ကျာ်ထဝ်၊ ဂျူလာၚ် (၁၇)
ပ္ဍဲကဵုပွမဗ္တိုက် ဗ္တိုဟ်မာၚ် ဗ္ဒါဲဂၠံၚ်ပါ် ကျာ်ဣသိယဵုဍောတ် (ဒေါၚ်းတောၚ်) ၊ ကွာန်အၚ်္ဂဗိုဝ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ကောန်သ္ဂံၚ်ကံၚ်ဇြဳပၞာန် (၁၀) တၠ ချိုတ်အာလဝ်ရောၚ်ဂှ် တမ်ဒပ် (၃) ၊ ဒပ်ပၞာန်စဵုဒၞါညးဍုၚ်ကွာန်၊ ခရိုၚ်သဓီု လလောၚ်ပ္တိတ်လဝ်ရ။
တုဲကၠုၚ် ဂိတုဂျူလာၚ် (၁၅) ဂှ် ကရောၚ်ကွဳစက်ကံၚ်ဇြဳပၞာန် ကွဳစက် (၅) ဖ္ဍိုက် မပါဗက် နူကဵုပွိုၚ်ဍုၚ်ဝဝ်၊ ရးဗဂေါ မဒဳကၠုၚ် အပ္ဍဲပွိုၚ်ဍုၚ်ကျာ်ထဝ်ဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဗ္တိုဟ်မာၚ်တုဲ ပန်ပှော်ဗ္တိုက်လဝ်ရ။
အပ္ဍဲကဵုပွမဗ္တိုက်ဂှ်ဂှ် ကွဳစက်ကံၚ်ဇြဳပၞာန် (၁) ဖ္ဍိုက် ဒးလီုလာ်လဝ်တုဲ ကောန်သ္ဂံၚ်ကံၚ်ဇြဳပၞာန် (၁၀) တၠ ချိုတ်အာတုဲ လ္တူနူ (၁၅) တၠ ဟွံအောန် ဂွံဝပ်ဇီုကပိုက်နွံမာန်ဂှ် တမ်ဒပ်(၃) ၊ ဒပ်ပၞာန်စဵုဒၞါညးဍုၚ်ကွာန် ခရိုၚ်သဓီု လလောၚ်တြးလဝ်ရ။
အပ္ဍဲပွမဗ္တိုက်ဗ္တိုဟ်မာၚ်ဂှ် လလအ်ပွိုၚ် ဗ္ဒါဲ (၁၅) မိနေတ် ပရေၚ်ပန်ပှော်ၜါလ္ပာ် က္တဵုဒှ်လဝ်တုဲ ဂကောံပံၚ်ကောံ KNLA ဂှ် ဒးဝပ်ဇီုကပိုက် ဟွံမွဲတုဲ ဗွဲမအံၚ်ဇၞး ဆုတ်ကလေၚ်အာမာန်လဝ်ဂှ် ညးဒုၚ်တာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗွဲကြဴဒးဒုၚ်ဗ္တိုက် ဗ္တိုဟ်မာၚ်တုဲဂှ် ကရောၚ်ကွဳစက်ကံၚ်ဇြဳပၞာန်ဝွံ ဒေါအ်ဒေၚ်လဝ် ပ္ဍဲတမ်ဒပ် ခလ(၂) ကံၚ်ဇြဳပၞာန် မၞုံကွာန်(ဘိုက္ကား) ၊ ပွိုၚ်ဍုၚ်ကျာ်ထဝ် လလအ်ပွိုၚ်ဗဒါဲ (၁) နာဍဳတုဲ ဆက်ဒဳလုပ်အာ အပ္ဍဲပွိုၚ်ဍုၚ်ၜဳကလေၚ်ရဂှ် သ္ဂးရ။
ပ္ဍဲပွိုၚ်ဍုၚ်ကျာ်ထဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)