ဒူပလာယာ၊ ဂျူလာၚ် (၂၀)
ပ္ဍဲတိဍာ်ထိၚ်ဒဝ် ဒပ်မဟာ (၆) ခရိုၚ်ဒူပလာယာ ဗော်သွးကောန်ဂကူကရေၚ် KNU ဂှ် ဗွဲကြဴဒပ်ပၞာန်သီအဝဵုတုဲ ဟိုတ်နူဒပ်ကံၚ်ဇြဳပၞာန် ဗ္တိုက်ကဵုက္ၜၚ်ကျာ ကေုာံ လွဟ်လက်နက်ဇၞော်တံဂှ်ရ ကောန်အရာပ် (၇၁) တၠ ချိုတ်အာလဝ်ဂှ် ဇာဇၞိက်အထံက်အရီု ပရေၚ်ၜိုဟ်လလမ်ကရေၚ် (KPSN) လလောၚ်ပ္တိတ်လဝ်ရ။
စနူကၞောတ်သၞာံ ၂၀၂၁ ဂှ်တုဲ ပ္ဍဲသြၚ်ဒဵုရေၚ်ဒဝ်နသီုၜါလ္ပာ် သၠုၚ်ကျာဂၠံၚ်ဇၞော်အာယှ မဒှ်ဂၠံၚ်ဇၞော် ပရေၚ်သၠာဲဂတးဗၞိက် ကၟိန်ဍုၚ်ဗၟာ အဓိကမွဲ ပ္ဍဲကဵုခရိုၚ်ဒူပလာယာ KNU ဂှ် အကြာဒပ်ကံၚ်ဇြဳပၞာန် ကဵု ဒပ်ပၠန်ဂတးကရေၚ်တံ က္တဵုဒှ်လဝ် ပေါဲဗ္တိုက် သ္ကာတ်မြဟ်ရ။
အပ္ဍဲပေါဲဗ္တိုက်ဂှ် ဟိုတ်နူကံၚ်ဇြဳပၞာန် ဗ္တိုက်ကဵုက္ၜၚ်ကျာ၊ ပန်ပှော်လွဟ်လက်နက်ဇၞော်တံဂှ်ရ ကောန်အရာပ် (၇၁) တၠ ချိုတ်အာတုဲ ညးဍုၚ်ကွာန်ဒေသ (၈၆၀၀၀) ပြၚ်ဝွံ ထောံလသာသ္ၚိဌာန်တုဲ ဒးဂြိပ်ဒဴလဝ်ရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် KPSN ရ။
တုဲပၠန် စနူဂိတုဒဳဇြေမ်ဗာ သၞာံ ၂၀၂၁ စဵုကဵု ဂိတုဂျူလာၚ် သၞာံ ၂၀၂၂ အပ္ဍဲပွိုၚ် (၈) ဂိတုဂှ် ဒပ်ကံၚ်ဇြဳပၞာန်ဝွံ ပွမဗ္တိုက်ကဵုက္ၜၚ်ကျာ အပံၚ်(၂၀၃) ဝါ ကၠောန်သ္ပလဝ်တုဲ အပ္ဍဲလၟေၚ်ဒဒှ်ဏံဂှ် ကောန်အရာပ်တံ မ္ၚးနူဇီုကပိုက်ဂွံဝပ် ချိုတ်တံဂှ် သ္ၚိဒၟံၚ်၊ ဘာ၊ စမြိုၚ်ပရေၚ်ဘာသာတံလေဝ် သ္ကဵုလီုလာ်လဝ် ဗွဲမဂၠိုၚ်ဂၠေၚ်ရဂှ် KPSN သ္ဂးလဝ်ရ။
ညးဒေသ မဒးဂြိပ်ဒဴပါဲဒလေတ်ဒၟံၚ် ဗွဲမဂၠိုၚ်တံဝွံ ဒးစ္ၜုဲစ္ၜော်ဒၟံၚ် ပ္ဍဲကဵုဗ္ဒိုပ် ညးဒဒိုက် မသိုၚ်ခၞံလဝ် မွဲဒမြိပ်ပယျဵုသေံတံဂှ်တုဲ နွံပၟိက်ဒၟံၚ်ကဵု အရီုဗၚ်ကာတၟေၚ် ပရေၚ်ဗ္စာရဏာမၞိဟ်တံရ။
ဟိုတ်ဂှ်ရ နကဵုကၟိန်ဍုၚ်သ္အာၚ်တံ သွက်ဂွံကၟာတ်လဒဵုကေတ်အရေဝ် ပရေၚ်ထံက်ပၚ် ကၠေၚ်က္ၜၚ်ကျာ ကေုာံ လွဟ်လက်နက်အလုံဂၠးတိ လ္တူကံၚ်ဇြဳပၞာန်တံဂှ်ကီု၊ သၟုဟ်ဓာတ်သဘာဝ မပါလုပ် သီုကဵုပရေၚ်ပိုန်ဒြပ်တံဂှ် သွက်ဂွံကၟာတ်လဒဵုကေတ်ကဵုအရေဝ်ဂှ်ကီု၊ အရီုဗၚ်တၟိတၟိ စပ်ကဵုပရေၚ်ဖောအ်ဗြေဝ် ကုဒပ်ပၞာန်တံဂှ် သ္ဂောံဒေါအ်ဒေၚ်ထောံသၟးဟွံက နူကဵုဌာနဒုၚ်ကာ ပရေၚ်မၞိဟ်ကောန်ဍုၚ်အရၚ် ကဵု ဂကောံမှာဇန်တံဂှ်မွဲကဆံၚ် တတ်ကၠောံပယျဵုဒၞက်တုဲ သွက်ဂွံသၠုၚ်ပ္တိုန်ကဵု အရီုဗၚ်ပရေၚ်ဗ္စာရဏာမၞိဟ် ကုညးပါဲဒဴဘဲပၞာန်တံကီု တၚ်နၚ်တံဏံ သွက်ဂွံကဵုဇြဟတ်ဂရိုဟ် သၠုၚ်ပ္တိုန်ကဵုဂှ် KPSN အာတ်မိက်လဝ်ရ။
ပရိုၚ်−သြၚ်လောန်တိုၚ်(မ်)