မတ်မလီု၊ ဂျူလာၚ် (၂၀)
သၟုဟ်ဓာတ် (gas) မစကာရပ်စပ်ဒၟံၚ် အဓိက ပ္ဍဲကဵုသ္ၚိဒၟံၚ်၊ ဆေၚ်စသုၚ် ကေုာံ ဟဝ်တေဝ် နူကဵုတွဵုရးဍုၚ်မန်တံဝွံ အပ္ဍဲဗွဝ်ဖျာဂှ် ၜိုတ်နွံပၟိက် ရာန်ကေတ်ဟွံဂွံဂှ်ရ ဆေၚ်ဖျာလ္ၚဵုတံဝွံ စတုဲ ဒးဂဗဒၟံၚ်ကဵု ပွမပိုတ်အိုတ်တံယျဂှ် တၠကမၠောန်ပရေၚ်သွံရာန် သၟုဟ်ဓာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟုဟ်ဓာတ် အရပ်စပ်သ္ၚိ၊ အရပ်စပ်ဖျာတံဝွံ စနူသတ္တာဟတုဲကၠုၚ်တေံတုဲ အပ္ဍဲဗွဝ်ဖျာ ပိုတ်အိုတ်ကၠုၚ်လဝ်ဂှ်ရ ၜိုတ်နွံပၟိက် ရာန်ကေတ်ဟွံဂွံတုဲ ၚုဟ်မးဆက်သၠုၚ်တိုန်ကၠုၚ်ရ။
ဟိုတ်နူသၟုဟ်ဓာတ် အရပ်စပ်သ္ၚိ၊ အရပ်စပ်ဖျာတံ ပိုတ်အိုတ်အာဂှ်ရ သၟုဟ်ဓာတ် (gas) မွဲကဳလော နူကဵု(၂၅၀၀) ဒ္ကေဝ် စဵုကဵု (၃၀၀၀) ဒ္ကေဝ်ပြၚ် ၚုဟ်သၠုၚ်တိုန်ကၠုၚ်တုဲ ထၟာဲဇၞော် (၄၈) ကဳလောမွဲထၟာဲ နူ(၁၀၀,၀၀၀) ဒ္ကေဝ်ပြၚ်ဂှ် ၚုဟ်သၠုၚ်တိုန်ကၠုၚ် စဵုကဵု ပွဳပွူ (၁၃၀,၀၀၀) ဒ္ကေဝ်ရ။
စပ်ကဵုအကာဲအရာဏံတုဲ တၠကမၠောန်ပရေၚ်သွံရာန် သၟုဟ်ဓာတ်မွဲတၠ ဟီုလဝ် ဗီုဏံရ။
“အကာဲအရာ (gas) ဗီုလဵုရောဟီုတှ်ေ လ္ပာ်သေံတေံဂှ် ဟွံဖျေံကဵုကပေါတ်တံဏီပုဟ်၊ သၟုဟ်ဓာတ်(ဍာ်) တံ ဟွံကလေၚ်လုပ်ဏီပုဟ်၊ တုဲတှ်ေ ပ္ဍဲလ္ဂုၚ် (gas) ပိုတ်အိုတ်ဂးတုဲ စနူဂှ်တုဲ နူကဵုလ္ဂုၚ် တိုန်ရာန်ပ္ဍဲမြဝတဳ၊ ပ္ဍဲမြဝတဳ သၟုဟ်ဓာတ် (ဍာ်) သာ်ဏံတံ ဒှ်အာစဵုကဵုပိုတ်အိုတ်ရ၊ တုဲပၠန် လ္ပာ်သေံတေံလေဝ် မူဝါဒလာၚ်ဇြေန် ပြံၚ်သၠာဲတံ ပါကီု၊ အေဂှ် ဇဳအာတုဲ ဒှ်အာဗီုလၟုဟ်ရ၊ မုဆက်ဒှ်ရောဟီုတှ်ေ ပ္ဍဲဗွဝ်ဖျာ မၞိဟ်သၟုဟ်ဓာတ် မၞုံတံဂှ် ပ္တိုန်ၚုဟ်တုဲ မၞိဟ်သွံဒၟံၚ်တံလေဝ် နွံရ၊ ပြဟ်ဟ်ဏံဂှ် သၟုဟ်ဓာတ်တံဂှ် ၜိုတ်နွံပၟိက် ရာန်ကေတ်ဟွံဂွံဏီ ဒှ်ဒၟံၚ် အေဗီုဏံရ၊ ဒၞါဲလ္ၚဵု ဂွံတုဲ ဒၞါဲလ္ၚဵုတံဂှ် ဟွံဂွံရ၊ ဒၞါဲဂွံဂှ်လေဝ် ၚုဟ်ဂၠိုၚ်ဒၟံၚ်ညိည၊ ဒှ်ဒၟံၚ် အေဗီုဏံရ” သာ်ဝွံ သ္ဂးရ။
ဟိုတ်နူသၟုဟ်ဓာတ် အရပ်စပ်သ္ၚိ၊ အရပ်စပ်ဖျာတံ ပိုတ်အိုတ်ဒၟံၚ်တုဲ ဆေၚ်ဖျာလ္ၚဵုတံ ဒးကၟာတ်လဝ်ယာယဳတုဲ သၟုဟ်ဓာတ်သှ်ေ အောန်စှ်ေကၠုၚ်ဗက် ၚုဟ်ဆက်သၠုၚ်တိုန်ကၠုၚ်မာန်ရောၚ်ဂှ် ညးသ္ဂးရ။
သၟုဟ်ဓာတ် အရပ်စပ်သ္ၚိ၊ အရပ်စပ်ဖျာတံဂှ် ထ္ပက်အဇာ ပၟတ်ဓာတ်လလဳတုဲ ရပ်စပ်စကာဒၟံၚ် နဒဒှ်စၞပၟတ်တံတုဲ ပ္ဍဲကဵုဆေၚ်စသုၚ် ကဵု ဟဝ်တေဝ်တံဂှ် စကာဒၟံၚ်ဂၠိုၚ်အိုတ်ရ။
သၟုဟ်ဓာတ် အရပ်စပ်သ္ၚိ၊ အရပ်စပ်ဖျာ မစကာဒၟံၚ် အပ္ဍဲတွဵုရးဍုၚ်မန်တံဂှ် ဒးပၠောပ်နၚ် နူကဵုဍုၚ်သေံ အဓိကတုဲ သွံတြးဒၟံၚ်ရ။
ပရိုၚ်−သြၚ်လောန်တိုၚ်(မ်)