အၚ်ဝ – ဂျာန္နဝါရဳ(၂၁)
နာဲစန္ဒိမာ ကေုာံနာဲအာစာရ မဒှ်တၠဂုဏ်အ္စာ သံဃသမဂ္ဂ အၚ်ဝၜါဇကုတအ်ဂှ် ကံၚ်ဇြဳပၞာန် ကော်ရပ်ကေတ်ဏာလဝ် ၜိုန်ရအခိၚ်လအ်လဒၟံၚ်ကီုလေဝ် ဒဵုကဵုလၟုဟ်ဏံ ပလံၚ်ဏာလဝ် ဒၞာဲဌာန်လဵုရောဂှ် ဟွံဂွံတီကေတ်ဏီတုဲ ပရိုၚ်ကၠေံကၠက်ဒၟံၚ်ရဂှ် တၠဂုဏ်အ္စာ က္ဍိုက်က္ဍိုပ်သံဃသမဂ္ဂမွဲဇကု ဟီုသ္ဂးလဝ်ရ။
မဒှ်ခမဳသၚ်ၜါဇကုတအ်ဂှ် ပ္ဍဲဂိတုဖေဖဝ်ဝါရဳ သၞာံ ၂၀၂၂ တေံ ရပ်ကော်ဏာလဝ် နာဲစန္ဒိမာတုဲ နာဲအာစာရဂှ်မ္ဂး ကံၚ်ဇြဳပၞာန် ရပ်ကော်ဏာလဝ် ပ္ဍဲသၞာံ ၂၀၂၃ ဂိတုဂျာန္နဝါရဳမံက်ဏံရ။
“အလဵုတၠဂုဏ်တအ်လေဝ် ဒးလုပ်လဝ် ပ္ဍဲပရေၚ်စၟဳစၟတ်ရ၊ လအ်မွဲသတ္တာဟ၊ တၠဂုဏ်သှ်ေဒၟံၚ်တအ်ဂှ်လေဝ် ၜါသတ္တာဟတှ်ေ နူပရေၚ်စၟဳစၟတ်ဂှ် ပလံၚ်ဏာထံၚ်ရ။ နာဲစန္ဒိမာကဵု နာဲအာစာရတအ် ၜါဇကုဂှ်တှ်ေ ဟွံမိၚ်လဝ်ပရိုၚ် စိုပ်အာလပါ်ထံၚ်တေံဏီဂှ်ရ တၠဂုဏ်တအ် ဒးဂွိၚ်ဒၟံၚ်ကဵု အန္တရာယ်လမျီု သံဃသမဂ္ဂၜါဇကုဂှ် လောန်ရဂှ်” ကျာ်ဇၞော်က္ဍိုက်က္ဍိုပ် သံဃသမဂ္ဂအၚ်ဝ နာဲမေတ္တာနန္ဒ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဏံပၠန် စဵုကဵုအခိၚ်ကံၚ်ဇြဳပၞာန် ရပ်ကော်ဏာလဝ်ဂှ် ခမဳသၚ်ၜါဇကုဏံ ဒှ်ညးပရေၚ်ထတ်ယိုတ်ခိုဟ်ဒၟံၚ် သီုၜါဇကုတုဲ ဒှ်ညးဘဲဝပ်ဒိုက်ယဲ ဟၟဲဂှ်ရ ကၟိန်အိန်ထံၚ်ကောဒေံညးတအ် ဒးဒှ်ဒၟံၚ်ဂဝိၚ်ရဂှ် ဟီုသ္ဂးလဝ်ရ။
ခမဳသၚ်ဒးဒုၚ်ရပ်လဝ် ပရေၚ်ထတ်ယိုတ်ခိုဟ်ဒၟံၚ် သီုၜါဇကုဂှ် ယဝ်ရအန္တရာယ်မွဲမွဲသာ် က္တဵုဒှ်ကၠုၚ်မ္ဂး ဒှ်တာလျိုၚ် ဒပ်ပၞာန်ရပ်ကော်ဏာလဝ် ဟွံဗဗွဲကဵုဓဝ်တအ်ရဂှ် သံဃသမဂ္ဂ(အၚ်ဝ) လလောၚ်တြးလဝ်ပရိုၚ်ရ။
ပ္ဍဲဂကောံသံဃသမဂ္ဂအၚ်ဝၚ် ဒက်ပ္တန်လဝ် ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲဂှ် စဵုကဵုအခိၚ်လၟုဟ်ဏံ ခမဳသၚ်(၁၀)ဇကု ဒးဒုၚ်ရပ်လဝ်တုဲ ပ္ဍဲကဵုဂှ်မ္ဂး ခမဳသၚ်(၈)ဇကုဂှ် ဟွံကဵုအခေါၚ်ခၠေဝ်သှ်တုဲ ကံၚ်ဇြဳပၞာန်ရပ်ဒက်ဖျေံထံၚ် နကဵုဂဗုတ်ဟွံဗဗွဲကဵုဓဝ်တအ်ရ။
ပရိုၚ်-သြၚ်လောန်တိုၚ်(မ်)