ကြုၚ်ဒဵု ၊ ဂျာန္နဝါရဳ (၂၄)
ပ္ဍဲပွိုၚ်ဍုၚ်ကြုၚ်ဒဵု တိဍာ်ဗော်သွးကောန်ဂကူကရေၚ် KNU ဒပ်မဟာ(၆)ဂှ် ပ္ဍဲမွဲၜါတ္ၚဲဏံ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ မၞိဟ်ဗြဴ(၁)တၠ ဒးချိုတ်အာတုဲ ဂွံလဝ်ဘဲဝပ် (၂)တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၀)တေံဂှ် ပ္ဍဲပွိုၚ်ဍုၚ်ကြုၚ်ဒဵု ခရိုၚ်ဒူပလာယာ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ နူကွာန်မျေနဳကုမ်မွဲတၠ ဇီုကပိုက်ဒး မကမ်လွဟ်ဇၞော်တုဲ ချိုတ်အာလဝ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ စၟတ်တ္ၚဲ (၂၁)အခိၚ်ဗ္တံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်ဏာကြာန်န်တုဲ လွဟ်ဇၞော်ဒတုံပြဟ်စှ်ေ ပ္ဍဲကွာန်နောၚ်တလာဂှ် သ္ၚိဒၟံၚ်(၂)မ ဒးခရိုဟ်စှ်ေ လီုလာ်လဝ်တုဲ ကောန်ၚာ်သၟတ်မွဲတၠကီု သီုညးအာယုက်ဇၞော်မွဲတၠ ဇီုကပိုက် ဂွံလဝ်ဘဲဝပ်ရ။
ပ္ဍဲအကြာမွဲၜါတ္ၚဲဏံ နူကဵုတံဒပ်ကံၚ်ဇြဳပၞာန် မၞုံပ္ဍဲဍုၚ်ကြုၚ်ဒဵုဂှ် ပန်ဖျေံဏာဒၟံၚ်လွဟ်ဇၞော် ပ္ဍဲလပါ်ကွာန် မၞုံဗ္ဒာဲဍုၚ်ကြုၚ်ဒဵုတအ် ဇၟာပ်ပ်ဗ္တံကီု ဒၟာနူဒပ်ကံၚ်ဇြဳပၞာန် လုပ်စိုပ်ချဳဒရာၚ်ဒၟံၚ်ပၞာန်တုဲ ညးဒေသ ကောန်ညးဍုၚ်ကွာန်တအ် ဒးဓလေတ်ပါဲဒဴဒၟံၚ်ကီု ဒပ်ကံၚ်ဇြဳပၞာန် ထဴကဵုကွာန် မၞုံဗ္ဒာဲဍုၚ်ကြုၚ်ဒဵုတအ် မပ္တံကဵုကွာန်မိဂလုံ၊ ကာန်နဳ၊ ကအ်ကျာ် တအ်ဆုဲပြံၚ်ဒၟံၚ်ကီုရဂှ် ဂွံတီကေတ် နူညးဒေသတအ်ရ။
ဗ္ဒပ်ဗၠာဲသၟိၚ်တိဍာ်ကအ်ဗိန် မၞုံပ္ဍဲပွိုၚ်ဍုၚ်ကြုၚ်ဒဵု KNU ဂှ် ပ္ဍဲသတ္တာဟတုဲကၠုၚ်တေံ ဂကောံဇြဟတ်ပၠန်ဂတးတအ် လုပ်စိုပ်ဗတိုက် စံၚ်ပလီုလဝ်တုဲ ပရေၚ်ပန်ပှော် က္တဵုဒှ်ကၠုၚ်လဝ်ရ။
ကြဴနူဂှ်ကရောၚ်ပၞာန်ကံၚ်ဇြဳ ဟိုတ်နူလုပ်စိုပ်ချဳဒရာၚ်ကၠုၚ်ပၞာန်တုဲ ဒၟာနူဂွိၚ်ဖေက် ပေါဲဗတိုက်ၜါလပါ် က္တဵုဒှ်ကၠုၚ်ဂှ်ရ ညးဒေသ ဂြိပ်ဒဴပါဲဓလေတ်ဒၟံၚ်တအ်လေဝ် နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)