ဘာပန်၊ ဂျူလာၚ် (၂၁)
ကောန်ဒပ်ကံၚ်ဇြဳပၞာန် မၞုံအပ္ဍဲခရိုၚ်ဘာပန် ဗော်သွးကောန်ဂကူကရေၚ် KNU ၜါတၠဂှ်ဝွံ နကဵုလွဟ်လက်နက်မကမ်တံဂှ် လုပ်ဖျေံလဝ်လွဟ် ပ္ဍဲဒပ်မဟာ(၅) ဒပ်ပၞာန်ဗၠးၜးကောန်ဂကူကရေၚ် KNLA တံရဂှ် ဒပ်မဟာ(၅) လလောၚ်ပ္တိတ်လဝ်ရ။
တုဲကၠုၚ်ဂိတုဂျူလာၚ် (၆) ဂှ် ကောန်သ္ဂံၚ်မွဲတၠ နူတမ်ဒပ် ခမရ (၃၄၁) ကံၚ်ဇြဳပၞာန် မဖျေံသ္ဇိုၚ် ဍုၚ်ဘာပန်ဂှ်ဝွံ နကဵုလွဟ်မွဲဇကိုအ် ကဵု ဖျေဲလွဟ်တံဂှ် လုပ်ဖျေံလဝ်လွဟ်တုဲ ကောန်သ္ဂံၚ်ဂှ်ဝွံ ဂြိပ်တိတ်ကၠုၚ် နူဗ္ဒိုပ်ဖျေံသ္ဇိုၚ် (နတ်တောၚ်) မၞုံပယျဵုတွဵုရးကရေၚ် ကဵု တွဵုရးကရေၚ်ဍာဲတံ မဒှ်ရဂှ် ထမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
တုဲပၠန် ပ္ဍဲဂိတုဂျူလာၚ် (၁၀) တုဲကၠုၚ်တေံလေဝ် ကောန်သ္ဂံၚ်မွဲတၠ နူတမ်ဒပ် ခလရ (၅၄) သၟဝ်တဲ ဂအုပ်ဌာန်ကောပ်ကာဲဒေသပၞာန် (လွိုၚ်ကဝ်) ကံၚ်ဇြဳပၞာန်တံဝွံလေဝ် နကဵုလွဟ်လက်နက်ၜါဇကိုအ် ကဵု မကမ်ဂမၠိုၚ် လုပ်စိုပ်ဖျေံလဝ်လွဟ်ရဂှ် ထ္မံက်ထ္ၜးလဝ်ရ။
ကောန်သ္ဂံၚ် မလုပ်စိုပ်ဖျေံလွဟ်မွဲတၠဂှ်ဝွံ ဟွံမွဲပၟိက်ကဵု သၞောတ်တၠအဝဵုပၞာန်လးလးတုဲ ပံၚ်တောဲအာကဵု ညးဍုၚ်ကွာန်တံတုဲ သွက်တၠအဝဵုပၞာန် ဂွံကလှ်စှ်ေ ဆက်ကၠောန်ၜိုတ်အာရောၚ်ဂှ် ဟီုရ။
ကောန်ဒပ်ကံၚ်ဇြဳပၞာန် မလုပ်စိုပ်ချဳဒရာၚ်ဒၟံၚ် ပရေၚ်ပၞာန် အပ္ဍဲခရိုၚ်ဘာပန် KNU တဂှ်ဝွံ ဗွဲကြဴဒပ်ပၞာန်သီအဝဵုတုဲ လၟိဟ်ကောန်သ္ဂံၚ် ကံၚ်ဇြဳပၞာန် မလုပ်စိုပ်ဖျေံကၠုၚ်လွဟ် ဇရေၚ်ဒပ်မဟာ (၅) တံဂှ် မၞုံကၠုၚ် စဵုကဵု (၅၀) တၠပြၚ်ရဂှ် ဂွံတီကေတ် အတိုၚ်လိက်စၟတ်သမ္တီ မလလောၚ်ပ္တိတ်လဝ် နူကဵုဒပ်မဟာ (၅) KNU ဂှ်ရ။
ပရိုၚ်−သြၚ်လောန်တိုၚ်(မ်)