လမိုၚ်၊ ဂျာန္နဝါရဳ(၂၁)
တွဵုရးဍုၚ်မန်၊ ပွိုၚ်ဍုၚ်ရေဝ်၊ တၟံကၞေၚ်ကွာန်တၟိ၊ ပ္ဍဲဂၠံၚ်ဗ္ဒာဲဒပ်အမၠံက်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၂၀) အခိၚ်နူဂယး အခိၚ်ကောန်ဒပ်ဂီုကၠီုကံၚ်ဇြဳပၞာန် ကလေၚ်စဴကၠုၚ် နူပလံၚ်ကွးဘာဂှ် ဟိုတ်နူဒးဒုၚ်ဗတိုက်လဝ်တုဲ ဒးချိုတ်အာလဝ် (၅)တၠရဂှ် ဒပ်ဒမၠုက်ဍုၚ်ရေဝ်(YGF) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
အခိၚ်ၜိုတ် (၉)နာဍဳ တ္ၚဲဏံဂှ် နူဒပ်အမၠံက်ကံၚ်ဇြဳပၞာန် စၟတ်(၃၁၇) ပလံၚ်ဏာကွးဘာ ပ္ဍဲဘာဗ္တောန်လိက်တၟံကၞေၚ်တုဲ ကောန်ဒပ်ကံၚ်ဇြဳပၞာန်(၆)တၠ ဃောကလေၚ်စဴကၠုၚ် ကဵုကွဳလိုန်ဓာတ် (၃)ဖ္ဍိုက်ဂှ် ဒပ်ဒမၠုက်ဍုၚ်ရေဝ် ကြတ်ဗတိုက်လဝ်ရ။
ဟိုတ်နူကောန်ဒပ်ကံၚ်ဇြဳပၞာန် ဒးဒုၚ်ဗတိုက်လဝ်ဂှ်ရ ကောန်ဒပ် (၅)တၠဒးချိုတ်လဝ်တုဲ (၁)တၠဂှ်မ္ဂး ဗၠးတိတ်အာ နူပရေၚ်ပန်ပှော်ဂှ်ကီုလေဝ် သီကေတ်ဂွံလဝ် လွဟ်(၃)ဒကိုအ်ရဂှ် ညးတာလျိုၚ်ဒပ်ဒမၠုက်ဍုၚ်ရေဝ် ဗိုလ်ကျာန်ယျေတ် ဟီုသ္ဂးလဝ်ရ။
ကြဴနူပရေၚ်ပန်ပှော်ဒှ်လဝ်တုဲဂှ် ဒၟာနူပန်ကၠုၚ် နကဵုလွဟ်ဇၞော် နူဒပ်အမၠံက် စၟတ်(၃၁၇) အဆက်ဟွံပိုတ်သ္ကုတ်တုဲ ညးဒေသတၟံကၞေၚ်မွဲတၠ ဇီုကပိုက်ဒးလွဟ်ဇၞော် ဂွံလဝ်ဘဲဝပ်ရဂှ် ဂွံတီကေတ်ရ။
ကြဴနူပန်ပှော်ဂှ် ဟိုတ်နူဒပ်ကံၚ်ဇြဳပၞာန် ကၠောန်ကၠုၚ်ပရေၚ်ကၟာတ်ဂၠံၚ်စၟဳစၟတ်တုဲ ယာဉ်ကွဳစက်ဗွဲမဂၠိုၚ် ဒးဆိုအ်ဗကၟာတ်ဒၟံၚ်ကီု ယာဉ်ကွဳစက်လ္ၚဵုတအ်ဂှ် ကလေၚ်ဂတးစဴအာလဝ်ရဂှ် ဟီုလဝ်ရ။
ဒပ်ဒမၠုက်ရေဝ်(YGF)ဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၁၈)ဂှ်လေဝ် အာစိုပ်ဗတိုက်လဝ် ဗ္ဒပ်ဗၠာဲသၟိၚ်တိဍာ် ကံၚ်ဇြဳပၞာန် မၞုံပ္ဍဲကွာန်ပြဳ၊ ပွိုၚ်ဍုၚ်ဇြပ်ဗုတုဲ ဗၠာဲသၟိၚ်(၅)တၠဒးချိုတ်လဝ်တုဲ ဂွံလဝ်ဘဲဝပ်(၃)တၠရဂှ် လလောၚ်တြးလဝ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ စၟတ်တ္ၚဲ(၆)တေံဂှ်လေဝ် ဒပ်ဒမၠုက်ဍုၚ်ရေဝ် (YGF) ဂှ် ပန်ပသောၚ်လဝ် သၞာဲဒဴဗၠာဲသၟိၚ်ပရိုၚ် SB မွဲတၠ ပ္ဍဲဗ္ဒာဲကျာ်စေတဳ ပ္ဍဲဍုၚ်လၟိုၚ်ရ။
ပရိုၚ်-သြၚ်လောန်တိုၚ်(မ်)