လ္ဂုၚ်၊ ဂျူလာၚ် (၁၇)
မၞိဟ်ပ္တန်ဘာဗ္တောန်လိက်အောန်လာၚ် Kanug For You မပံက်လဝ် နကဵုတၚ်စၞောန်ထ္ၜး အလဵုအသဳညဳသၟဟ်ဂကူ NUG မွဲတၠ ဗွဲကြဴဒးဒုၚ်ရပ်တုဲ အလုံမွဲကၟိန်ဍုၚ် အ္စာ၊အ္စာၝောံ CDM ဒးဒုၚ်ရပ်တံ နွံကၠုၚ် စဵုကဵု ဗဒါဲ (၂၀) ရဂှ် ညးမစုက်လုက်ကဵု သွာၚ်ပရေၚ်ပညာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဂျူလာၚ် (၂၀) တေံဂှ် ညးပ္တန်လဝ် ဘာဗ္တောန်လိက်အောန်လာၚ် Kaung For You မွဲတၠ ဗွဲကြဴဒးဒုၚ်ရပ်ဒက်တုဲ တၚ်နၚ်ပူဂဵုလ္ၚဵု မံက်ပြိုဟ်တိတ်ကၠုၚ်အာတုဲ အ္စာ၊အ္စာၝောံ CDM မဗ္တောန်ကဵုဒၟံၚ်လိက် ပ္ဍဲဘာဗ္တောန်လိက်အောန်လာၚ်ဂှ် ဒးဒုၚ်ရပ်ဒက်ဒၟံၚ် အဆက်က်ရ။
ဒဵုကဵုဂိတုဂျူလာၚ် စၟတ်တ္ၚဲ (၁၆) ဂှ် အ္စာ၊အ္စာၝောံ CDM ဗဒါဲ (၂၀) တၠ မဗ္တောန်ကဵုဒၟံၚ်လိက် ပ္ဍဲဘာဂှ်ဂှ် ဒးဒုၚ်ရပ်ဒက်တုဲ ဘာဗ္တောန်လိက်အောန်လာၚ် ပရေၚ်ပညာဖေတ်ဒရာ ဟွံအောန်နူကဵု (၁၂) ဘာဂှ် အတိုၚ်ပရေၚ်ဂီုကၠီုတုဲ ဒးဒေါအ်ဇူလဝ်ယာယဳအိုတ်ရဂှ် သ္ဂးရ။
ဗွဲကြဴအ္စာ၊အ္စာၝောံ CDM မဗ္တောန်ကဵုဒၟံၚ်လိက်တံ ဒးဒုၚ်ရပ်ဒက်တုဲ သွက်အ္စာ၊အ္စာၝောံ CDM တံ မပါလုပ် သီုကဵု သွက်မိမကွးဘာတံလေဝ် ပရေၚ်ဒှ်ဓဝိၚ်စံၚ်တူတံ နွံကၠုၚ်တုဲ ဒစးဒုၚ်ဂြိပ်ဒဴပါဲဒလေတ်ဒၟံၚ်တံ နွံကၠုၚ်ရ။
ဒဒှ်မရပ်ဒက်ကၠုၚ် အ္စာ၊အ္စာၝောံ CDM မဗ္တောန်ကဵုဒၟံၚ်လိက် သာ်ဏံဂှ်ဝွံ ကံၚ်ဇြဳပၞာန် ဝးပ္ကဝ်ဒၟံၚ် အခေါၚ်ဗ္တောန်ပညာ ဗွဲမဗၠးၜးတံဂှ်တုဲ လ္တူအ္စာ၊အ္စာၝောံတံဂှ် စွံဒၟံၚ်စိုတ် ညံၚ်ရဴသၞရောၚ်ဂှ် ကမ္မတဳဗကပ်ဗဗေၚ်ပရေၚ်ပညာလေဝ် လလောၚ်ပ္တိတ်လဝ် ပ္ဍဲဂိတုဂျူလာၚ် (၁၆) ဂှ်ရ။
ဌာနဝန်ဇၞော် ပရေၚ်ပညာ NUG ဂှ် နကဵုဘာဗ္တောန်လိက်အောန်လာၚ်ဂှ် ကံက်လဝ် တၚ်နၚ်ပူဂဵုတံတုဲ ထိၚ်ဒဝ်ဗွဲမစှ်ေကဵုသၞောတ် ဟွံမာန်ဂှ်ဝွံ ဒဒှ်ရဖံက်ပ္ကဝ်ဒၟံၚ် အခေါၚ်ဂီုကၠီုတၚ်နၚ်ပူဂဵု မဒှ်အခေါၚ်အဝဵုသ္ဇိုၚ်မွဲဂှ်ရ နကဵုကမ္မတဳကောပ်ကာဲဘာ မဆေၚ်စပ်တံ တာလျိုၚ်နွံဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)