လဂုၚ်၊ ဂျာန္နဝါရဳ(၂၅)
ပ္ဍဲဍုၚ်လဂုၚ် ပွိုၚ်ဍုၚ်ဗွဲမဂၠိုၚ်တအ်ဂှ် ဂကောံဖောံဗြေဝ်ဍိုပ်ဍဴ ဟွံဂွံပရဟ်ဒုၚ် ကဵုလဝ်သမ္တီမွဲသာ် ဟိုတ်နူကုတ်ဗပိုတ်လဝ် ပရေၚ်ပါ်ပရအ် ကဵုဒၟံၚ်ဍာ်တုဲ ဍာ်ရပ်ဍာ်ဟုံ ပိုတ်ဒကုတ်အာတုဲ ဒးဆဵုဂဗဒၟံၚ်ကဵုတၚ်ခက်ခုဲရဂှ် ညးဒေသဂမၠိုၚ် ဟီုသ္ဂးလဝ်ရ။
ပွိုၚ်ဍုၚ်ဍာ်ပိုတ်အာတအ်ဂှ် ဒှ်ပွိုၚ်ဍုၚ်ပါန်ပေဝ်တာန်၊ ဗိုလ်လ္ၚီ၊ ကျောက်တံတာ၊ မယာန်ကုမ်၊ ယာန်ကေန်၊ ဗဟာန်၊ တာမွဲ၊ ပဇြောန်တံၚ် ကေုာံမၚ်္ဂလာဒုမ်တအ်တုဲ ဒှ်ပွိုၚ်ဍုၚ် ဂၠံတိုက်ထပ်သၠုၚ် မၞိဟ်တီုက္ဍတ် မံၚ်တန်တဴဒၟံၚ်ဂှ်ရ။
“ဗပိုတ်ဍာ်ဟီုဂှ် ပရဟ်ဒုၚ်တုဲ ဟွံတီလဝ်ပုဟ်။ နူတနေံတေံ စၟတ်တ္ၚဲ ၂၁ နူအခိၚ်နူဂယးဂှ် ဟွံကၠုၚ်ရ။ ဆက်ဖုၚ်ကဵု ဂကောံသာယျာဍိုပ်ဍဴတအ်လေဝ် ဂုဏ်နူပလေဝ်ဒၟံၚ်လာၚ်ဍာ် ကၠုၚ်နူလှဝ်ကာတုဲ မံၚ်ၜါတ္ၚဲတှ်ေ ကလေၚ်ကၠုၚ်ပၠန်ဏောၚ် ဂးရ။ ဆဂး ဒဵုကဵုလၟုဟ် ဟွံကၠုၚ်ဏီပုဟ်။ ပရဟ်ဒုၚ်တုဲ ဟွံတီလဝ်ဂှ်ရ ဒုၚ်စွံလဝ်ဍာ်လေဝ် ဟွံဂွံဒုၚ်လဝ်ရ။ သ္ၚိဇကုဂှ် ဒှ်မံၚ်ဂၠံတိုက်တှ်ေ ဂွံဒုၚ်ဂိုၚ်စွံလဝ်ဂၠိုၚ်ၚ်လေဝ် ဒုၚ်စွံလဝ်ဟွံဂွံရ။ ၜိုတ်မွဲတ္ၚဲတှ်ေ ခိုဟ်မံၚ်ညိဏီ။ ဣဏံဂှ် ဂွံအာပိတ္ၚဲတုဲယျ။ ပၟတ်ဂှ်တှ်ေ အခိၚ်ကၠုၚ်ဂှ် ကၠုၚ်ဒၟံၚ်ဖိုဟ်ဏီရ” ဂှ် ညးမံၚ်တန်တဴဒၟံၚ် ပ္ဍဲပွိုၚ်ဍုၚ်ဗိုလ်လ္ၚီမွဲတၠ ဟီုသ္ဂးလဝ်ရ။
အခိၚ်လၟုဟ်ဏံဂှ် ပ္ဍဲကဵုပွိုၚ်ဍုၚ်ဍာ်ပိုတ်အာဂှ် ဍာ်ကွဳဓရိုဟ်မွဲဖ္ဍိုက်ဂှ် ဒးရာန်သုၚ်စောဲဒၟံၚ် ဗွိုၚ်ၜိုတ်ပိလ္ၚီဒကေဝ်တုဲ အတိုၚ်အထပ်သၠုၚ်သဝ် ဒးကဵုဒၟံၚ် ၚုဟ်ဇက်ပတိုန်ဍာ်တုဲ ဒးရာန်ကေတ်ဒၟံၚ်ရဂှ်လေဝ် ဂွံတီကေတ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ(၂၁) ဇိုၚ်သဝ်တ္ၚဲဂှ်လေဝ် ဟိုတ်နူတိုၚ်ပၟတ်တာဝါ ဇြဟတ်ဓာတ်လလဳ တဳကျေတ် ဘဳလူချောၚ်-၂ မွဲတိုၚ် ဒေါံကၟိုၚ်လီုလာ်အာလဝ်တုဲ ပ္ဍဲရးဒေသလဂုၚ် ဒၞာဲလ္ၚဵုတအ် ပၟတ်ပိုတ်ဏောၚ်ဂှ် ဟိုတ်နူကဝ်ပိုဝ်ရေယှေန် ပရေၚ်ပါ်တြးပၟတ်ဓာတ်လလဳလဂုၚ် လလောၚ်တြးလဝ်တုဲ ဍာ်ပၟတ် ပိုတ်အာလဝ် မွဲဒမြိပ်ဓဝ်တုဲ ပ္ဍဲပရေၚ်မံၚ်စံၚ် ပရေၚ်မၞိဟ်ဇၟာပ်တ္ၚဲဂှ် ဒးဆဵုဂဗကဵု တၚ်ခက်ခုဲဏောၚ်ဂှ်လေဝ် ညးဍုၚ်ကွာန်မံၚ်တန်တဴဒၟံၚ် ပ္ဍဲဍုၚ်လဂုၚ်တအ် ဂွိၚ်ဂွာဲဒၟံၚ်အိုတ်ရ။
စပ်ကဵုပရေၚ်ဍာ် ပိုတ်ဒကုတ်အာ ဗီုလၟုဟ်ဏံတုဲ ကဝ်မတဳပရေၚ်သာယျာဍိုပ်ဍဴ သၟဝ်တဲကံၚ်ဇြဳပၞာန် ဍုၚ်လဂုၚ်ဂှ် မမိက်ကဵုမွဲမွဲ လလောၚ်တြးဟီုဂးကၠုၚ်လဝ် ဟၟဲဏီရ။
ပရိုၚ်-သြၚ်လောန်တိုၚ်(မ်)