ကျာ်ထဝ်၊ ဂျူလာၚ် (၂၁)
ပ္ဍဲပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ကံၚ်ဇြဳပၞာန် ရပ်ဒက်ဏာလဝ် သၟာတက္ကသဳကွဳလိုန်ဓာတ် (၂) တၠ မပါလုပ် မၞိဟ် (၆) တၠတံ နကဵုတၚ်စောတ်စောဲ ထံက်ပၚ်ဒၟံၚ် ကုဒပ်စဵုဒၞါညးဍုၚ်ကွာန်တံရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဂျူလာၚ် (၁၇) တေံ ဒပ်ကံၚ်ဇြဳပၞာန် ရပ်ဒက်ဏာ ညးသၟတ်မွဲတၠ မဂ္ဇအ်မၚ်ဒၟံၚ်ကွဳစက် ပ္ဍဲသၞေဟ်ကွဳစက် ဂတဖျာသေံဂှ်တုဲ အဆက်အကြာဂှ်ရ ထပ်ရပ်ဒက်ဏာလဝ် ညးသၟတ် (၂) တၠပၠန်ရ။
သ္အာၚ်နူဂှ်ပၠန် တုဲကၠုၚ် ပ္ဍဲဂိတုဂျူလာၚ် (၁၉) ပယျာံလဒေါဝ်တ္ၚဲဂှ် ဒပ်ကံၚ်ဇြဳပၞာန် ထပ်ရပ်ဒက်ဏာလဝ် ညးသၟတ် (၃) တၠ မရာန်ဒၟံၚ် ဇဗၠုသွတ် ဂတမုက် Golden Bliss Hotel ဍုၚ်ကျာ်ထဝ်ဂှ်ရ။
ညးသၟတ် (၃) တၠ မဒးဒုၚ်ရပ်လဝ်တံဝွံ ဒှ်ညးဒဳတက္ကသဳကွဳလိုန်ဓာတ် နူကွာန်မိုဝ်ဗဝ် ကိုဝ်အံၚ်မျဵုမေန် ကဵု ကိုဝ်သီဟ မပါလုပ် ရဲသ္ကအ်ပိတၠတံရဂှ် ညးဒေသမွဲတၠ ဟီုရ။
ကုညးမဒးဒုၚ်ရပ်တံဂှ် လ္ပာ်ကံၚ်ဇြဳပၞာန် ရပ်ဒက်ထိၚ်ဒဝ်လဝ် ဒၞါဲလဵုရောဟီုဂှ် ဟွံဂွံတီကေတ်ဏီတုဲ ဒဵုကဵုအခိၚ်လၟုဟ် ဟွံဂွံအဆက် ကုသ္ၚိကၟိန်တံဏီရ။
ပ္ဍဲကဵုအကံက် ထလဳဂရာမ် မထံက်ဂလာန်ကဵုဇြဟတ် ကုကံၚ်ဇြဳပၞာန်လ္ၚဵုတံဂှ်တှ်ေ ညးသၟတ် ဒးဒုၚ်ရပ်ဒက်တံဝွံ ဒှ်ညးမအာတိုန်စိုပ်တန်ဗ္တောန် (drone) ပ္ဍဲတမ်ဒပ် (၃) ဒပ်မဟာ(၁) KNLA ကဵု ညးသၟတ်မထံက်ပၚ် ကု PDF တံရောၚ်ဂှ် စောတ်စောဲလဝ်ရ။
ပရိုၚ်−သြၚ်လောန်တိုၚ်(မ်)