ကွာလာလာမ်ပူ၊ ဂျာန္နဝါရဳ (၂၄)
ပ္ဍဲကဵုတွဵုရး မလေဝ်ယှာ (၅) တွဵုရးဂှ် ဗြဲဂူဟွံပိုတ်သ္ကုတ်တံ က္တဵုဒှ်ဒၟံၚ်တုဲ တွဵုရး ဗြဲဆက်ဂူအာ စဵုကဵုတ္ၚဲဗုဒ္ဓဝါတံဂှ်လေဝ် ဌာနစမ်ၜတ်အကာဲအရာဗြဲကျာ ဍုၚ်မလေဝ်ယှာတံ လလောၚ်ပ္တိတ်လဝ်ရ။
တွဵုရး ဗြဲဂူဟွံပိုတ်သ္ကုတ် ဆက်က္တဵုဒှ်အာတံဂှ် ဒှ်တွဵုရး တဳရာန်ဂါနူ၊ ပါဟာန်၊ ဂျဵုဟဝ်၊ သာရာဝက် ကေုာံ သာဗာတ်တံဂှ် ဂွံတီကေတ်ရ။
အတိုၚ်ပရိုၚ် ဗြဲဂူဟွံပိုတ်သ္ကုတ် မလလောၚ်ပ္တိတ်လဝ် ပ္ဍဲကဵုတ္ၚဲစန် ပြဟ်ဟ်ဂှ်မ္ဂး ပ္ဍဲကဵုတွဵုရး ပါဟာန်၊ ကူအာန်တာန်၊ ပဳကာန် ကေုာံ ရုမ်ပေန် ဍုၚ်မလေဝ်ယှာတံဂှ်လေဝ် ဂူမာန်တုဲ ပ္ဍဲကဵုတရာန်ဂါနူ၊ ဒါန်ဂါန် ကေုာံ ကဳမာမာန်တံဂှ်လေဝ် ဂူမာန်ရောၚ်ဂှ် လလောၚ်ပ္တိတ်လဝ်ရ။
ပ္ဍဲကဵုဒၞါဲဒကုတ် ဍုၚ်မလေဝ်ယှာဗွဲမဂၠိုၚ်ဂှ် ဟိုတ်နူဍာ်ဇၞော်ဍာ်ကလိုပ်တုဲ အပံၚ်မၞိဟ် (၆၆၇၁၈) တၠ ဒးဆုဲပြံၚ်လဝ်တုဲ မၞိဟ် (၅) တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး ပ္ဍဲဂိတုဂျာန္နဝါရဳ (၁၇) တေံရ။
ပၞောဝ်ကဵုခတှ်ေဒေသ လ္ပာ်ဗၟံက်တ္ကအ် မဒးဇီုကပိုက်လဝ် ပရေံအိုတ်တံဂှ် နူကဵုကဳလာန်တာန်ဂှ် လၟိဟ်မၞိဟ် (၂၆၆၃၀) တၠ၊ နူကဵုတရာန်ဂါနူဂှ် လၟိဟ်မၞိဟ် (၃၉၁၀၈) တၠတံဝွံလေဝ် ဒးဆုဲပြံၚ်လဝ် သေန်တာပရေၚ်ဟံၚ်ပြာ်ဘဲဍာ်တံတုဲယျဂှ် ဒုၚ်လဝ်စဳရေၚ် ပ္ဍဲကဵုလိက်ပရိုၚ် ဗာနာမ်မာ အလဵုအသဳမလေဝ်ယှာပိုၚ်ဂှ်ရ။
ပ္ဍဲကဵုမၞိဟ်မဒးချိုတ်အာလဝ် (၅) တၠဂှ် ကောန်ၚာ်အာယုက် (၁၅) ဂိတုမွဲတၠလေဝ် ပါလုပ်ဂှ် သၟိၚ်တၠတံ သ္ပဒတန်လဝ်ရ။
ဍာ်ဇၞော်ဍာ်ကလိုပ် အပ္ဍဲဍုၚ်မလေဝ်ယှာတံဂှ်ဝွံ လၟေၚ်သၞာံ လေပ်က္တဵုဒှ်တုဲ ကျာမုဟ်သုန်ဒိုဟ်အဂၞဲ မပိုက်တဴ အပ္ဍဲဂိတုနဝ်ဝေမ်ဗာ ကဵု ဂိတုမာတ်တံဝွံ သ္ကဵုက္တဵုဒှ် ဗြဲရိုပ်ဂူတံရောၚ်ဂှ် ဌာနစမ်ၜတ်အကာဲအရာဗြဲကျာမလေဝ်ယှာတံ လလောၚ်ပ္တိတ်လဝ်ရ။
လၟေၚ်ဒဒှ်ဍာ်ကလိုပ် သၞာံတုဲတေံ မဒှ်ဍာ်ဇၞော်ဍာ်ကလိုပ် ပ္ဍဲဍုၚ်မလေဝ်ယှာ အလန်လက္ကရဴအိုတ်တံဂှ် မၞိဟ်ကဵုဒါဇြိန် ချိုတ်အာလဝ်တုဲ လၟိဟ်မၞိဟ် (၆၁၀၀) ပြၚ် ဒးဆုဲပြံၚ်လဝ်တုဲ ၚုဟ်မးအပံၚ် မဒးဆောံလေၚ်အာဂှ် နွံလဝ် စဵုကဵု (၆ ဒဿမ ၁) ဗဳလျာန်ရ။
Ref; Straits Times