မတ်မလီု – ဂျာန္နဝါရဳ(၂၅)
ပြသၞာပရေၚ်ဍုၚ်ကွာန်ဂှ် ၜိုန်ရမိက်ဂွံပသောၚ် ပ္ဍဲဝိုၚ်ခုၚ်ကီုလေဝ် ညံၚ်ဂွံဒှ်ကၠုၚ် အကာဲအရာရပ်လွဟ်တုဲ ဂွံဒးတဝ်စၞေဟ်ဂှ် က္ဍိုပ်သ္ကိုပ်ပၞာန်ဗၟာတအ် ဓရိုဟ်ဗစိုပ်ဒၟံၚ်ရဂှ် သမ္မတယာယဳ အလဵုအသဳပရေၚ်ညဳသၟဟ်ကောန်ဂကူ ဒူဝါလယှဳလ ဟီုသ္ဂးလဝ်ရ။
ပ္ဍဲကောံဓရီု အလဵုအသဳပရေၚ်ညဳသၟဟ်ကောန်ဂကူ မရနုက်ကဵု(၄)ဝါ မကၠောန်ဗဒှ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၂၄) အခိၚ်နူဂယးဂှ် ဟီုသ္ဂးကၠုၚ်လဝ် သာ်ဏံရ။
“ဇာတ်စလှ်ေလဝ်တုဲ ညံၚ်ဂွံတုဲဒှ် ဒးလှ်ေဏောၚ်ဂှ် မိက်ဂွံဟီု ပိုတ်တ်သ္ကုတ်တ်ရ။ ပၞာန်ပၠန်ဂတးပိုဲဂှ် ညံၚ်ဂွံအံၚ်ဇၞး လတူနူဏံလေဝ် ပ္တိတ်အာဇြဟတ်ဏောၚ်။ သွက်ပေါဲဗတိုက် ဗစိုပ်ဒတုဲလေဝ် ဒးပလေဝ်ပလေတ်လဝ် သၞောတ်ဗ္ၜတ်စှ်ေစှ်ေ အရာရာအိုဿီု သီုဖအိုတ်ဏောၚ်။ ညးဍုၚ်ကွာန်ပိုဲ ဒုၚ်ကျထောံဟွံဂွံပုဟ်” ဂှ် သမ္မတ NUG ယာယဳ ဒူဝါလယှဳလ ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲကာလ ပွိုၚ်(၇၀) သၞာံပြၚ်လောန်ကၠုၚ်တေံဂှ် ညံၚ်ဂွံဗၠးတိတ် နူသၟဝ်တဲဖေတ်သေတ်ဂျပါန်ကဵု ကိုဝ်လိုဝ်နဳအေၚ်္ဂလိက်တအ်ဂှ် ရုန်တိတ်မာန်ကၠုၚ်လဝ်တုဲရ။ လၟုဟ်ဂှ်တှ်ေ ဒှ်ဒၟံၚ်အကာဲအရာ သွက်ဂွံဗတိုက်သရိုဟ် ဒပ်ပၞာန်ဖေတ်သေတ် သ္ပဗိုလ်အုပ်ဓုပ်ဒၟံၚ် ဂကူဇကုကဵုဇကုရဂှ် ဟီုသ္ဂးလဝ်ဏီရ။
ပၞာန်ပ္ဍဲဍုၚ် ကၟိန်ဍုၚ်ဗၟာလၟုဟ်ဂှ် ဒှ်ကၠုၚ်ဒၟံၚ် လအ်လလောန်ကီု ပ္ဍဲပရေၚ်ပၠန်ဂတးက္ညၚ်ဂှ် ပ္ဍဲအကြာအရာပရေံပရေံဂှ် အရာခိုဟ်ဟ်တအ်လေဝ် ဂွံကၠုၚ်လဝ် နွံဒၟံၚ်ရဂှ် ဂွံတီကေတ်လဝ်ရ။
ပ္ဍဲအခိၚ်ကၠာတေံဂှ် က္ဍိုပ်သ္ကိုပ် တးပါဲကၠုၚ်လဝ် ပရေၚ်ပၠန်ဂတးရပ်လွဟ် ၜိုန်ရနွံကၠုၚ် ဗွဲမဂၠိုၚ်ဂၠေၚ်ကီုလေဝ် ပ္ဍဲကာလပၠန်ဂတးက္ညၚ် လၟုဟ်ဏံဂှ် သွက်ဂွံဗတိုက်သရိုဟ် ဗပိုတ်ရိုဟ်ကၞက် တၠအဝဵုပၞာန်ဂှ် လၟေၚ်ဂၠံၚ်တရဴရပ်လွဟ်ဟေၚ် ဒးသ္ပလဝ်ဗဟိုဝ်ရဂှ် ပရေၚ်ဆဵုဂဗဏံ ဂွံဆဵုဂဗကၠုၚ် နဇိုၚ်နတဲတုဲရဂှ် သမ္မတ NUG ယာယဳ ဟီုသ္ဂးလဝ်ရ။
သွက်ပေါဲဗတိုက် ပရေၚ်ကုတ်ဗပိုတ်ရိုဟ်ကၞက် တၠအဝဵုပၞာန်ဂှ် သွက်ဂွံသၠုၚ်ပတိုန်လဝ် ယွီုပၠန်ဂတးကီု၊ နူကဵုပရေၚ်ဒုၚ်ဒဝ်ပၠန်ဂတးဂှ် ဒးပတဝ်ဏာက္ဍိုပ်ကဵု ပေါဲဗတိုက်ဗစိုပ်ဒတုဲမာန်ဟေၚ်မှ ဂွံစၟဳပတှ်ေကေတ် ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳတၟိမာန်တုဲ ညံၚ်ဂွံစိုပ်တိုၚ်ပ္ကဴဂှ် သွက်ဂွံပရဟ်ဒုၚ် ပလေဝ်ပလေဝ်လဝ် သီုညးဖအိုတ်ဂှ်လေဝ် ကဵုလဝ်သတိရ။
ပရိုၚ်-သြၚ်လောန်တိုၚ်(မ်)