မဝ်သဂိုဝ် – ဂျာန္နဝါရဳ(၂၁)
မဟာမိတ် သမ္မတရုယှာ ဗလာဒဳမာပူတေန် မွဲတၠဂှ် ပ္ဍဲပၞာန်လောက်ၜက်ယူကရုၚ်ဂှ် ယဝ်ရရုယှာကျဗြီုအာမ္ဂး ဒှ်ကၠုၚ်ပေါဲပၞာန် နျူကလဳယျာမာန်ဒၟံၚ်ဏောၚ်ဂှ် ကဵုကၠုၚ်လဝ်သတိ ကုမဟာမိတ်ဂကောံနေတိုဝ်ရ။
နကဵုကၟိန်ဍုၚ်ပလိုတ်တအ် ယဝ်ရပ္တိတ်ကၠုၚ်ဇြဟတ် သွက်ဂွံပလီုပလာ်ရုယှာတှ်ေ ဂၠးကဝ်ဇၞော်ဏံ စိုပ်အာလအိတ် တုဲဒှ်အာအိုတ်ဏောၚ်ဂှ် သ္ကိုပ်သ္က ဘာကျာ်အဝ်သဒေါက်သ် ရုယှာဟီုသ္ဂးလဝ်ရ။
မအရေဝ်လဟီု ရေၚ်တၠုၚ်လပါ်ပရေံဗီုဏံဂှ် ဒှ်တၠုၚ်လအာစဵုဒၞာ ဂကောံမဟာမိတ်နေတိုဝ် အမေရိကာန်က္ဍိုက်လဝ်က္ဍိုပ်တအ် သာတုဲပါလုပ်ကၠုၚ် ပ္ဍဲပေါဲပၞာန် ပ္ဍဲပေါဲကောံဓရီုဒစးဒုၚ်သဳကၠဳ သွက်မဟာမိတ်ယူကရုၚ်တအ် ဂွံထပ်ကဵု လွဟ်လက်နက်ရဂှ် ဂွံတီကေတ်ရ။
ပရေၚ်မၞိဟ်ဂမၠိုၚ် ဒှ်ဒၟံၚ်သံသယ ပ္ဍဲဗလးမုက်တိပၞာန်ဂှ် ရုယှာကျအာမာန်ရောၚ်ဂှ် ပရေၚ်ညးပါလုပ်ဂကောံအပ္ဍဲပူတေန်မွဲတၠ သ္ပစၟတ်သမ္တီ ဂှ်ဒှ်အကာဲအရာ ဝါတ်တ်ဂါတ်တ် မွဲရ။
“ပရေၚ်ကျဗြီုပါဝါနျူကလဳယျာ ပ္ဍဲပေါဲပၞာန်သာမညမွဲဂှ် ဗဒှ်ကဵု ပေါဲပၞာန်နျူကလဳယျာမာန်ရ” ဂှ် သမ္မတရုယှာတြေံ ကေတ်လဝ်တာလျိုၚ် ဒု-ဥက္ကဋ္ဌကံၚ်ဇြဳပရေၚ်ဂီုကၠီု ဒဳမဳထရဳမေတ်ဗဳဒေတ် ဟီုသ္ဂးလဝ်ရ။
သွက်ဂွံကေတ်မာန်ရုယှာတုဲ သွက်ဂွံသဳကၠဳထံက်ဂလာန် ပရေၚ်ဂကောံဍုၚ်ပလိုတ် ပ္တိတ်ဒၟံၚ်ဇြဟတ်ဂှ် နေတိုဝ်ကီု သီုကဵုက္ဍိုပ်သ္ကိုပ်ပရေၚ်စဵုဒၞာတၞဟ်သ္အာၚ်တအ် ဆဵုဂဗအာညးသ္ကအ် ပ္ဍဲဗ္ဒပ်ပၞာန်ကျာရာမ်စတုၚ် ကၟိန်ဍုၚ်ဂျာမနဳ ပ္ဍဲဂိတုဂျာန္နဝါရဳ စၟတ်တ္ၚဲ(၂၀)ဏံတုဲ အန္တရာယ်မူဝါဒညးတအ်ဂှ် ထေက်ကဵု ဒးကလေၚ်ဗ္စာရဏာဏောၚ်ဂှ် ညးထပ်ဟီုလဝ်ရ။
ယဝ်ရနေတိုဝ်ကဵု ရုယှာ ဒှ်ကၠုၚ်ပဋိပက္ခမ္ဂး ပၞာန်ဂၠးကဝ်တတိယ ဒှ်ကၠုၚ်မာန်ဏောၚ်ဂှ် ၜိုန်ရသမ္မတဂျိုဝ်ဗိုၚ်ဒါန် ဟီုကဵုလဝ်သတိကီုလေဝ် တၚ်ဟီုဂးစပ်ကဵု မိက်ဂွံပလီုပလာ် ကၟိန်ဍုၚ်ရုယှာဂှ်မ္ဂး အမေရိကာန် ဟီုဂးတးပါဲလဝ်ရ။
ဆဂးဂှ် အရီုဗၚ်ပရေၚ်ပၞာန် အမေရိကာန် ကေုာံဥရောပ မၞုံကဵုၚုဟ်မးဒဝ်ဠာ အပံၚ်လၟိဟ်ဗဳလျာန် ဗွဲမဂၠိုၚ်တအ်ဂှ် ဒှ်ထ္ၜးဒၟံၚ် အကာဲအရာ ရုယှာ ဒးဆေၚ်ဒၟံၚ်မုက်ကဵု နေတိုဝ်တပ်ပ်ရဂှ် မဟာမိတ်ပူတေန်ဂမၠိုၚ် ဟီုသ္ဂးဒၟံၚ်အိုတ်ရ။
သ္ကိုပ်သ္ကဘာကျာ်အဝ်သဒေါက်သ်ရုယှာ ကေၚ်ဓမံက်ထ္ၜးလဝ် ဗီုပြၚ်ညံၚ်ရဴ ဒဒှ်အခိၚ်ဒးဂွိၚ်ဂွာဲ သွက်ကၟိန်ဍုၚ်ဂှ်လေဝ် ဟီုတွံလဝ်ဂှ်မ္ဂး ပရေၚ်ပတိတ်ဇြဟတ် သွက်ဂွံပလီုပလာ် ကၟိန်ဍုၚ်ရုယှာဂှ် ဒှ်ဗစိုပ်ဒၟံၚ်လအိတ်ကၞောတ် ဂၠးကဝ်ဇၞော်ရ။
စၟတ်သမ္တီလဝ် နဒဒှ်ပေါဲဗတိုက်ကဵု ဂကောံဍုၚ်ပလိုတ် မဂၠာဲဒၟံၚ်သၞ ပ္ဍဲပရေၚ်ချဳဒရာၚ်ပၞာန်တၟေၚ် ဍုၚ်ယူကရုၚ်ဂှ်တုဲ သွက်ဂွံစဵုဒၞာမၚ်မွဲဇကုဇကုဂှ် သုၚ်စောဲအာ နဲကဲဂၠံၚ်တရဴၜိုတ်နွံ သီုဖအိုတ်ဏောၚ်ဂှ် ရုယှာ ဟီုသ္ဂးလဝ်ရ။
Ref,Reuters