တၚ်ဆက်စၠောံသၟာန်သွဟ်လဝ်ကဵု သ္ဂံၚ်သလိုၚ်ယျဝ်အံၚ် ညးမပါလုပ်ကဝ်မတဳက္ဍိုက်က္ဍိုပ်ဗဟဵု၊ ဒပ်ပၞာန်ကွးဘာ (ABSDF)
ဂကောံဒပ်ပၞာန်သီအဝဵု သွက်ဂွံဆက်ဓမံက်အာရုပ်ရဴ ပရေၚ်သဳကၠဳပရေၚ်ၜိုဟ်လလံ နတဲစှ်ေစှ်ေကီု သွက်ဂွံက္လိဂွံ ပရေၚ်ၜိုဟ်လလံထာဝရ ညးဍုၚ်ကွာန်တအ် နွံဒၟံၚ်ပၟိက်ဂှ်ကီုဂးတုဲ စတမ်နူ သၞာံ ၂၀၂၃ ဂိတုဂျာန္နဝါရဳ စၟတ်တ္ၚဲ (၁) စဵုကဵု ဂိတုဒဳဇြေမ်ဗာအိုတ်တေံ ဒဒှ်ရ ဒေါံဇူလဝ် ပရေၚ်ပန်ပှော် ပွိုၚ်မွဲသၞာံဂှ် လလောၚ်တြးကၠုၚ်လဝ် ပ္ဍဲဂိတုဒဳဇြေမ်ဗာ စၟတ်တ္ၚဲ ၃၁ ဂှ်ရ။ သ္အာၚ်နူဂှ်ပၠန် ပ္ဍဲကဵုဂလာန်လၟိၚ်ကၠောံသၞာံ ကံၚ်ဇြဳပၞာန်ဂှ်လေဝ် ဒဒှ်ရ သၞာံ၂၀၂၃ ဏံဂှ် ဒှ်သၞာံစတမ် သွက်ပရေၚ်ၜိုဟ်လလံ ကဵုပရေၚ်ဖောအ်ဗြေဝ် မွဲသၞာံကီု ကၠောန်ဗဒှ်အာ ပေါဲရုဲမာဲ ဒၞာဲသၠးဟွံကဵုမွဲကီုဂှ် ဟီုသ္ဂးကၠုၚ်လဝ်နွံရ။
ဟိုတ်ဂှ်ရ ပရေၚ်လလောၚ်တြး ဒဒှ်ရဒေါံပန်ပှော် ပွိုၚ်မွဲသၞာံ နူကဵုလပါ်ဂကောံပၞာန်ဂှ် ၜိုတ်ကဆံၚ်လဵု တၞဟ်ခြာဒၟံၚ်ကဵု အကာဲအရာ ပ္ဍဲဗလးမုက်တိရော။ ပေါဲရုဲမာဲကံၚ်ဇြဳပၞာန် ပ္တိတ်ဒၟံၚ်ဇြဟတ်ဂှ်ရော နတဲစှ်ေစှ်ေ ဒှ်ကၠုၚ်မာန်ဟာ။ ၂၀၂၃ ဏံ ၜိုတ်ကဆံၚ်လဵု ပၟိက်ဇၞော်ဒၟံၚ် သွက်ပရေၚ်ပၠန်ဂတးက္ညၚ်ရော။ စပ်ကဵု အကာဲအရာဏံတုဲ သၟာန်သွဟ်လဝ်ကဵု သ္ဂံၚ်သလိုၚ်ယျဝ်အံၚ် ညးလုပ်ဂကောံကဝ်မတဳဗဟဵု ဒပ်ပၞာန်ကွးဘာ (ABSDF)ရ။
-အလန်ကိုပ်ကၠာအိုတ်ဏံ ပါဲနူကဵုအခိၚ်ပလာပ်ပထုဲ ပရေၚ်ဂီုကၠီုကဵု ယန္တရာပရေၚ်အုပ်ဓုပ်ကံၚ်ဇြဳပၞာန်တုဲ ပရေၚ်ချဳဒရာၚ်ဒပ်ပၞာန် အလုံပွိုၚ် ၂၀၂၃ မွဲသၞာံ ဒေါံဇူလဝ် ပရေၚ်ပန်ပှော်ရ ပ္ဍဲလတူလလောၚ်တြးလဝ်ဏံ ဗီုလဵုညာတ်ကေတ်ရော။
ဒပ်ပၞာန်ဂှ် ယဝ်ရပလာပ်ပထုဲ ပရေၚ်ဂီုကၠီုကဵု ယန္တရာပရေၚ်အုပ်ဓုပ်တှ်ေ ဗတိုက်ဏောၚ် ဟီုလဝ်ရ။ ပါဲနူဂှ်တုဲ ဒေါံဇူလဝ် ပရေၚ်ချဳဒရာၚ်ပၞာန် ပ္ဍဲ၂၀၂၃ ဏောၚ်ဟီုဂှ် အရာဏံ တၚ်ထေက်ကဵုဒးသၟာန် နွံဒၟံၚ်ရ။ အခိၚ်လၟုဟ်ဏံ ပေါဲဗတိုက်ဒှ်ဒၟံၚ် ပ္ဍဲအလုမ်မွဲဍုၚ် ပါလုပ် သီုရးသေတ်ဂါၚ်၊ ရးမဂွေတအ်ဂှ် ဂုဏ်နူဍေံတအ် အာဗတိုက်တုဲ ဒှ်ဒၟံၚ်ရ။ ပိုဲဂှ် ဒုၚ်ဗတိုက်စဵုဒၞာဒၟံၚ် ပရေၚ်ညးဍုၚ်ကွာန်တအ် ဒးဒုၚ်ပ္ကီုပရာပ်ဒၟံၚ်ရ။ ပ္ဍဲအလုမ် ၂၀၂၂ ပွိုၚ်မွဲသၞာံဂှ် တၚ်စၟတ်သမ္တီပေါဲဗတိုက် ပိုဲပကောံပကေဝ်လဝ်ဂှ်။ အရာဏံ တၚ်ယုတ်ဒေက် နွံဒၟံၚ်ဏီရ။ ပ္ဍဲကဵုစၟတ်သမ္တီ ပိုဲပတိုန်လဝ် ၜိုတ်ပိုဲသၟဟ်အစောန်ဂှ်တှ်ေ PDFကဵုဒပ်ပၞာန် ဒှ်လဝ် ၂၀၁၀ ဝါရ။ တုဲပၠန် ကဵုဂကောံ EAO ထ္ပက်လဝ်စၟတ်တဲ NCA ဂှ် ဒှ်လဝ် ၁၄၇ ဝါ။ မွဲပၠန်ဂှ် ကဵုEAO ဟွံဂွံထ္ပက်လဝ်စၟတ်တဲ NCA ဂှ် ဒှ်လဝ်ပေါဲဗတိုက် ၈၂ ဝါ နွံရ။ လပါ်ဍေံတအ် ဒေါံပန်ပှ်ောရဂှ် ဟီုလဝ်ရ။ ဂုဏ်နူဍေံတအ် ကၠုၚ်ဗတိုက်တုဲ ဒှ်လဝ်ရ။ ဒၟာနူဍေံတအ် လုပ်စိုပ်ကၠုၚ် တိဍာ်ပိုဲတုဲ ဒှ်လဝ်ရ။ ဟီုတှ်ေ အတိုၚ်လိက်သုက် NCA ဂှ် ပရအ်ဒုၚ်တုဲ ဒးကဵုပရိုၚ်ဏောၚ်။ ဆဂးဂှ် ဍေံတအ် ဟွံဒ္ဂေတ်ဗက်ကၠုၚ် စေဝ်ပၞောန်သီုဖအိုတ်ဂှ်ပုဟ်။ ဟိုတ်ဂှ်ရ ပိုဲဒးဒှ်ဒၟံၚ် ပေါဲဗတိုက်ရ။ ပိုဲၜက်ၜေတ်လုပ်အာတုဲ ဒှ်ပေါဲဗတိုက် ဗတိုက်ဒၟံၚ်ဟွံသေၚ်ပုဟ်။
-တုဲပၠန် က္ဍိုပ်သ္ကိုပ်ပၞာန်ဂှ် ကၠောန်ဗဒှ်အာပေါဲရုဲမာဲ ဒၞာဲသၠးဟွံကဵုမွဲ အလုံမွဲကၟိန်ဍုၚ်ဏောၚ်။ ညံၚ်ကၟိန်ဍုၚ် ဂွံၜိုဟ်လလံညိၚ်ဝတ် အတိုၚ်အကာဲအရာ မူလပကတိတေံဂှ် ရေၚ်တၠုၚ်ဒၟံၚ်ရ ပရေၚ်ဟီုဂးဒၟံၚ်ဗီုဏံကဵု ဗီုဒှ်ဒၟံၚ်ပကတိ ၜိုတ်လဵုတၞဟ်ခြာ ဒၟံၚ်နွံရော။ သ္ၚဳဂၠိပ်ထ္ၜးကဵုညိ။
အရေဝ်တအ်ဏံဂှ် ဂုဏ်နူဂွံမိၚ်ဒၟံၚ် နူလပါ်ကံၚ်ဇြဳပၞာန်တွဵုဂှ်ရ သွက်ပိုဲတှ်ေ ယျဵုအာအိုတ်ယျ။ မုဒှ်ရောတှ်ေ ဒၟာနူဟီု မွဲဗီု၊ ကၠောန် မွဲဗီုရ။ ညံၚ်အကာဲအရာဍုၚ်ကွာန် ဂွံပရေံစှ်ေကၠုၚ် ညးကၠောန်ဒၟံၚ်ဂှ် ညးဂှ်ရော တၚ်သၟာန်ဏံ နွံဒၟံၚ်ရ။ ဣဏံဂှ် ဒှ်ဒပ်ပၞာန်ရ။ လၟုဟ်ဂှ် ပတိတ်ဒၟံၚ်ဇြဟတ် ညံၚ်ဂွံဒှ်အတိုၚ်ပကတိဟီုတှ်ေ အရေဝ်ဍေံဂှ် ဂတကြဴ ဟွံကိတ်ညဳပုဟ် ဒှ်ဒၟံၚ်ရ။ ဟီုတှ်ေ ဒှ်အရာဒးဂြိုၚ်စရ။ ပေါဲရုဲမာဲဂှ် အဲထေၚ်ကေတ်တှ်ေ ပ္ဍဲသၟဝ်ပရေၚ်ဍုၚ်ကွာန် ဗီုကဵုလၟုဟ်ဏံဂှ် ဗီုဟီုဂှ် ဟွံလောဲပုဟ် ထေၚ်ရ။ ဣဏံဂှ် မွဲတၚ်။ မွဲပၠန်ဂှ် ညးပလီုပလာ်လတ် ဒဳမဝ်ကရေဇြဳဂှ် ဒက်ပ္တန် ကၟိန်ဍုၚ်ပံၚ်ကောံဖေတ်ဒရေဝ်ဏောၚ်ဟီုတှ်ေ ဣဏံဂှ် ဒှ်အရၚ်ဂွံဒးဂြိုၚ်စရဂှ် အဲညာတ်ကေတ်၇။
-တုဲမွဲပၠန်ဂှ် ပရေၚ်ဖောအ်ဗြေဝ် ပရေၚ်ၜိုဟ်လလံ ကံၚ်ဇြဳပၞာန်ဟီုဒၟံၚ်ဂှ် ရံၚ်ကဵုပြသၞာပရေၚ်ဍုၚ်ကွာန်၊ ပရေၚ်ကြေပ်ဂြတ် ဒှ်ဒၟံၚ်လၟုဟ်ဏံတုဲ ဒှ်သၞာံစတမ်မွဲသၞာံ ဇေတ်တ်ဏောၚ်ဂှ် ညာတ်ကေတ်ဟာ။ ပ္ဍဲလတူဏံ ဗီုလဵုသ္ၚဳဂၠိပ်ကေတ်ရော။
ပရေၚ်ဖောအ်ဗြေဝ် ကဵုပရေၚ်ၜိုဟ်လလံ ဟီုဏာလဝ် ပ္ဍဲကဵုဂလာန်လၟိၚ်ဍေံဂှ် ဟီုဒၟံၚ် ရမျှာၚ်မၠံက် ရမျှာၚ်ဗုမ်က္ၜၚ်ကျာ ညးပါဲဘဲပၞာန်တအ်ဟာ။ ဣဏံဂှ် တၚ်ဒးသၟာန်ရ။ မွဲပၠန်ဂှ် ပ္ဍဲကဵုသ္ဇိုၚ်သၟဝ်တေံ မုဒှ်မံၚ်ရောဂှ် အဲထေၚ်ကေတ် ဍေံဟွံတီလဝ် ချိုတ်တ်ပၠိုတ်တ်ပုဟ် ထေၚ်ကေတ်ရ။ လၟုဟ်တှ်ေ ပ္ဍဲဍုၚ်လဂုၚ် လှာၚ်သာယျာဂှ် ဒးတေၚ်ဒၟံၚ် စရၚ်ကၟုဲ ပ္ဍဲသ္ၚိသ္ကိုပ်အုပ်ဓုပ်သ္ၚိကၠံရ။ တ္ၚဲလောန်အာဂးတုဲ မၞိဟ်မွဲတှ်ေ အာတ်ဒၟံၚ် ၅၀၀ ရ။ ဣဏံဂှ် မုထ္ၜးမံၚ်ရောတှ်ေ ပ္ဍဲညးဍုၚ်ကွာန်တအ် ပရေၚ်ဂီုကၠီု ဟွံမွဲရပုဟ်ဂှ် ဓမံက်ထ္ၜးဒၟံၚ်ရ။ သွက်ပရေၚ်ဘဝညးဍုၚ်ကွာန်ဂွံဂီုကၠီု ဟီုမွဲနဲပၠန်တှ်ေ ပရေၚ်ဂီုကၠီုဘဝမၞိဟ် ဟွံမွဲတှ်ေ အဲထေၚ်ကေတ်တှ်ေ ပရေၚ်စတမ်ပရေၚ်ဂီုကၠီုဂှ် ဟီုဟွံမာန်ပုဟ်ဂှ် အဲညာတ်ကေတ်ရ။
-အလန်လကြဴအိုတ်ဏံတှ်ေ သၞာံ ၂၀၂၃ ဂှ် သွက်ပရေၚ်ပၠန်ဂတးက္ညၚ် ၜိုတ်ကဆံၚ်လဵု ပၟိက်ဇၞော်ဒၟံၚ်ရော။ ပ္ဍဲလတူဏံ ဟီုထ္ၜးကဵု တၚ်လစွံစိုတ်တၚ်သမ္တီညိ။
၂၀၂၃ ဂှ်တှ်ေ သွက်ပိုဲတအ် ဒှ်သၞာံ ပၟိက်ဇၞော်မွဲသၞာံရဂှ် အဲညာတ်ကေတ်ရ။ နကဵုဂကောံဇြဟတ်ပိုဲတအ် ညံၚ်သၞောတ်တၠအဝဵုပၞာန်ဏံ ဂွံလလံအိုတ်အာ ဃောပ္တိတ်ဒၟံၚ်ဇြဟတ်ရ။ ဒပ်ပၞာန်ဂှ်တှ်ေ ပ္တိတ်မံၚ်ဇြဟတ် ပေါဲရုဲမာဲကဵု သွက်ဂွံသောၚ်ကလး ပြသၞာပရေၚ်ကြေပ်ဂြတ် ပရေၚ်ဍုၚ်ကွာန်ဍေံတအ်ရ။ ဣဏံဂှ်လေဝ် ပ္ဍဲသၞာံ ၂၀၂၃ ဏံ ပေါဲရုဲမာဲ ဒှ်မာန်၊ ဒှ်ဟွံမာန်ဟီုဂှ် အဲထေက်တှ်ေ ပိုဲဒးမၚ်ရံၚ်ဗဵုရ။