ထဝါဲ၊ ဂျူလာၚ် (၂၀)
ပ္ဍဲဍုၚ်ထဝါဲ၊ ရးဒေသဇၞော်တၞၚ်သဳတံဂှ် နူဂိတုဂျူလာၚ် (၁၅) စဵုကဵု (၁၉) အပ္ဍဲပွိုၚ် (၅) တ္ၚဲဂှ် ဒပ်ကံၚ်ဇြဳပၞာန် ရပ်ဒက်ကော်ဏာလဝ် ညးဗြဴ (၈) တၠဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဂျူလာၚ် (၁၅) တေံဂှ် ဒပ်ကံၚ်ဇြဳပၞာန် ရပ်ဒက်ဏာလဝ် ကွးဘာ CDM မသူဇာဝေန်ထက် နူအရာပ်ဝါကျောန်၊ ညးသွံဖျာ နူအရာပ်(ကညုံ) ဒဝ်မိုဝ်ကလျာ ကေုာံ ဒဝ်သဳရဳလှာၚ် နူအရာပ်(ကျောက်) (၃) တၠ နူကဵုလ္တူဍုၚ်ထဝါဲတံဂှ်ရ။
ပ္ဍဲဂိတုဂျူလာၚ် (၁၉) ပယျာံလဒေါဝ်တ္ၚဲဂှ် ဒပ်ကံၚ်ဇြဳပၞာန်တံ ထပ်ရပ်ဒက်ကော်ဏာလဝ် ညးဗြဴ (၅) တၠ နူကဵုအရာပ် လ္တူဍုၚ်ထဝါဲဂမၠိုၚ် မဒှ်အရာပ် (ကြက်စာပြၚ်) ၊ (ဒေါင်းငူ) ကေုာံ နူကဵုအရာပ် (ဘုမ္မော်) တံ မဒှ်ရ။
အခိၚ်လၟုဟ်ဂှ် ကုညးဗြဴ ဒပ်ကံၚ်ဇြဳပၞာန်တံ မရပ်ဒက်ကော်ဏာတံဂှ် ထိၚ်ဒက်စွံလဝ် ဒၞါဲလဵုရောဟီုဂှ် ဟွံဂွံတီကေတ်ဏီတုဲ ကဵုသ္ၚိကၟိန်တံလေဝ် ဟွံဂွံအဆက်ဏီပုဟ်ဂှ် ညးဒေသတံ ဟီုရ။
ပ္ဍဲလ္တူဍုၚ်ထဝါဲဂှ် ဒပ်ကံၚ်ဇြဳပၞာန်ဝွံ ပ္ဍဲတ္ၚဲအကြာဏံဂှ် ရပ်ဒက်ဒၟံၚ် ကုညးမဆက်စပ်ကဵု ဘာဗ္တောန်လိက်လပှ်ကျာ Kaung For You တံ အဆက်က်ဂှ်တုဲ ဒဒှ်မရပ်ဒက်လၟုဟ်ဂှ်ဝွံ ဆက်စပ်ဒၟံၚ်ကဵု ဘာဗ္တောန်လိက်လပှ်ကျာဏံ နွံဟွံမွဲဟီုဂှ် ဟွံဂွံတီကေတ် ဗွဲလစှ်ေဏီရ။
ပ္ဍဲရးဒေသဇၞော်တၞၚ်သဳဂှ် ဗွဲကြဴဒပ်ပၞာန်သီအဝဵုတုဲ ညးဍုၚ်ကွာန်ဒုဟ်ဟွံမွဲ (၁၀၀၀) ပြၚ် ဒးဒုၚ်ရပ်ဒက်ထိၚ်ဒဝ်လဝ်တုဲ ဗွဲမဂၠိုၚ်ဂှ် ကံၚ်ဇြဳပၞာန်တံ ဖျေံစၟတ်လဝ် ဒုဟ်ဒဏ်၊ ဒဏ်ထံၚ် စၟံစၟံရ။
ပရိုၚ်−သြၚ်လောန်တိုၚ်(မ်)