မတ်မလီု၊ ဂျူလာၚ် (၁၇)
ကံၚ်ဇြဳပၞာန်သီအဝဵုဂှ် ဟိုတ်နူထိၚ်ဒက်ကၠုၚ် သြန်ဒဝ်ဠာ အပ္ဍဲကၟိန်ဍုၚ် အဆက်က်ဂှ်ရ အကာဲအရာပရေၚ်ပိုန်ဒြပ်ကၟိန်ဍုၚ် သာပရေံကၠုၚ်မာန်ရောၚ်ဂှ် တၠပညာပရေၚ်ပိုန်ဒြပ်တံ ပါ်ပါဲလဝ်ရ။
ကံၚ်ဇြဳပၞာန်ဝွံ နကဵုညးမမံၚ်စံၚ်အပ္ဍဲကၟိန်ဍုၚ်တံ သြန်ဂၠေံ မကေတ်လဝ် နူကဵုဍုၚ်သ္အာၚ်တံဂှ် သီုအိက် သီုတမ် သွက်ဂွံကလေၚ်လေဲကဵုဂှ် ဒဒှ်ရ ကဵုလဇလဝ်ဂှ်ကီု၊ ကုမ္ပဏဳကၟိန်ဍုၚ်ဗၟာ ယှေဝ်ယှာကောန်ဍုၚ်သ္အာၚ် (၃၅) တၟံကၠံ မပါလုပ်လဝ်တံဂှ်လေဝ် နူကဵုသြန်ဍုၚ်သ္အာၚ် သွက်ဂွံလှာဲသြန်ဒ္ကေဝ်ဗၟာအိုတ်ဂှ် စၞောန်ပ္ညုၚ်ကၠုၚ် အပ္ဍဲဂိတုဂျူလာၚ် သတ္တာဟဒုတိယဂှ်ရ။
ကံၚ်ဇြဳပၞာန် ဟိုတ်နူကၠောန်ၜိုတ်ထိၚ်ဒက်ကၠုၚ်သြန်ဒဝ်ဠာတုဲ ပရေၚ်ဓလိုက်တမ်ရိုဟ် ဍုၚ်သ္အာၚ်တံ တိတ်စ္ဍးအာမာန်တုဲ အကာဲအရာပရေၚ်ပိုန်ဒြပ်ကၟိန်ဍုၚ် သာတုဲပရေံစှ်ေကၠုၚ်မာန်ရောၚ်ဂှ် တၠပညာပရေၚ်ပိုန်ဒြပ်မွဲတၠ ဟီုရ။
“ဒဝ်ဠာဟီုဂှ် ဆၜိုတ်သြန်လှုဲ မွဲဂကူဓဝ် သၟးဟွံက၊ သွက်ကၟိန်ဍုၚ်ဗၟာမ္ဂး ဗၞိက်သွံမွဲဂကူလေဝ် ဒှ်ရ၊ ဒှ်ဗၞိက်သွံမွဲဂကူဟီုမ္ဂး ၚုဟ်မးဍေံဝွံ တန်တဴကဵုလ္တူဇြဟတ်သွံရာန်တုဲ ပြံၚ်သၠာဲကၠုၚ်ဏောၚ်၊ ဣဏံဂှ် ထိၚ်ဒက်ဒၟံၚ်ဟီုဂှ် ဟွံစှ်ေကဵုသဘာဝပုဟ်၊ အံၚ်လေဝ် အံၚ်ဇၞးဟွံမာန်ပုဟ်၊ သွက်ပရေၚ်ဓလိုက်တမ်ရိုဟ်ဍုၚ်သ္အာၚ်တံ ထပ်တုဲဂွံလုပ်ကၠုၚ်ဂှ် သာတုဲ ဝါတ်ဂါတ်အာဏောၚ်၊ ပရေၚ်ဓလိုက်တမ်ရိုဟ် မသှ်ေဒၟံၚ်လၟုဟ်တံလေဝ် အခေါၚ်ခိုဟ်အခါခိုဟ်မ္ဂး ဍေံတံ တိတ်အာအိုတ်ရဏောၚ်” သာ်ဝွံ သ္ဂးရ။
တုဲပၠန် လက်ထက်အလဵုအသဳဥူနေဝေန် ကၠာတေံလေဝ် သွက်ဂွံထိၚ်ဒက် ဒဝ်ဠာမာန်ဂှ် စွံလဝ် နှေန်ဂစိုတ် ကဵုသြန်ဒ္ကေဝ်ဗၟာတုဲ သၠာဲကၠုၚ်ကီုလေဝ် ဟွံဂွံလဝ် ပရေၚ်အံၚ်ဇၞးတုဲ ကမၠောန်ပရေၚ်ပိုန်ဒြပ်တံလေဝ် သာဓက ဒှ်ကၠုၚ်လဝ် ကလိုက်ကၟဵု နွံဒၟံၚ်ဂှ်ရ သွက်ဂွံစွံသတိ နွံပၟိက်ရောၚ်ဂှ် ညးသ္ဂးရ။
တၠကမၠောန်ပရေၚ်ပိုန်ဒြပ်မွဲတၠဂှ် ကံၚ်ဇြဳပၞာန်ထိၚ်ဒက်ကၠုၚ် သြန်ဒဝ်ဠာတုဲ ကမၠောန်ဗွဲမဂၠိုၚ် သွက်ဂွံဂေတ်ဂြိပ်ဂှ် လဇုဲလဇကၠုၚ်တုဲ သာတုဲဒးဆေၚ်ကၠုၚ်မုက်ကဵု အကြေပ်ဂြတ်အိုတ်ရဂှ် ဟီုရ။
“ဗီုလၟုဟ်ဂှ်တှ်ေ သီုဖအိုတ် ကၠောန်ၜိုတ်စ ကြေပ်အာအိုတ်ရ၊ ကြေပ်ဂြတ်ကၠုၚ်အိုတ်ဂှ်ရ လဇုဲလဇကၠုၚ်တုဲ ပရေၚ်ဂေတ်ဂြိပ်တံလေဝ် အိၚ်ကၠုၚ်ရ၊ မွဲပၠန်ဂှ် လက္ကရဴမ္ဂး အရာလ္ၚဵုတံဂှ် အောန်ကြဳစှ်ေကၠုၚ်ဏောၚ်၊ စၞးဂှ် ဂှ် ပိုယ်တံ ထိၚ်ဒက်လဝ်ဟီုမ္ဂး အခိၚ်ကာလမဂၠိၚ်ဂှ်တှ်ေ ဟွံခိုဟ်ပုဟ်ဂှ် ညာတ်ကေတ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ အပ္ဍဲကၟိန်ဍုၚ် သြန်ဒဝ်ဠာသှ်ေအောန်ကၠုၚ်ဂှ်ရ စကာနဲကဲစုၚ်ဇဳတုဲ သွက်ဂွံထိၚ်ဒက်ဂှ် ဂ္စါန်ကၠုၚ်ဣရ။
တုဲပၠန် ဟိုတ်နူတၚ်နွံပၟိက် ကုသြန်ဍုၚ်သ္အာၚ်တံတုဲ ကမၠောန်ဗၞိက်ပလံၚ်ပ္တိုန်တံဂှ် ကၞာတ်သမ္တီၚုဟ်မး ကဵုဒဝ်ဠာတုဲ ကဵုသၠာဲဂတးဒၟံၚ်ဂှ်ကီု၊ သြန်ဂွံ နူသၠာဲဂတးဗၞိက်တံဂှ်လေဝ် ထ္ၜးသြန်မအပ်လဝ် ပ္ဍဲတိုက်သြန်မာန်မှ ကဵုအခေါၚ်သၠာဲဂတးမွဲဝါပၠန်ဂှ် စၞောန်ပ္ညုၚ်လဝ်ရ။
တၠပညာပရေၚ်ပိုန်ဒြပ်တံဂှ် ဒဒှ်မထိၚ်ဒက်သြန်ဒဝ်ဠာဂှ်ဝွံ ဟိုတ်နူပရေၚ်ပိုန်ဒြပ်ကၟိန်ဍုၚ် သာတုဲ ဆုတ်ယုတ်ကၠုၚ်မာန်ဂှ်ရ စွံသတိဗွဲတၟေၚ်တုဲ သွက်ဂွံရေၚ်တၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
တိုက်သြန်ဂၠးတိ(ကမ္ဘာ့ဘဏ်) ဂှ်တှ်ေ အပ္ဍဲသၞာံ ၂၀၂၂ ဒပ်ပၞာန်သီလဝ်အဝဵုဂှ် ဟိုတ်နူအရာဟွံချိုတ်ပၠိုတ်တံ ဂၠိုၚ်ဒၟံၚ်ဂှ်ရ ပရေၚ်ပိုန်ဒြပ်ကၟိန်ဍုၚ်ဗၟာဂှ် ပွမချိၚ်ခယျတော်ဆလဝ်တံ ဟွံမွဲမွဲသာ် လၞုက်သ္ကုတ်ထောံလဝ်ရ။
ပရိုၚ်−သြၚ်လောန်တိုၚ်(မ်)