တံၚ်ၚူ၊ ဂျာန္နဝါရဳ(၁)
ပ္ဍဲဂိတုဒဳဇြေမ်ဗာစၟတ်တ္ၚဲ (၃၁) ဂှ် ဗော်သွးကောန်ဂကူကရေၚ် (KNU) ဒပ်မဟာ (၂) မပ္တံကဵုသွက်ဂွံရီုဗၚ်ထံက်ပၚ်အာ ညးဍုၚ်ကွာန်ပါဲဒဴဘဲပၞာန် တၚ်ညးဍုၚ်ကွာန်ဂမၠိုၚ် သွက်ဂွံဒးစဵုဒစး ဗကပ်အာဗဗေၚ် ပေါဲရုဲမာဲ ကံၚ်ဇြဳပၞာန်ကၠောန်ဗဒှ် သီုဒတုဲမြမောဝ်ကံၚ်ဇြဳပၞာန်သီုဖအိုတ် မပါလုပ် ပ္တိတ်လလောၚ်တြးလဝ် တၚ်လလောၚ်တြး (၇)တၚ်ရ။
ပ္ဍဲကောန်ဂရေတ် ဒပ်မဟာ (၂) မရနုက်ကဵု (၆) ဝါ ကၠောန်ဗဒှ်လဝ် ပ္ဍဲခရိုၚ်တံၚ်ၚူ KNU ပ္ဍဲဂိတုနဝ်ဝေမ်ဗာ တုဲကၠုၚ် နူစၟတ်တ္ၚဲ (၁၆) စိုပ်ဂိတုဒဳဇြေမ်ဗာ စၟတ်တ္ၚဲ(၁၉)ဂှ်တုဲ လလောၚ်တြးကၠုၚ် တၚ်လလောၚ်တြးဏံရ။
နကဵုညးဍုၚ်ကွာန် မၞုံပ္ဍဲတိဍာ် KNU ခရိုၚ်တံၚ်ၚူ ဒပ်မဟာ (၂) ဂှ် ပေါဲရုဲမာဲပတောံ သၞာံ၂၀၂၃ ဂကောံပၞာန်က္ဍိုက်က္ဍိုပ်ကၠောန်ဗဒှ် ဗွဲအဓမ္မ မပ္တဝ်လဝ်က္ဍိုပ် သွက်သၞောတ်တၠအဝဵုပၞာန် ဂွံတန်တဴအာဂှ် သွက်ဂွံဒစဵုဒစး ဗကပ်အာဗဗေၚ်ပိုတ်တ်သ္ကုတ်တ်ကီု၊ သွက်ဟွံဂွံသ္ပ ပွမပါလုပ်ဆက်စပ်ကီု၊ သွက်ဂွံဒစဵုဒစး ဗကပ်အာဗဗေၚ် ကမၠောန်ဗဒှ်ဖိုလ် ကုကံၚ်ဇြဳပၞာန် ကေုာံဒတုဲမြမောဝ်အိုဿီုဂှ် KNU ဒပ်မဟာ(၂) ဗ္တိုက်ဖ္အောဝ်လဝ်ရ။
ပရေၚ်ရီုဗၚ်ထ္ၜလဘာ်ပရေၚ်မၞိဟ် သၟာဒဒိုက်ဘဲပၞာန် မပါလုပ် သီုညးဒးပါဲဒဴဒၟံၚ် နူဌာန်ဒေသ ဟိုတ်နူဘဲပၞာန်တအ်ကီု၊ ပရေၚ်ထံက်ပၚ် ဆေၚ်ရာကဵု ပရေၚ်ပညာပရေၚ်ထတ်ယိုတ်ဂှ် ဟွံကဵုအာရီုဗၚ် ကုဂကောံဆက်စပ်ဒၟံၚ်ကဵု ကံၚ်ဇြဳပၞာန် မွဲကဆံၚ်တုဲ နူကဵုဗဟဵု KNU မွဲကဆံၚ် ညံၚ်ဂွံထံက်ပၚ်အာ ကဆံၚ်ခရိုၚ်ဂှ် ဒပ်မဟာ(၂) အာတ်မိက်လဝ် ဂကောံဆေၚ်ရာကဵု ပရေၚ်ရီုဗၚ်ထ္ၜလဘာ်ပရေၚ်မၞိဟ်ဂမၠိုၚ်ရ။
သ္အာၚ်နူဂှ်ပၠန် ဂကောံဒပ်ပၞာန် သ္ပလဝ်ညးဍုၚ်ကွာန် အလုံမွဲကၟိန်ဍုၚ် ညံၚ်ရဴသၞတုဲ ပ္ဍဲလတူပြိုက်ဂစိုတ်ဒၟံၚ် နကဵုနဲကဲစုၚ်ဂှ်လေဝ် နကဵုညးဍုၚ်ကွာန် မၞုံပ္ဍဲတိဍာ် KNU ခရိုၚ်တံၚ်ၚူ ဒပ်မဟာ(၂) ဂမၠိုၚ် ညံၚ်ဂွံပလေဝ်ပလေတ်လဝ် သွက်ပရေၚ်ဂီုကၠီု လမျီုသ္ၚိဌာန်ပိုန်ဒြပ်ကီု၊ သွက်ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳတၟိ ဂွံမံက်ဂတဝ်တိုန်ကီု၊ သွက်ဂကောံပၞာန် ဂွံပြဟ်ဒတုံစှ်ေကီု၊ သၞောတ်တၠအဝဵုပၞာန် ဂွံပၠိုတ်လလံအာကီု၊ ပ္ဍဲကိစ္စသွက်ဂွံဖအိုတ်ကၠေံ ဝါဒမဟာဂကူဂှ် နကဵုဒပ်မဟာ (၂) ပ္ဍဲကဆံၚ်သၟဝ် ကရောံမဟာမိတ်လညာတ်တုပ်သၟဟ်လဵု ဟွံဟီု ပံၚ်တောဲရေၚ်တၠုၚ်အာရောၚ်ဂှ် လလောၚ်တြးလဝ်ရ။
ကြဴနူဒပ်ပၞာန်သီအဝဵုတုဲ အတိုၚ်လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၄) သၞာံ ၂၀၂၁ ဂှ်ဟေၚ် ဒုၚ်အာတဲ လၟေၚ်ကမၠောန်ပရေၚ်အုပ်ဓုပ် ပ္ဍဲတိဍာ်ဒပ်မဟာ (၂) အတိုၚ်ကံၚ်ဇြဳပၞာန် ကေုာံ CRPH တအ် ဖျေံနၚ်တၚ်စၞောန်ဟွံသေၚ်တုဲ ကၠောန်သ္ပအာ ညံၚ်ဇြဟတ်ယန္တရာပရေၚ်အုပ်ဓုပ် KNU ဇကု ဇြဟတ်ဂွံခိုဟ်တိုန်အာရောၚ်တုဲ နကဵုဒပ်မဟာ(၂)ဂှ် အတိုၚ်ပရေၚ်ပၠတရဴ ဗဟဵု KNU ကေုာံ အတိုၚ်ပရေၚ်ပၞာန် ဌာန်ဂအုပ်ပၞာန် KNLA ဂှ် အတိုၚ်ကၠောန်သ္ပ ဒ္ဂေတ်ဗက်ကၠုၚ်လဝ်ဂှ်ဟေၚ် ဆက်တုဲ ဒ္ဂေတ်ဗက် ရေၚ်တၠုၚ်အာရောၚ်ဂှ် ဂွံတီကေတ်လဝ် အတိုၚ်တၚ်လလောၚ်တြးဂှ်ရ။
ပရိုၚ်-သြၚ်လောန်တိုၚ်(မ်)