ၜၚ်ကံက်၊ ဂျူလာၚ် (၁၇)
ဍုၚ်မက္ကဇြဳကိုဝ် ဒဒှ်ရရပ်ဂွံလဝ် သၟိၚ်ဂဥုဲၜူမာဲ မပါလုပ်ဒၟံၚ် ပ္ဍဲကဵုစရၚ် FBI မနွံပၟိက်အိုတ် ဂြိပ်ဒဴဒၟံၚ် (၁၀) တၠ သွက်အမှုဂစိုတ် ဖေဝ်ဒရေဝ်အေဂျေန်အမေရိကာန်မွဲတၠဂှ် ပရိုၚ်တမ်ရိုဟ် နူကဵုဒပ်ဍာ်မွဲ လလောၚ်ပ္တိတ်လဝ် ပ္ဍဲတ္ၚဲသိုက်ဂှ်ရ။
ကၟိန်ဍုၚ်အမေရိကာန် စောတ်စောဲလဝ် သၟိၚ်ဂဥုဲၜူမာဲ Rafael Caro Quintero နကဵုအမှုဂစိုတ်၊ အမှုပ္ဍဵုပ္ဍိုက်ပျဲပျာံ ကေုာံ အမှုတံၚ်ဂြဲမၞိဟ်အာတ်သြန်တံတုဲ ပ္ဍဲသၞာံ ၁၉၈၅ ဂှ် ကဵုလဝ်အမိၚ် ကုအေဂျေန်တၟေၚ် အေန်ရဳတဳ ကဳကဳ ကာမ္မာရာမ်နာ နူကဵုပရေၚ်ကောပ်ကာဲပ္ဍဵုကောပ်တာဒၞါ ဂဥုဲၜူမာဲ ( DAE) ရ။
ပ္ဍဲသၞာံဏံဂှ် ရပ်ဂွံလဝ်ညးတုဲ စၟဳစၟတ်ပ္ဍဲရုၚ်သၞောဝ်ဓဝ် မက္ကဇြဳကိုဝ်တုဲ ဒးဒုၚ်ဖျေံလဝ် ဒဏ်ထံၚ် (၄၀) သၞာံရ။
ၜိုန်ဂှ်ကီုလေဝ် ပ္ဍဲသၞာံ ၂၀၁၃ ဂှ် နူကဵုရုၚ်သၞောဝ်ဓဝ် မက္ကဇြဳကိုဝ်မွဲ ဗွဲကြဴဖျေံလဝ်ထံၚ် ကုသၟိၚ်ဂဥုဲၜူမာဲ ကာရိုဝ်ကွာမ်တဳရိုဝ် လလအ်ပွိုၚ် (၂၈) သၞာံတုဲ သွက်ဂွံဗလးကဵု အတိုၚ်သွာၚ်မဆေၚ်စပ်ကဵုကွတ်ပညာ မဗဗွဲဓဝ်တံဂှ် ကဵုလဝ်အမိၚ်ရ။
နူကဵုဂအုပ်ရုၚ်သၞောဝ်ဓဝ်မက္ကဇြဳကိုဝ် တးပါဲလဝ် တၚ်သ္ဂုတ်သွာတ်ဂှ်ကီုလေဝ် ကွာမ်တဳရိုဝ်ဝွံ ပါဲဒလေတ်ဒၟံၚ်တုဲဒှ်ဣရ။
ကုကာရိုဝ်ကွာမ်တဳရိုဝ်ဂှ် ပ္တိတ်လဝ် ၚုဟ်လာဗ်ဗဇဴ ဒဝ်ဠာ (၂၀) ပြကောဋိကိုဋ်တုဲ နူကဵု FBI ထမံက်ထ္ၜးလဝ် နဒဒှ်ပူဂဵုအန္တရာယ်မၞုံအိုတ်ရ။
ညးဝွံ ဒးဒုၚ်စောတ်စောဲလဝ် ဒဒှ်ရပံၚ်တောဲဒက်ပ္တန်လဝ် ဂိုန်ဂဥုဲၜူမာဲ ဂွါဒါလာဂျာရာတုဲ လၟုဟ်ဂှ် ဒဒှ်ရ ဒှ်ဒၟံၚ်မၞိဟ်ပတှ်ေ ဂိုန်ဂဥုဲၜူမာဲဇြဳနာလံၚ် မပြာကတ်တဴ နကဵုယၟုပရေံပရေံဂှ် ဂွံတီကေတ် နူကဵုဂလာန် DEA ရ။
နူကဵုဒပ်ဍာ် မၞုံသၟဝ်ကျာတွဵုရးချဳဟွာဟွာ ရပ်ဒက်ဂွံလဝ် သၟိၚ်ဂဥုဲၜူမာဲ ကာရိုဝ်ကွာမ်တဳရိုဝ်ရောၚ်ဂှ် မဳဒဳယျာမက္ကဇြဳကိုဝ် ထ္မံက်ထ္ၜးလဝ်ရ။
ရုၚ်သၞောဝ်ဓဝ် မက္ကဇြဳကိုဝ်မွဲဂှ် ယဝ်ရရပ်ဂွံကာရိုဝ် ကွာမ်တဳရိုဝ်ဂှ်မ္ဂး လှဲပအပ် ကုအမေရိကာန်မာန်ရောၚ် သ္ဂုတ်သွာတ်လဝ်တုဲ စပ်ကဵုဒးဒုၚ်စောတ်စောဲလဝ်ဒုဟ် ပ္ဍဲရုၚ်သၞောဝ်ဓဝ်မက္ကဇြဳကိုဝ်ဂှ်တုဲ နူကဵုညးရေၚ်တၠုၚ်ဂဗုတ်ညး မလုပ်ဂရၚ်ပ္တီလဝ်ဂှ်လေဝ် တးပါဲလဝ်ရ။
Ref: Bangkok Post