တၚ်ဆက်စၠောံသၟာန်သွဟ်လဝ်ကဵု ညးတာလျိုၚ် PDF ခရိုၚ်သဓီု ကိုဝ်ဨမေန်။
ကံၚ်ဇြဳပၞာန်သီအဝဵုဂှ် သွက်ပေါဲရုဲမာဲကၠုၚ်စိုပ်ဂတဏံ ပတိတ်ဒၟံၚ်ဇြဟတ် သွက်ဍေံတအ်ဂွံကၠောန်ဗဒှ်ဂှ် ဗက်ကံၚ်ကေတ်ဒၟံၚ် စရၚ်မၞိဟ်ပ္ဍဲဗလးမုက်တိ တိုန်မွဲသ္ၚိစှ်ေမွဲသ္ၚိ နူဂိတုဂျာန္နဝါရဳ တုဲကၠုၚ် နူစၟတ်တ္ၚဲ(၉) စဵုကဵု စၟတ်တ္ၚဲ (၃၁) ပွိုၚ်ပိသတ္တာဟရ။ ဟိုတ်ဂှ်ရ ပ္ဍဲလတူကံၚ်ဇြဳပၞာန် ကံက်ကေတ်ဒၟံၚ်စရၚ်မၞိဟ် ပ္ဍဲဗလးမုက်တိတုဲ သာ်လဵုညာတ်ကေတ်ရော။ ပ္ဍဲလတူပရေၚ်ကံက်ကေတ်ဒၟံၚ်စရၚ်မၞိဟ်ဂှ် နကဵုဂကောံပၠန်ဂတးဂမၠိုၚ် သာ်လဵု သွက်ဂွံပလန်အာတဲ နွံရော။ မုမိက်ဂွံဟီုဗ္ကန်စကဵု ညးဍုၚ်ကွာန်တအ် သာ်လဵုရော စပ်ကဵုအကာဲအရာဏံတုဲ ဆက်စၠောသၟာန်သွဟ်လဝ်ကဵု ကိုဝ်ဨမေန် ညးတာလျိုၚ် PDF ခရိုၚ်သဓီုရ။
-နကဵုအလန်ကိုပ်ကၠာအိုတ်ဏံ သွက်ပေါဲရုဲမာဲ ကၠုၚ်စိုပ်ဂတဏံဂးတုဲ ပ္ဍဲလတူကံက်ကေတ်ဒၟံၚ်စရၚ်မၞိဟ် ပ္ဍဲဗလးမုက်တိဂှ် ဗီုလဵုညာတ်ကေတ်ရော။
ဂကောံကောန်ရဲကံၚ်ဇြဳပၞာန်တအ်ဂှ် စပ်ကဵုပရေၚ်ကံက်ကေတ်ဒၟံၚ် စရၚ်မၞိဟ် ပ္ဍဲဗလးမုက်တိတုဲယဝ်ရဒးဟီုတှ်ေ ဗာ်မွဲဒကုတ် ပိုတ်ၜါဒကုတ်ရ။ ကံက်ကေတ်မံၚ်စရၚ်မာဲလေဝ် ဒှ်ရ။ ကၟိန်အိန်ထံၚ်မွဲအိန်ထံၚ် လၟိဟ်မၞိဟ်ဍာံဍာံ နွံ ဟၟဲ ညံၚ်ဂွံတီတုဲတှ်ေ ကံက်ကေတ်ဒၟံၚ်လေဝ် ဒှ်ရ။ သ္ၚိလၟိဟ်မၞိဟ်ယအ်အာတအ်ဂှ် မုဟိုတ်ဂွံယအ်အာ၊ နွံဒၟံၚ်အလဵုရော။ အာကၠောန်စမံၚ် ဍုၚ်မ္ၚးဟာ။ ဟွံသေၚ်တှ်ေ လုပ်အာ ပ္ဍဲဂကောံပၠန်ဂတးတအ်ဟာဂှ် ညံၚ်ဂွံတီတုဲ ထံၚ်မံၚ်ပရိုၚ်ပရောဗက်လကြဴရ။ အရာဏံလေဝ် ပိုဲဂွံတီကေတ်လဝ် နူကဵုပရိုၚ် ပ္ဍဲဍေံတအ်ရ။ တၚ်ရန်တၟံ ပရေၚ်ပၠန်ဂတးညးဍုၚ်ကွာန် အဓိကဂှ်တှ်ေ ညံၚ်တၠအဝဵုပၞာန် ဂွံပၠိုတ်အိုတ်အာ၊ သွက်ဂွံဒက်ပ္တန် ကၟိန်ဍုၚ်အနာဂတ် သၞောတ်ပံၚ်ကောံဖေတ်ဒရေဝ်ရ။ သွက်သၞောတ်တၠအဝဵုပၞာန် ဂွံပၠိုတ်အိုတ်အာဟီုဂှ် ညံၚ်သၞောဝ်သ္ဇိုၚ် ၂၀၀၈ သ္ပကဵုဒၟံၚ် ညံၚ်အာယုက်ပၞာန်ဂွံဂၠိၚ်ဂှ် လမျီုညံၚ်ဟွံဂွံလုပ် ပိုဲလလောၚ်တြးလဝ်တုဲ ရေၚ်တၠုၚ်ကၠုၚ်လဝ်ရ။ လၟုဟ်တှ်ေ ဒပ်ပၞာန်ပ္ကီုပရာပ် ကံၚ်ဇြဳပၞာန်ဂှ် သွက်ဂွံကလေၚ်ပၠုပ်လမျီု သ္ဇေိုၚ်သၞောဝ် ၂၀၀၈ ကီု တုဲပၠန် သွက်ဂွံအုပ်ဓုပ်အာဍုၚ် နကဵုသၞောတ်တၠအဝဵုပၞာန် အလဵုဇကုဍေံတအ်မာန်ကီုတုဲ ကၠောန်ဗဒှ်ကၠုၚ် ပေါဲရုဲမာဲဏံရ။ ညိလေဝ်ဟွံကိတ်ညဳကဵု တၚ်ပ္တဝ်က္ဍိုပ်ပိုဲပုဟ်။ ဒှ်ဒစဵုဒစးဒၟံၚ် ညးသ္ကအ်ဂှ်လေဝ် မိက်ဂွံကဵုသ္ပရံၚ်သတိရ။
-ပ္ဍဲလတူကံက်ကေတ်ဒၟံၚ် စရၚ်မၞိဟ် ပ္ဍဲဗလးမုက်တိဂှ် နကဵုဂကောံပၠန်ဂတးတအ် ဗီုလဵု သွက်ဂွံပလန်အာတဲ နွံကီုရော။
ပေါဲရုဲမာဲဏံဂှ် နူကၟိန်ဍုၚ်နာနာတအ် ဗွဲတၟေၚ်တှ်ေ ဂကောံကၠတ်ထဝ် အမေရိကာန် ဥရောပသမဂ္ဂတအ်လေဝ် သ္ပကဵုဒ္တန်ဟွံမာန်ပုဟ်ဟီုဂှ် လလောၚ်တြးလဝ် တုဲဒၟံၚ်ရ။ တုဲပၠန် ပ္ဍဲကၟိန်ဍုၚ်ပိုဲ EAO ဂကောံရပ်လွဟ်ကောန်ဍုၚ်အရၚ်တအ် သီုဂကောံဇြဟတ်ပၠန်ဂတး PDF မပါလုပ်တအ်ဂှ် ဒဒှ်ရညိဟွံဒုၚ်တဲ လးလးပုဟ်ဂှ် လလောၚ်တြးလဝ် တုဲဒၟံၚ်ရ။ NUG, NUCC ဂကောံက္ဍိုက်က္ဍိုပ် ပရေၚ်ပၠန်ဂတးတအ်လေဝ် လလောၚ်တြးကၠုၚ်လဝ် တုဲဒၟံၚ်ရ။ လၟုဟ်ဏံတှ်ေ ဒၟာနူကဵု ပေါဲရုဲမာဲဟွံဒှ်ကၠုၚ်ဏီဂှ်ရတှ်ေ ပိုဲဂှ် ၜိုတ်သ္ပမာန် ညံၚ်ပေါဲရုဲမာဲ ဂွံဒှ်ကၠုၚ်ဟွံမာန် ကရောံညးဍုၚ်ကွာန်တအ်ကီု၊ တုဲပၠန် အတိုၚ်နဲကဲပရေၚ်ဍုၚ်ကွာန်ကီု၊ အတိုၚ်နဲကဲကလုတ်တမာန်ကီု ဂကောံက္ဍိုက်က္ဍိုပ်ပိုဲ သောၚ်ကလးရေၚ်တၠုၚ်ဒၟံၚ်ရ။ နူကဵုအကာဲအရာဏံမှ ဟွံဆုတ်ကလေၚ်တုဲ ယဝ်ရ ဆက်ကၠောန်အာ ဂတေံအတေၚ်ဏောၚ်တှ်ေ လတူနူအကာဲအရာဏံ သာတုဲ သွက်ဂွံယှုက်ထုဲကၠုၚ်ရ နွံဏောၚ်။ အကြာဏံဂှ် သွက်ဂွံပၠုပ်လမျီု သၞောတ်တၠအဝဵုပၞာန်ဍေံတအ် သွက်အဝဵုအာဏာဍေံတအ် ဂွံဆက်တန်တဴအာ ကၠောန်သ္ပဒၟံၚ်ဂှ် ဒှ်ပရေၚ်ပါဲတးလဝ် ပၟိက်ဆန္ဒညးဍုၚ်ကွာန်ပိုဲတအ်ဟေၚ်ဂှ်ရ ပရေၚ်ပလန်တဲဂှ် လောန်လတူနူဏံ သွက်ဂွံသ္ကာတ်မြဟ်ကၠုၚ်ဟေၚ်ရ နွံဏောၚ်။
-နဒဒှ်အလန်လကြဴအိုတ်ဏံ စပ်ကဵုပရေၚ်ကံက်ကေတ်ဒၟံၚ် စရၚ်မၞိဟ် ပ္ဍဲဗလးမုက်တိတုဲ မုမိက်ဂွံဆဝ်ပ္ၚုဟ် ဖ္အောဝ်ဗတိုက်ညးဍုၚ်ကွာန်တအ် နွံရော။
စပ်ကဵုပေါဲရုဲမာဲ ကံၚ်ဇြဳပၞာန်ပ္ကီုပရာပ်တအ် ကၠောန်ဗဒှ်တုဲတှ်ေ မိက်ဂွံဟီုဖ္အောဝ်ဗတိုက်ကဵု ညးဍုၚ်ကွာန်တအ်ဂှ် ပေါဲရုဲမာဲ ပိုဲသ္ပလဝ်ဒ္တန် လုပ်ကဵုသၞောဝ်ဂှ် ဒှ်၂၀၂၀ ဟေၚ်ရ။ ပေါဲရုဲမာဲ ၂၀၂၃ ဂှ် သွက်သၞောတ်တၠအဝဵုပၞာန် ဂွံဆက်တန်တဴအာ ပေါဲရုဲမာဲကၠောန်သ္ပကဵုဒၟံၚ်ဂှ် နဲလဵုသ္ပလေဝ် ဟွံလုပ်ကဵုသၞောဝ်ရဟီုဂှ် ညးဍုၚ်ကွာန်တအ် ထေက်ကဵုဒးတီလဝ် ထေက်ရ။ ဟိုတ်ဂှ်ရ ပေါဲရုဲမာဲကံၚ်ဇြဳပၞာန်ပ္ကီုပရာပ် ကၠောန်ဗဒှ် ဟွံလုပ်ကဵုသၞောဝ်ဂှ် ညံၚ်ဟွံဂွံအာစုတ်မာဲတုဲ ညံၚ်ဂွံသ္ဂုတ်သွာတ် နကဵုက္ဍဟ်ဇကုဇကုဟေၚ်ရ မိက်ဂွံဗတိုက်ဖ္အောဝ်ဏာရ။