နျူဒေလဳ၊ ဂျူလာၚ် (၂၀)
ပ္ဍဲအရာပြိုၚ်ပ္ကာန် သွက်ကဆံၚ်သမ္မတ သဳရိလၚ်္ကာဂှ် ဒၟါနူမိက်ဂွံကဵုဇြဟတ် ထံက်ဂလာန် ကုညးစၞးလ္ပာ်ဒစဵုဒစးမွဲတၠဂှ်တုဲ သာဂျေတ်ပရဳမာဒါသာ မဒှ်က္ဍိုပ်သ္ကိုပ်ဒစဵုဒစး အဓိကမွဲတၠဂှ်ဝွံ ဒဒှ်မ ညးမလုပ်ပြိုၚ်ပ္ကာန်ဂှ် ရုပ်သီထောံလဝ် ပ္ဍဲတ္ၚဲအၚာဂှ်ရောၚ် ဂွံတီကေတ်ရ။
“သွက်ဒတုဲဖဵု ကၟိန်ဍုၚ်အဲဆာန်ကဵု ညးဍုၚ်ကွာန် အဲသ္ဍိုက်မၠိုက်တံတုဲ အခေါၚ်လုပ်စိုပ်ပြိုၚ်ပ္ကာန် သွက်ကဆံၚ်သမ္မတဂှ် ရုပ်သီအာ နူဏံရ” သာ်ဝွံ ပရဳမာဒါသာ ဟီုဂးလဝ် ပ္ဍဲ Twitter ရ။
သွက် ဒူလက်(သ်) အေဝ်(လ်)ဟာပ်ပဳရူမာ ဂွံဇၞးဂှ် ဗော်ညး ကဵု မဟာမိတ်ညးဂမၠိုၚ်၊ မၞိဟ်ကၠောန်မွဲစွံ လ္ပာ်ဒစဵုဒစးတံ ဂ္စါန်အာရောၚ်ဂှ် သ္ဂးရ။
သမ္မတကၟိန်ဍုၚ်သဳရိလၚ်္ကာ ဂိုဝ်ဒါဗာရာဝွံ ဗွဲကြဴထောံလသာကၟိန်ဍုၚ်တုဲ ပ္ဍဲတ္ၚဲလလောၚ်တြး ကုသ္ကိုပ်ဝန်ဇၞော်လၟုဟ် ရာနေ(လ်)ဝေသ်ခရေန်သေမ်ဂဳ နဒဒှ်သမ္မတယာယဳ သဳရိလၚ်္ကာဂှ်ရ သွက်ဂွံခါန်ကၞက်သ္ကိုပ်ဝန်ဇၞော်တၟိဂှ် သၟာန်သၟုက်လဝ် ဇရေၚ်ညးမၞုံအခေါၚ်ဟီုဂး ပါလဳမာန်ဂှ်ရောၚ် ဂကောံလလောၚ်ပရိုၚ်တံ ဟီုဂးလဝ် ပ္ဍဲဂိတုဂျူလာၚ် (၁၃) ဂှ်ရ။
ရာဂျာပက်သာဝွံ ကၠာဂွိုအ်စှ်ေကဵု နူကဆံၚ်သမ္မတဂှ် ထောံလသာဂြိပ်တိတ် နူကၟိန်ဍုၚ်တုဲ ဟိုတ်နူအကြေပ်ဂြတ်ပရေၚ်ပိုန်ဒြပ် မသ္ကဵုက္တဵုဒှ်ကၠေံ လရုလစာ်ကလိုက်ကၟဵု ညးဍုၚ်ကွာန်ဂှ်ရ ကုအဝဵုသြဇာ ဂြောဝ်ဂတာသမ္မတ နူကဵုဍုၚ်တ္ကအ်ဂှ် ပၠိုတ်လလီုအာဣရ။
ကြဴနူ တ္ၚဲမၞိဟ်ဂၠိုၚ်ကဵုကၠံ မဗိုၚ်လဝ် ရုၚ်ရာဂျာပက်သာ မၞုံဍုၚ်ကဝ်လာမ်ဗိုဝ်တုဲ အာတ်မိက်လဝ် သွက်ဂွံစှ်ေကဵု နူကဵုကဆံၚ်ဒၞါဲတုဲဂှ် သ္ကိုပ်ဝန်ဇၞော်ရာနေ(လ်) ဝွံ လလောၚ်တြး အကာဲအရာကာတၟေၚ်တုဲ ပ္တိတ်လဝ်အမိၚ် ကာဖျူရ။
သမ္မတသဳရိလၚ်္ကာ ဂိုဝ်ဒါဗာရာ ရာဂျာပက်သာဝွံ နူကဵုမဝ်(လ်) ဒိုက်မွဲကဆံၚ် စိုပ်သေန်ကာပေါဝ်တုဲ လလအ်ပွိုၚ်နာဍဳညိညဂှ်ဟေၚ် ပ္တိုန်လဝ် လိက်နုက်တိတ် ပ္ဍဲဂျူလာၚ် (၁၄) ဂှ်ရ။
Ref: Reuters