မတ်မလီု၊ ဂျူလာၚ် (၂၁)
သၞောဝ်သ္ဇိုၚ်ဒက်ပ္တန်ဍုၚ်မန်ရးမည ဗော်ဍုၚ်မန်တၟိ မသ္ကိုပ်သ္က ချူဇန်အာဂှ်ဝွံ ယဝ်ရကၠောန်ၜိုတ် သၟဝ်သၞောဝ်သ္ဇိုၚ်ဒက်ပ္တန် ၂၀၀၈ မ္ဂး ဒစဵုဒစးအာရောၚ်ဂှ် ကမ္မတဳပံၚ်ကောံ ရေၚ်တၠုၚ်ကေၚ်ကာဍုၚ်မန် (MSICC) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူကဵုကောံဓရီုပရေၚ်ဂကူမန် သၞာံ ၂၀၂၂ ဗော်ဍုၚ်မန်တၟိ သ္ကိုပ်သ္ကတုဲ မကၠောန်ဗဒှ်လဝ်ဂှ် ဖျေံလဝ်သ္ဂုတ်သွာတ် အပ္ဍဲပွိုၚ်တြဴဂိတု ညံၚ်ဂွံချူဓဇက်မူသ္ဇိုၚ် ကၟိန်ဍုၚ်ပံၚ်ကောံဖေဝ်ဒရာဂှ် ကဵု သၞောဝ်သ္ဇိုၚ်ဒက်ပ္တန်ဍုၚ်မန်ဒတုဲရောၚ်။
အခိၚ်လၟုဟ်ဂှ် သွက်ဂွံချူခၞံအာ မူသ္ဇိုၚ်ကၟိန်ဍုၚ်ပံၚ်ကောံ ကေုာံ သၞောဝ်သ္ဇိုၚ်ဒက်ပ္တန်ဍုၚ်မန်ဂှ်တုဲ ဒက်ပ္တန်လဝ် ကမ္မတဳပရေၚ်တပ်ဇန်ပ္ညဳပ္ညပ် ညးစၞး (၁၇) တၠ မပါလုပ်တုဲ ပ္အပ်ကဵုလဝ်တာလျိုၚ်ရ။
ပ္ဍဲကဵုကမ္မတဳ ပရေၚ်တပ်ဇန်ပ္ညဳပ္ညပ်ဂှ် ညးစၞး (၁၇) တၠ နူကဵုသွာၚ်သၚ်မန်၊ ဗော်ဍုၚ်မန်တၟိ၊ ဗော်ညဳသၟဟ်မန်၊ ဂကောံမှာဇန်မန်နာနာ၊ ဂကောံဘိက်ထေက်၊ ပူဂဵုဘိက်ထေက်တံ ပါလုပ်ရ။
ကမ္မတဳပံၚ်ကောံရေၚ်တၠုၚ်ကေၚ်ကာဍုၚ်မန် (MSICC) ဂှ် ပ္ဍဲအရာတပ်ဇန်သၞောဝ်သ္ဇိုၚ်ဒက်ပ္တန်ဍုၚ်မန်ဂှ် ယဝ်ရဒစေၚ်ဗၠေၚ်အာ နူကဵုမူဖေဝ်ဒရာဒဳမဝ်ကရေဇြဳချာတာတုဲ တပ်ဇန်အာ သၟဝ်သၞောဝ်သ္ဇိုၚ်ဒက်ပ္တန် ၂၀၀၈ ဂှ်မ္ဂး ဒစဵုဒစးအာရောၚ်ဂှ် ဟီုလဝ်ရ။
“ပိုယ်တံလေဝ် ညံၚ်ဂွံသ္ပသ္ဇိုၚ် ကုဖေဝ်ဒရာဒဳမဝ်ကရေဇြဳမာန်ဂှ် လုပ်လဝ်ပရေၚ်စန်ဒက် Advocacy နွံရ၊ ပိုယ်တံဂှ် မုဟီုဟီု သ္ပသ္ဇိုၚ်ကဵုဂကူမ္ဂး ဒၞါဲသ္ဂောံဆဵုဂဗ ကုကောန်ဂကူတံဂှ် မွဲနဲမွဲဗီု ဂၠံၚ်တရဴမ္ဒးဂဗတံ နွံရောၚ်၊ သာ်ဂှ်တှ်ေ ယဝ်ရဟွံဒစဵုဒစးကဵု ဖေဝ်ဒရာဒဳမဝ်ကရေဇြဳချာတာဂှ်ဟီုမ္ဂး ဒ္ဂေတ်ဗက်မူညးဍုၚ်ကွာန်တံရတုဲ ပွမရေၚ်တၠုၚ်ကၠောန်ၜိုတ်တံဂှ် နွံရ၊ ယဝ်ခါရ ဒစေၚ်ဗၠေၚ်ကၠုၚ်မ္ဂး ပိုယ်တံ ဒစဵုဒစးကၠုၚ်လဝ် နွံတုဲ ဆက်တုဲဒးကၠောန်ၜိုတ်အာပၠန်ရောၚ်၊ ဥပမာ ပိုယ်တံ သၞောဝ်သ္ဇိုၚ်ဒက်ပ္တန် ၂၀၀၈ ဂှ် ဟွံဒုၚ်တဲလးလးရ၊ ကလေၚ်အာသၟဝ် ၂၀၀၈ ပၠန်မ္ဂး ပိုယ်တံ ဒးဒစဵုဒစးရောၚ်၊ နူကဵုဂကောံမဆေၚ်စပ် မဒစဵုဒစးမာန်တံဂှ် ပိုယ်တံ ဒးကၠောန်ၜိုတ်အာရောၚ်” သာ်ဝွံ ဖက်ဆောညးအုပ်ကာ (၂) MSICC မိသုတဂျဵု သ္ဂးရ။
စပ်ကဵုဂလာန် MSICC ဟီုဂးလဝ်တုဲ ကုညးမၞုံအခေါၚ်ဟီုဂး ဗော်ဍုၚ်မန်တၟိ မပါလုပ်လဝ် ပ္ဍဲပရေၚ်တပ်ဇန် သၞောဝ်သ္ဇိုၚ်ဒက်ပ္တန်ဍုၚ်မန်ဂှ် နူကဵုဌာန်ပရိုၚ်သြၚ်လောန်တိုၚ်(မ်) သွက်ဂွံသၟာန်သၟုက်ဂှ် ၜိုန်ရဂ္စါန်လဝ် ဂၠိုၚ်ကဵုဝါကီုလေဝ် ဟွံဂွံလဝ်အဆက်ရ။
ဗော်ဍုၚ်မန်တၟိဝွံ ပ္ဍဲပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် မကော်ဘိက်ဂှ် သွက်ဂွံချူဇန်သၞောဝ်သ္ဇိုၚ်ဒက်ပ္တန် ကၟိန်ဍုၚ်ပံၚ်ကောံဖေဝ်ဒရာ အနာဂတ်ဂှ်ကီု၊ သွက်အခေါၚ်စၞောန်ပျးအပိုၚ် ကဵု အခေါၚ်တုပ်သၟဟ်တံတုဲ သွက်ဂွံချူခၞံစၞောန်ပျး သၞောဝ်သ္ဇိုၚ်ဒက်ပ္တန်တွဵုရး တၞဟ်ခြာမာန်ဂှ် ပ္တိုန်ထ္ၜးသဳကၠဳလဝ်တုဲ လ္ပာ်ကံၚ်ဇြဳပၞာန် တုပ်လဝ်စိုတ် နကအ်ပါၚ်ဂှ် ညးမၞုံအခေါၚ်ဟီုဂး ဗော်ဍုၚ်မန်တၟိ နာဲအံၚ်မ္ၚဵု ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ကမ္မတဳပံၚ်ကောံရေၚ်တၠုၚ်ကေၚ်ကာ ဍုၚ်မန်ဂှ်ဝွံ ဒှ်ကမ္မတဳ ဒက်ပ္တန်လဝ် ဗွဲကြဴဒပ်ပၞာန်သီအဝဵုမွဲတုဲ အခိၚ်လၟုဟ်ဂှ် ပ္ဍဲအလဵုအသဳညဳသၟဟ်ဂကူ NUG ဂှ် ဝန်ဇၞော်ပိတၠ ကေုာံ ပ္ဍဲကံၚ်ဇြဳကဵုပသပ်ပရေၚ်ညဳသၟဟ်ဂကူ (NUCC) ဂှ် ညးစၞးပိတၠ ပါလုပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)