နေဗျဳဒဝ်၊ ဂျာန္နဝါရဳ(၂၅)
ကၟိန်ဍုၚ်ဗၟာဝွံ ဟိုတ်နူရပ်စပ်ဒၟံၚ် သၞောတ်ဒဳမဝ်ကရေဇြဳဗော်ဇဳဂှ်ရ အကာဲအရာဗီုလဵုဒှ်ဒှ် သွက်ဂွံကၠောန်ဗဒှ်ပေါဲရုဲမာဲ ဗၠးၜးဗဗွဲဓဝ်မာန်ဂှ် ဂ္စါန်ရေၚ်တၠုၚ်အာရောၚ် က္ဍိုပ်သ္ကိုပ်ပၞာန် ဟီုဂးလဝ် ဗိုန်န်ခိုၚ်ၚ်ရ။
ပ္ဍဲကောံဓရီုကံၚ်ဇြဳပၞာန် မကၠောန်သ္ပလဝ် ပ္ဍဲနေဗျဳဒဝ် နူဂိတုဂျာန္နဝါရဳ (၂၃) ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ကလိဂွံလဝ်တၚ်တုပ်စိုတ် ကုဂကောံ EAOs မသဳကၠဳလဝ် ပရေၚ်ၜိုဟ်လလမ်တံ နကဵုမူ သွက်ပရေၚ်သ္ဂောံဒက်ပ္တန် သၞောတ်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵု သၞောတ်ဒဳမဝ်ကရေဇြဳ ကေုာံ ဖေဝ်ဒရာ၊ သွက်ပရေၚ်သ္ကဵုသၞောတ်ဒဳမဝ်ကရေဇြဳ သ္ဂောံခိုၚ်ကၠိုက်တံ တုဲဒှ်ယျဂှ် သ္ဂးရ။
ဟိုတ်ဂှ်ရ အလုံမွဲကၟိန်ဍုၚ် ဒၞါဲသှ်ေသၟေဟ်ဟွံမွဲ ညံၚ်ဂွံကၠောန်ပေါဲရုဲမာဲမာန်၊ ညးဍုၚ်ကွာန်အိုဿီု ပွမဘပဠ အနိၚ်အထက် ဟွံမွဲမွဲသာ် ညံၚ်ဂွံကဵုမာဲ ထ္မံက်ပ္တိတ်ဆန္ဒ ဗွဲမဗၠးၜးမာန်ဂှ် ပ္တဝ်အာက္ဍိုပ်ရေၚ်တၠုၚ်အာရောၚ် က္ဍိုပ်သ္ကိုပ်ပၞာန် ဟီုရ။
က္ဍိုပ်သ္ကိုပ်ပၞာန်ဂှ် ယဝ်ရရေၚ်တၠုၚ် ဗွဲမသၟဟ်ကဵု တၚ်စၞောန်ပျး စပ်ကဵုကာလကာတၟေၚ်တံဂှ်တုဲမ္ဂး ကလေၚ်ကၠောန်ဗဒှ်ကဵု ပေါဲရုဲမာဲဒဳမဝ်ကရေဇြဳဗော်ဇဳ ဗၠးၜးဗဗွဲဓဝ် ဗွဲမကိတ်ညဳကဵု သၞောဝ်သ္ဇိုၚ်ဒက်ပ္တန် ၂၀၀၈ဂှ်ရောၚ် သ္ဂးရ။
သွက်ဂွံလှဲပအပ်ကဵု တာလျိုၚ်ကၟိန်ဍုၚ် ကုဗော်မဂွံလဝ်ဇၞး ပ္ဍဲပေါဲရုဲမာဲတံ ဗွဲမသၟဟ်ကဵု အစာံဒဳမဝ်ကရေဇြဳတံမာန်ဂှ် ဆက်ရေၚ်တၠုၚ်အာရောၚ် အတိုၚ်မဟီုဂးလဝ်ဂှ် နူကဵုလ္ပာ်ဇကုတံ သွက်ဂွံသဳကၠဳ တၚ်နွံပၟိက် မ္ဒးပြဟ်ဒုၚ်ရေၚ်တၠုၚ်တံမဒှ်ရောၚ်ဂှ် ညးဆက်ဟီုလဝ်ရ။
သ္အာၚ်နူဂှ်ပၠန် သွက်ဂွံကၠောန်ဗဒှ်ပေါဲရုဲမာဲဂှ် ဗော်ပရေၚ်ဍုၚ်ကွာန်တံ ဒးနွံဏောၚ်ဂှ်ရ သွက်ဂွံစၞောန်ပျး သၞောဝ်ဥပဒေ ဗော်ပရေၚ်ဍုၚ်ကွာန်ဂမၠိုၚ် မ္ဒးပ္တိုန်စရၚ်တံဂှ်လေဝ် ပၟိက်ဇၞော်ဂှ်ရ ထပ်သ္ၚဳဂၠိပ်ပလေဝ်ပလေတ် အရာမနွံပၟိက်တံတုဲမ္ဂး သ္ပဒတန်လလောၚ်တြးအာရောၚ် သ္ဂးရ။
ဗော်ပရေၚ်ဍုၚ်ကွာန်တံဂှ် သွက်ဂွံကၠောန်ဗဒှ်ပေါဲရုဲမာဲ ပ္ဍဲအကြာပဋိပက္ခ အကြေပ်အဂြတ်ပရေၚ်ဍုၚ်ကွာန် မက္တဵုဒှ်ဒၟံၚ်လၟုဟ်တံဂှ် အရာဟွံချိုတ်ပၠိုတ်တံ နွံဒၟံၚ်တုဲ သွက်ပရေၚ်ဂီုကၠီုဂှ်လေဝ် သ္ဇက်ဒးဂွိၚ်ဂွါဲတံ နွံမာန်ရောၚ်ဂှ် ထံက်ထ္ၜးလဝ်အိုတ်ရ။
က္ဍိုပ်သ္ကိုပ်ပၞာန်ဂှ် နကဵုကမ္မယှေန်ပေါဲရုဲမာဲ ပ္ဍဲအရာရေၚ်တၠုၚ်ပ္တိုန်စရၚ် ကုဗော်တံဂှ် ညံၚ်ဂွိုအ်ဒှ်ဗော်ပရေၚ်ဍုၚ်ကွာန် မဝးပ္ကဝ်လဝ် သၞောဝ်သ္ဇိုၚ်ဒက်ပ္တန်ကၟိန်ဍုၚ်ဂှ် နွံပၟိက်တုဲ သွက်ဂွံပံက် ရုၚ်ကမ္မယှေန်ပေါဲရုဲမာဲတံ ဍိုက်က်ပေၚ်ၚ်ဂှ် ရေၚ်တၠုၚ်အာရောၚ် သ္ဂးရ။
သ္အာၚ်နူဂှ်ပၠန် ကလိဂွံ စရၚ်အၚ်မၞုံအလုံကၟိန်ဍုၚ်မွဲတံ ဗွဲမဍာံပြမှဟေၚ် စရၚ်မာဲတံ ဒးဏောၚ်မဒှ်တုဲ သွက်ဂွံကၠောန်ဗဒှ် ပေါဲရုဲမာဲ ဒၞါဲသှ်ေသၟေဟ်ညံၚ်ဟွံဂွံမွဲတံဂှ် နွံပၟိက် ဒးဒှ်ပေါဲရုဲမာဲ မစှ်ေကဵုသၞောတ်၊ ပေါဲရုဲမာဲ မနွံကဵုဗဗွဲဓဝ်တံဂှ်ရောၚ် က္ဍိုပ်သ္ကိုပ်ဟီုဂးလဝ် ဂလာန်ဗ္ကန်ရ။
အခိၚ်လၟုဟ် သွက်ပေါဲရုဲမာဲဂှ် ကံၚ်ဇြဳပၞာန် ကၠောန်ဒၟံၚ် ပရေၚ်ကံက်စရၚ်လၟိဟ်မၞိဟ်ဗလးတိတံတုဲ နူကဵုတ္ၚဲစကံက် ဂိတုဂျာန္နဝါရဳ (၉) စဵုကဵုအခိၚ်လၟုဟ်ဂှ် ဂကောံရုၚ်ကံက်စရၚ်လၟိဟ်မၞိဟ်တံ ကေုာံ ရုၚ်ကဝ်မယှေန်ပေါဲရုဲမာဲတံဝွံ ဒးဒုၚ်ဗ္တိုက်လဝ် ဟွံအောန်နူကဵု (၁၀) ဝါရ။
ပရိုၚ်−သြၚ်လောန်တိုၚ်(မ်)