မတ်မလီု၊ ဂျာန္နဝါရဳ(၂၄)
ကဝ်မတဳပရေၚ်ပံၚ်ကောံရေၚ်တၠုၚ် ကေၚ်ကာဍုၚ်မန် (MSICC) ဒက်ပ္တန်လဝ် ပ္ဍဲသၞာံ ၂၀၂၁ အခိၚ်ပၞာန်သီအဝဵုဂှ် အခိၚ်ကာလသီအဝဵု ကြပ်ပေၚ်ကၠုၚ် ပွိုၚ် (၂) သၞာံဂှ် ပြံၚ်သၠာဲဒက်ပ္တန်ကၠုၚ် နဒဒှ်ကံၚ်ဇြဳဖေတ်ဒရေဝ်ဍုၚ်မန်ရ (MSFC)ရဂှ် လလောၚ်တြးလဝ်ရ။
ကံၚ်ဇြဳဖေတ်ဒရေဝ်ဍုၚ်မန်(MSFC)ဂှ် စၟတ်သမ္တီလဝ် နဒဒှ်ယူနေတ်ဖေတ်ဒရေဝ်ဍုၚ်မန် သ္ပသ္ဇိုၚ်ကဵုတွဵုရးရဂှ် လလောၚ်တြးလဝ် ကြဴနူပေါဲသဳကၠဳ ကံၚ်ဇြဳဖေတ်ဒရေဝ်ဍုၚ်မန် MSFC မကၠောန်ဗဒှ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ ၂၂ အလန် ပထမဂှ်ရ။
အတိုၚ်အကာဲအရာ ပရေၚ်ဍုၚ်ကွာန်အခိၚ်လၟုဟ်ဏံ ဒၟာနူနွံပၟိက်ကၠုၚ်ကဵု ဂကောံယူနေတ်ဖေတ်ဒရေဝ်တွဵုရး သ္ပစၞးကဵု ကောန်ဍုၚ်ကွာန် တွဵုရးဍုၚ်မန် ကေုာံကောန်ဂကူမန် ဇြဟတ်တက်တဴဒၟံၚ်ဂှ်ရ ပ္ဍဲဂိတုဂျာန္နဝါရဳ စၟတ်တ္ၚဲ (၁၅) နူကဵု MSICC ဂှ် သွက်ဂွံပြံၚ်သၠာဲဒက်ပ္တန် နဒဒှ် ကံၚ်ဇြဳဖေတ်ဒရေဝ် တွဵုရးဍုၚ်မန် ဖျေံကၠုၚ်လဝ်သ္ဂုတ်သွာတ်ရဂှ် ဟီုသ္ဂးလဝ်ရ။
ပ္ဍဲပေါဲသဳကၠဳအလန်ပထမဂှ်မ္ဂး ဂကောံဇြဟတ်ပရေၚ်ဍုၚ်ကွာန်ကီု၊ ဂကောံဇြဟတ်ကောန်ဍုၚ်အရၚ် (EROs)ကီု၊ ဂကောံဇြဟတ်ညးအရာပ်မှာဇန်တအ်ကီု၊ ဂကောံညးဗြဴကီု၊ ဂကောံသၟတ် နူကဵုတွဵုရးဍုၚ်မန်ကီု၊ ကောန်ဂကူမန် စိုပ်ဒၟံၚ်ဍုၚ်သ္အာၚ် ကေုာံကောန်ဂကူပအိုဝ်ဂမၠိုၚ် ညးစၞး (၈၀) တၠပြၚ်တိုန်စိုပ်လဝ်ရ။
ပ္ဍဲပေါဲသဳကၠဳဂှ် သ္ပကၠုၚ်လဝ်ဒ္တန် တၚ်ရန်တၟံပရေၚ်ဍုၚ်ကွာန်၊ ဗီုပြၚ်ဗလးတိပ္ညုၚ်ထ္ၜးဂၠံၚ်တရဴ ကေုာံသ္ဇိုၚ်သၞောဝ်ဒက်ပ္တန် (MSFC)တအ် မာန်ကၠုၚ်လဝ်တုဲ ပ္ဍဲကာလပရေၚ်ပၠန်ဂတး/ပ္ဍဲကာလအကြာဏံ သွက်ဂွံပကောံပကေဝ်အာ ဂကောံဇြဟတ်ဒစဵုဒစးကဵု သၞောတ်တၠအဝဵုပၞာန် ပ္ဍဲတွဵုရးဍုၚ်မန်ဂှ် လးဖျေံကၠုၚ်လဝ်ရ။
သွက်ဂွံဒ္ဂေတ်လ္ၚတ် ပ္ဍဲမွဲကာလပရေၚ်ပၠန်ဂတး/ကာလအကြာဏံ အစဳအမာန် ပရေၚ်ချူခၞံသၞောဝ်၊ ပရေၚ်စဳရေၚ်သၞောဝ် ကေုာံ ပရေၚ်အုပ်ဓုပ် မဒှ်အာဏာပိတန်ဂှ် လးဖျေံမာန်ကၠုၚ်လဝ်တုဲ ပ္ဍဲပရေၚ်ဗတိုက်သရိုဟ် တၠအဝဵုပၞာန်ဂှ် ဂကောံဇြဟတ် မၞုံပ္ဍဲတွဵုရးဍုၚ်မန်သီုဖအိုတ် သွက်ဂွံပကောံပကေဝ် ညံၚ်ဂွံပါလုပ်ကၠုၚ်ရ။
သ္အာၚ်နူဂှ်ပၠန် ဒက်ပ္တန်ကၠုၚ် ကံၚ်ဇြဳဖေတ်ဒရေဝ်ဍုၚ်မန် ညးလုပ်ကံၚ်ဇြဳ (၂၅) တၠပါလုပ်ဒၟံၚ်ဂှ် မာန်ကၠုၚ်လဝ်တုဲ နူကဵုကံၚ်ဇြဳဂှ် သွက်ဂွံရေၚ်တၠုၚ် ညံၚ်ဂွံဒ္ဂေတ်လ္ၚတ်အဝဵုပိတန် အခေါၚ်ပိုၚ်ပြဳတွဵုရးဇကုဇကုမာန် ဖျေံကၠုၚ်လဝ် သ္ဂုတ်သွာတ်ရဂှ် လလောၚ်တြးလဝ်ရ။
ပ္ဍဲပရေၚ်ဗတိုက်သရိုဟ် သၞောတ်တၠအဝဵုပၞာန် ကေုာံသၞောတ်တၠအဝဵုအလုံအိုဿီု အခေါၚ်ကံကုသဵုဇကု ဇကုဂွံဖန်ဖက်ကေတ်မာန် ကေုာံ ပရေၚ်ဒက်ပ္တန် ကၟိန်ဍုၚ်ဖေတ်ဖေတ်ဒရေဝ်ပံၚ်ကောံတအ်ဂှ် နကဵုကောန်တွဵုရးဍုၚ်မန် ကောန်ဂကူမန်ဂမၠိုၚ် ပံၚ်တောဲကဵု ကံၚ်ဇြဳဖေတ်ဒရေဝ်ဍုၚ်မန်တုဲ သွက်ဂွံလုပ်အာပေါဲဗတိုက်မွဲစွံဂှ်လေဝ် ဆဝ်ပ္ၚုဟ်လဝ်ရ။
ပရိုၚ်-သြၚ်လောန်တိုၚ်(မ်)