆံၚ်လ္တူ အာဇြဳယာန်တံဂှ် သွက်ဂွံကလေၚ်ဗလးကဵု က္ဍိုပ်သ္ကိုပ်ကၟိန်ဍုၚ်ဂမၠိုၚ် ကေုာံ ကောန်ထံၚ်ပရေၚ်ဍုၚ်ကွာန်တံဂှ်ကီု၊ သွက်ဂွံဒေါအ်ကဵု ပွမသောၚ်ကလး နနဲပကီုပရာပ်တံဂှ်ကီု၊ သွက်ဂွံဆဵုဂဗသဳကၠဳကဵု ဂကောံမဆေၚ်စပ်တံအိုဿီုတံဂှ်ကီု၊ သွက်ဂွံကဵုအရီုဗၚ် ပရေၚ်ဗ္စာရဏာမၞိဟ်တံကီု ဒှ်တမ် တၚ်နၚ်တံဏံ ပါလုပ်ရ။
ဆ္ဂး အခိၚ်လၟုဟ်ဂှ် တၚ်တုပ်စိုတ် (၅) တၚ်ဏံဂှ် လ္ပာ်ကံၚ်ဇြဳပၞာန် နတဲစှ်ေစှ်ေ ပွမထ္မံက်ရုပ်ရဴကၠောန်ၜိုတ်ဒၟံၚ်ဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)