ကျာ်ထဝ်၊ ဂျာန္နဝါရဳ (၂၄)
ဇြေဝ်လဳဖေတ်ဗော် အံၚ်ဆာန်ဨ ဒၟံၚ်ကွာန်ကအ်ထေန်၊ ပွိုၚ်ဍုၚ်ကျာ်ထဝ်ဂှ် ဒးဒုၚ်ရပ်လဝ်တုဲ ဒးဒုၚ်ပံက်လဝ်ဂဗုတ် နကဵုၝောံပိုဒ် ၅၀၅(က) ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၂၂) လဒေါဝ်တ္ၚဲဂှ် အခိၚ်အံၚ်ဆာန်ဨ ကလေၚ်စဴကၠုၚ်သ္ၚိဇကု မၞုံပ္ဍဲကွာန်ကအ်ထေန် နူကဵုပျေန်ဥူလွေန် ဂကောံကံၚ်ဇြဳပၞာန် ကၠုၚ်ရပ်ကော်ဏာလဝ်ရဂှ် သ္ဂးလဝ်ရ။
“နူတနေံတေံ နူတိတ်မံၚ်တရဴ ဍေံကလေၚ်စဴစိုပ်ကၠုၚ်သ္ၚိ ဟွံလအ်ဏီပုဟ် ဒးဒုၚ်ရပ်လဝ်ရ။ ဒးအံသဝ်မွဲဂှ်တှ်ေ ဍေံစိုပ်ကၠုၚ်သ္ၚိ ဟွံလအ်ပုဟ် ဒးဒုၚ်ရပ်ဏာဟီုတှ်ေ ညးဂှ်ကဵုလဝ် ပရိုၚ်ရောဂှ် ဒးအံသဝ်ရ။ လၟုဟ်တှ်ေ ပံက်လဝ်ဂဗုတ် ၅၀၅ ရ။ ဂွံမိၚ်လဝ် ပ္ဍဲကဵုဗ္ဒပ်ဗၠာဲသၟိၚ်ကျာ်ထဝ်ရ။ သှ်ေနူဂှ်တှ်ေ ဟွံတီရပုဟ်” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲအခိၚ် ပၞာန်စသီအဝဵုတေံ ကိုဝ်အံၚ်ဆာန်ဂှ်တှ်ေ ပါလုပ်လဝ် ပ္ဍဲပေါဲထ္ၜးဆန္ဒ ပရေၚ်ဒစဵုဒစးတၠအဝဵုပၞာန် ဗီုညးတၞဟ်တအ်ကီုဂှ်ရ ဒှ်ညး ဒးဒုၚ်စောဲလဝ်ဂဗုတ် ၅၀၅(က) နူလပါ်ကံၚ်ဇြဳပၞာန်ရ။
ပ္ဍဲအခိၚ်ပေါဲထ္ၜးဆန္ဒဂှ် ကိုဝ်အံၚ်ဆာန် ပါဲဓလေတ်အာလဝ် လပါ်ဍုၚ်သေံတေံတုဲ သွံဒၟံၚ်ဖျာပ္ဍဲအောန်လာၚ်၊ တက်ဒၟံၚ်ကဝးဇာတ်ဒမၠေံတအ်ရ။
ကၠာနူဟွံဂွံဒးဒုၚ်ရပ်ဏီ ၜိုတ် (၅)တ္ၚဲဂှ် အခိၚ်ကိုဝ်အံၚ်ဆာန် ကလေၚ်စဴကၠုၚ် နူတက်လလောၚ်တြး ပ္ဍဲပျေန်ဥူလွေန်ကဵု အၚ်ဝဂှ် ဒးဒုၚ်ရပ်ကၠုၚ် ဗီုလၟုဟ်ဏံရဂှ် ဟီုသ္ဂးလဝ်ရ။
ပ္ဍဲပွိုၚ်ဍုၚ်ကျာ်ထဝ် အခိၚ်ပၞာန်သီအဝဵုဂှ် ညးထ္ၜးဆန္ဒတအ်ကီု သီုကဵုညးချူတြး ပရေၚ်ဒစဵုဒစးကဵု တၠအဝဵုပၞာန် ကေုာံညးထံက်ဂလာန်ကဵု NUG၊ PDF တအ် ကံၚ်ဇြဳပၞာန် ဗက်ရပ်ဒၟံၚ် အဆက်ဆက်ရ။
ချာန်နေဝ် ထံက်ဂလာန်ကဵု ကံၚ်ဇြဳပၞာန်တအ်လေဝ် ကၠောန်သ္ပဒၟံၚ်ပရေၚ်ကဵုဇြဟတ်ဓရိုဟ် သွက်ဂွံရပ် သ္ဇိုၚ်ဝန် CDM ကီု၊ တၠကမၠောန် ကေုာံညးချဳဒရာၚ်ကတိုၚ်ကၟဟ်တအ် အဆက်က်ရဂှ် ဂွံတီကေတ်ရ။
သ္အာၚ်နူဂှ်ပၠန် ညးထံက်ပၚ်PDF ညးဆေၚ်ဆက်ကဵု PDF ဂးတုဲ ရပ်ကေတ်လဝ် သၟာကမၠောန်ပရေၚ်ပိုန်ဒြပ် ကေုာံကောန်ဍုၚ်ကွာန် ညးဒေသဂမၠိုၚ် ဟွံအောန်နူ (၅၀) တၠနွံတုဲ အာတ်ကေတ်သြန်တုဲ ကလေၚ်ဗလးကဵုဂှ်လေဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)