ကျာ်ထဝ်၊ ဂျာန္နဝါရဳ(၆)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကွာန်အေၚ်္ဂဘိုဝ်၊ ပ္ဍဲလတူဍာန်ကွဳစက် လဂုၚ်-မတ်မလီု ပ္ဍဲဂိတု ဂျာန္နဝါရဳ စၟတ်တ္ၚဲ (၅) အခိၚ်နူဂယးဂှ် ရေၚ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်လဝ်မာၚ်ရဂှ် ဂွံတီကေတ် နူကဝ်မတဳပရေၚ်ကောပ်ကာဲမိတ် KNU ခရိုၚ်သဓီုရ။
အခိၚ်ၜိုတ် ၇ နာဍဳ ပ္ဍဲတ္ၚဲဏံ နူကဵုလပါ်သေတ်တံၚ် ရေၚ်ကွဳစက်ပၞာန်ဒဳလုပ်ကၠုၚ် လပါ်ပွိုၚ်ဍုၚ်ကျာ်ထဝ် ၄ ဖ္ဍိုက်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံၚ်ခတိုဟ်လဝ်မာၚ်ရ။
ဟိုတ်နူ ဒးဒုၚ်တံၚ်ခတိုဟ်လဝ်မာၚ်တုဲ ကွဳစက်ပၞာန်မွဲဖ္ဍိုက် ဇီုကပိုက်လီုလာ်လဝ်တုဲ ကောန်ပၞာန်ပါဗက်ကၠုၚ် ပ္ဍဲကွဳစက်ဂှ် ဟွံအောန်နူ (၇) တၠ ဇီုကပိုက် ဒးချိုတ်လဝ်ရဂှ် ဥက္ကဋ္ဌ ကဝ်မတဳကောပ်ကာဲပရေၚ်မိတ် ခရိုၚ်သဓီု KNU ဟီုသ္ဂးလဝ်ရ။
ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်လဝ်မာၚ်ဂှ် ဒှ်ရေၚ်ယာဉ်ကွဳစက် သွက်ဂွံအာကဵုရီုဗၚ်ပၞာန် ပ္ဍဲတိဍာ် KNU ဒပ်မဟာ (၅) ဟွံသေၚ်မ္ဂး ဒပ်မဟာ(၆) ရဂှ် ဟီုသ္ဂးလဝ်ရ။
ကြဴနူ ဒးဒုၚ်တံၚ်ခတိုဟ်လဝ်မာၚ်တုဲဂှ် နူလပါ်ဒပ်ကံၚ်ဇြဳပၞာန် ဗက်ပန်ဒၟံၚ်ကြာန်န်ဂှ်ရ ညးဒေသမွဲတၠ ဒးလဝ်လွဟ်မကမ် ဂွံလဝ်ဘဲဝပ်ရဂှ် ဂွံတီကေတ် နူညးဒေသဂမၠိုၚ်ရ။
ပ္ဍဲဗ္ဒာဲကွာန်အေၚ်္ဂဘိုဝ် ပွိုၚ်ဍုၚ်ကျာ်ထဝ်ဂှ် ရေၚ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်ဗတိုက်ဒၟံၚ် နကဵုမာၚ် မွဲခနမွဲခနတုဲ ပရေၚ်ကွဳစက်ဒးခရိုဟ်လီုလာ်ကီု သီုပရေၚ်ကောန်ဒပ်ကံၚ်ဇြဳပၞာန်တအ် ဇီုကပိုက်ချိုတ်ကၠုၚ် နွံဒၟံၚ်ရ။
ပရိုၚ် – သြၚ်လောန်တိုၚ်(မ်)