လဂုၚ် – ဂျာန္နဝါရဳ(၂၄)
သ္ဂံၚ်ဗတိုက်လဝ် ရုပ်အုပ်ဓုပ်အရာပ် (၁၄) ပွိုၚ်ဍုၚ်ဥက္ကလာပသၠုၚ်ကျာ ရးဒေသဇၞော်လဂုၚ်ဂှ် သၟာကမၠောန်ဆေၚ်စသုၚ်တအ် ဗက်ရပ်တုဲ ၜုၚ်တက်ပြိုက်ဂစိုတ်လဝ်ဂှ် ဒးကလေၚ်ကေတ်တာလျိုၚ်ဏောၚ်ဂှ် ဂကောံဒပ်ဒမၠုက်ဍုၚ်ဇၞော် ဟီုသ္ဂးလဝ်ရ။
ပရောဒဒှ်ဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၁)တေံ ရုၚ်အုပ်ဓုပ်အရာပ် မၞုံဒၟံၚ်ဗ္ဒာဲဆေၚ်စသုၚ် ၚိုဲတောၚ်ဂှ် သၟတ်UG ၜါတၠ ကၠဟ်ပၠုပ်စုတ်ဗုမ်တုဲ အခိၚ်ဂြိပ်တိတ်ဂှ် ဒၟာနူသၟာကမၠောန်ဆေၚ်ဂှ် ဗက်ရပ်ကဵုလဝ်ဂှ်ရ ရပ်ဂွံလဝ်မွဲတၠတုဲဂှ် ဒးဒုၚ်ၜုၚ်တက် ပြိုက်ဂစိုတ်လဝ်ကဵု သၟာကမၠောန်တအ်ရ။
ဆေၚ်စသုၚ်ၚိုဲတောၚ်ဂှ် ဒှ်ဆေၚ်သၞာဲဒဴဒပ်ပၞာန်တြေံ ပိုၚ်ပြဳလဝ်တုဲ နူအခိၚ်စသီအဝဵုတေံဂှ် ဒှ်ဆေၚ်ဗ္စဖျုၚ်ဒၟံၚ် ကောန်ပၞာန်ကဵု ဗၠာဲသၟိၚ်သၟဝ်တဲကံၚ်ဇြဳပၞာန် ပန်ပှော်ပါ်ပရးဒၟံၚ် ညးဍုၚ်ကွာန် ထ္ၜးဒၟံၚ်ဆန္ဒတအ် သီုဟွံဒးကဵုၚုဟ်မးရ။
“မိက်ဂွံဟီုဂှ်တှ်ေ ပရောဒဒှ် ဒှ်အာလဝ်လၟုဟ်ဏံ ဇေတ်တ်တေံ ညိလေဝ်ဒှ်ဟွံထေက်ရ။ သရောပ်ထောံသီုဖအိုတ်တုဲ ဟွံမိက်ဟီုပုဟ်၊ ညးဆေၚ်စပ်ကဵု တၠခန္ဓတအ်၊ ညးထဴကဵုဇြဟတ်တအ်ဂှ် ဒးကလေၚ်ကေတ်တာလျိုၚ် လတူကမၠောန်ပြဝဏံဏောၚ်၊ လတူဏံ ဍေံတအ် ဒးကလေၚ်ကေတ်တာလျိုၚ်ဏောၚ်။ အရာဏံ မိက်ဂွံဟီုချိုတ်တ်ပၠိုတ်တ်ရ” ဂှ် ညးတာလျိုၚ် Yangon UG Association (YUA) သယျာဂျောၚ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
သ္အာၚ်နူဂှ်ပၠန် နကဵုညးဍုၚ်ကွာန်တအ် သွက်ဂွံရီုဗၚ်ကဵု သ္ဂံၚ်ပၠန်ဂတးဍုၚ်ဇၞော် နူကဵုလပါ်ဇကုသၟဟ်အစောံကီု ပရေၚ်ထံက်ဂလာန်၊ ပရေၚ်ပတှ်ေစှ်ေစိုတ် ပရေၚ်ပါလုပ်ရေၚ်တၠုၚ်နွံမှ ကမၠောန်သၟာပရေၚ်ပၠန်ဂတးဍုၚ်ဇၞော်တအ် သာတုဲ စိုပ်တရဴဏောၚ်ဂှ် ညးဟီုသ္ဂးလဝ်ဏီရ။
စပ်ကဵုပရေၚ်ပရော ၜုၚ်တက်ပြိုက်ဂစိုတ်လဝ် သ္ဂံၚ်ပၠန်ဂတးဍုၚ်ဇၞော်ဂှ်တုဲ ညးဍုၚ်ကွာန်တအ်ဟွံပေၚ်ဒၟံၚ်စိုတ်တုဲ သွက်ဂွံဗကပ်ဗဗေၚ်ကဵု ဆေၚ်စသုၚ်ဂှ် ပရေၚ်ဟီုဂးဒၟံၚ် နွံကၠုၚ်ရ။
ပ္ဍဲအခိၚ်လၟုဟ်ဏံဂှ် ကၟာတ်လဝ် ဆေၚ်စသုၚ် ၚိုဲတောၚ်တုဲ ပ္ဍဲဗွိုၚ်ဇိုၚ်ကရပ်ဗ္ဒာဲဂှ် ကွဳစက်ဗၠာဲသၟိၚ်တအ် ဂေတ်ဒၟံၚ်တုဲ ဖျေံလဝ်ကၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“ဍေံတအ်ဟွံပြေစိုတ်တုဲ ကလေၚ်ကၠုၚ်ကၠောန်ပၠန်ဏောၚ် ထေၚ်ရ။ ဗၠာဲသၟိၚ်တအ်မၚ်ဒၟံၚ်ဂှ် ဆဵုမံၚ်ရ။ မၚ်ဒၟံၚ်ကၚ် ကဵုကယျိုၚ်ညးအရာပ်လေဝ် နွံရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ဂံၚ်ပၠန်ဂတးဍုၚ်ဇၞော်တအ်ဂှ် ဗတိုက်ဖ္အောဝ်လဝ် သွက်ဂွံပါဲဓလေတ် ဟွံဆက်ဆောံကဵု ဂကောံ ပူဂဵုဆေၚ်ဆက်ကဵု ကံၚ်ဇြဳပၞာန်တုဲ သွက်ဂွံဒစဵုဒစးကဵု ကပေါတ်ဒပ်ပၞာန် ကၠောန်ပ္တိတ်ဂှ် ဗတိုက်ဖ္အောဝ်လဝ်ရ။
ဂကောံကံၚ်ဇြဳပၞာန်ကဵု ဂကောံသၟဝ်တဲကံၚ်ဇြဳပၞာန်တအ် ရပ်ကေတ် စၟဳစၟတ်ဒၟံၚ် သ္ဂံၚ်ပၠန်ဂတးဍုၚ်ဇၞော်လ္ဂုၚ် ကၠေတ်ကၠက်ကၠုၚ်ဒၟံၚ်တုဲ ဗက်ဒၟံၚ်ဒၞာဲဇိုၚ် CCTV တုဲ ပရေၚ်ရပ်စပ်ဒၟံၚ် ဂၠိုၚ်အိုတ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ