မတ်မလီု၊ ဂျာန္နဝါရဳ(၁)
တွဵုရးဍုၚ်မန် ပ္ဍဲဍုၚ်မတ်မလီုဂှ် ညးကဵု Like ၊ ချူ Comment ကေုာံ ကလေၚ် Share ပါ်ပရအ် ပ္ဍဲကဵုမုက်လိက်ဇာနှိက်ပရေၚ်မၞိဟ် ညးကၠောန်ပရေၚ်ပၠန်ဂတးဂှ် ကောန်ဒပ်ကံၚ်ဇြဳပၞာန်ဂမၠိုၚ် ရပ်ဒၟံၚ်အဆက်က်တုဲ ကၠောန်သ္ပဒၟံၚ် ပရေၚ်စောဲဂဗုတ်ရဂှ် ညးစုက်လုက်ကဵု ရုၚ်သၞောဝ်ဓဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂကောံဒပ်ကံၚ်ဇြဳပၞာန်ဂမၠိုၚ် မၚ်ရံၚ်ကျောဝ်ဒၟံၚ် မုက်လိက်ဇာနှိက် ညးကၠောန်ပရေၚ်ပၠန်ဂတးတအ် အဆက်ဟွံပိုတ်သ္ကုတ်တုဲ သုၚ်စောဲယၟုအကံက် ကေုာံဗီုဓာတ်ဇေတ်တ်တုဲမ္ဂး ကဵုဒး Like တၚ်ညးတအ်ချူတြးဓဝ်ဂှ် ကၠောန်ကၠုၚ်ပရေၚ်ရပ်စပ်ရ။
ပွမကဵု Like ပ္ဍဲ Post ညးကၠောန်ပရေၚ်ပၠန်ဂတး ပြာကတ်ဒၟံၚ်တအ်ဂှ်ကီု၊ ပွမချူ Comment ကီု ယဝ်ကၠောန်သ္ပဒးမ္ဂး ပ္ဍဲပွိုၚ်မွဲသတ္တာ ကၠုၚ်ရပ်ကော်ဏာတုဲ ကၠောန်သ္ပကၠုၚ် ပွမစောဲကၠုၚ်ဂဗုတ် နကဵုၝောံပိုဒ် ၅၀၅ အဆက်ဟွံပိုတ်သ္ကုတ်ရဂှ် ညးစုက်လုက်ကဵု ရုၚ်သၞောဝ်ဓဝ်မွဲတၠ ဟီုသ္ဂးလဝ်ရ။
အတိုၚ်ညးစုက်လုက်တအ်ဟီုလဝ်မ္ဂး ပွမကဵု Like ပ္ဍဲဇာနှိက်ပရေၚ်မၞိဟ် ညးကၠောန်ပရေၚ်ပၠန်ဂတးကီု၊ ချူ Comment ကေုာံ ညးကလေၚ်ပါ်ပရအ်တအ်ဂှ် ဒးဒုၚ်မၚ်ရံၚ်ဒၟံၚ် အဆက်ဟွံပိုတ်သ္ကုတ်တုဲ ပွိုၚ်မွဲသတ္တာဟမ္ဂး ရပ်ကေတ်ဏာဒၟံၚ် မၞိဟ်ဟွံအောနူကဵု ၁၀ တၠရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် ပွမချူ Comment ပ္ဍဲသၟဝ်မုက်လိက်ဇာနှိက်ပရေၚ်မၞိဟ် NUG၊ CRPH၊ PDF တအ်ကီု၊ ပွမ Share ပါ်ပရအ်ကီုဂှ်လေဝ် ကၠောန်ဒၟံၚ်ပရေၚ်ရပ်စပ်တုဲ ပ္ဍဲသၟဝ်ပရိုၚ် ဌာန်ပရိုၚ်ကံၚ်ဇြဳပၞာန် ကၟာတ်လဒဵုလဝ်အခေါၚ်ပ္တိတ်တြး ဟွံဗဗွဲဓဝ်ဂှ် ညးချူ Comment တအ်ဂှ်လေဝ် ကေတ်ဒၟံၚ်အရေဝ်ရ။
အခိၚ်လၟုဟ်ဏံမ္ဂး ညးဍုၚ်ကွာန်ကံၚ်ဇြဳပၞာန်ရပ်စပ်လဝ် ဟွံဗဗွဲကဵုဓဝ်ဂှ် ကၠောန်သ္ပဒၟံၚ် ပရေၚ်ကေတ်အရေဝ် သ္အာၚ်နူၝောံပိုဒ် ၅၀၅-က တုဲ ညးဍုၚ်ကွာန်လ္ၚဵုတအ်ဂှ် သ္အာၚ်နူ သၞောဝ်ဥပဒေပရေၚ်ဗ္တိုက်သရိုဟ် ပွပ္ကီုပရာပ် ၝောံပိုဒ် ၅၂ (က)၊ ရာဇသာတ်ဇၞော် ၝောံပိုဒ် ၁၂၄-က၊ သၞောဝ်ဥပဒေပရေၚ်ဆက်စၠောံ အဳလေတ်ထရောန်နေတ် ၝောံပိုဒ် ၃၃ (က)တုဲ နကဵုသၞောဝ်ဥပဒေနွံတန်တဴဒၟံတအ်ဂှ်လေဝ် ကၠောန်သ္ပကေတ်ကၠုၚ်ဒၟံၚ်အရေဝ်ရဂှ် ဂွံတီကေတ်ရ။
ပ္ဍဲမွဲလပါ်ပၠန်ဂှ် ဠဝ်ဗဳဒပ်ပၞာန်တအ်လေဝ် ဓမံက်ထ္ၜးလဝ်ဗီုဓာတ်၊ ဒၞာဲဒၟံၚ် သီုကဵုကမၠောန်ကၟိတ် ညးချူပါ်ပါဲဒၟံၚ် ကံၚ်ဇြဳပၞာန်ဒှ်တမ် ဓမံက်ထ္ၜးဒၟံၚ်တုဲ သွက်ဂွံရပ်ကေတ်ဂွံဂှ် ပရေၚ်ဗတိုက်ဖ္အောဝ်နွံဒၟံၚ်ဂှ်ရ ညးသၟဝ်တဲကံၚ်ဇြဳပၞာန်ဂမၠိုၚ် သ္ပသ္ဇိုၚ်ကဵုတၚ်တအ်ဂှ်တုဲ ဗက်ဂၠိုက်ဂၠာဲရပ်စပ်ဒၟံၚ်ရ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲ ညးဍုၚ်ကွာန် ဗ္ဒာဲ (၁၇၀၀၀) တၠ ဒးဒုၚ်ရပ်လဝ်ရဂှ် ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)