တၞၚ်သဳ၊ ဂျာန္နဝါရဳ (၂၅)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲဗ္ဒါဲကွာန်ဗာန်လမတ်ဂှ် စနူဂိတုဂျာန္နဝါရဳ (၂၃) တေံတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်ဒေသတံ ပေါဲဗ္တိုက် သ္ကာတ်မြဟ်ဒၟံၚ်ဂှ် ညးတာလျိုၚ် PDF ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲဗ္တိုက်ဂှ်ဝွံ နူကဵုလ္ပာ်ဒပ်ပံၚ်တောဲ စဵုဒၞါညးဍုၚ်ကွာန်ဒေသတံ အာစိုပ်ဗ္တိုက်လဝ် ကုဒပ်အမၠံက်ကံၚ်ဇြဳပၞာန် လၟိဟ် (၅၅၇) မၞုံဗ္ဒါဲကွာန်ဗာန်လမတ်ဂှ်တုဲ ပေါဲဗ္တိုက်ၜါလ္ပာ်တံ စက္တဵုဒှ်လဝ်ရ။
ပေါဲဗ္တိုက်ၜါလ္ပာ်ဝွံ ပ္ဍဲဂိတုဂျာန္နဝါရဳ (၂၄) တ္ၚဲဏံဂှ်လေဝ် ပ္ဍဲဗ္ဒါဲကွာန်ဗာန်လမတ်ဂှ် ထပ်က္တဵုဒှ်လဝ်တုဲ ၜိုန်ရပေါံဗ္တိုက်တံ သာသ္ကာတ်မြဟ်ကၠုၚ်ကီုလေဝ် အကာဲအရာဇီုကပိုက်ချိုတ်ဂျိုၚ်ၜါလ္ပာ်တံဂှ် ဟွံဂွံတီကေတ် ဗွဲလစှ်ေဏီရ။
ပြဟ်ဟ်ဏံ ပ္ဍဲကဵုပေါဲဗ္တိုက်ၜါလ္ပာ်တံဂှ် ပ္ဍဲလ္ပာ်ဇဝါ ကေုာံ ပ္ဍဲကဵုဒဒန်တၞၚ်သဳတံဂှ် ကွဳစက်အာတရဴ ဂၠိုၚ်ကဵုကၠံ ကၟာတ်ဒးဒၟံၚ်တုဲ ညးအာတရဴလ္ၚဵုတံ ကလေၚ်ဂတးအာက္ဍိုပ်တံ နွံဒၟံၚ်ရ။
အပ္ဍဲပေါဲဗ္တိုက်ၜါလ္ပာ်တံဂှ် ဒပ်အမၠံက်ကံၚ်ဇြဳပၞာန် ဟိုတ်နူပန်ပှော်လဝ်ကဵု လွဟ်လက်နက်တံဂှ်ရ ညးဒေသမၞိဟ်တြုံ (၄) တၠ၊ မၞိဟ်ဗြဴ (၂) တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်မွဲမ ဇီုကပိုက်လီုလာ်အာလဝ်ရောၚ် သ္ဂးရ။
အခိၚ်လၟုဟ်ဂှ် ဟိုတ်နူပေါဲဗ္တိုက်တံတုဲ မ္ၚးနူကဵုကွာန်ဗာန်လမတ်ဂှ် ညးဍုၚ်ကွာန်ဒေသ နူကွာန်ဗ္ဒါဲဗ္ဒါဲတံဝွံ ထောံလသာသ္ၚိဌာန် ဒးဂြိပ်ဒဴပါဒလေတ်ဒၟံၚ် ဒၞါဲဗၠးဘဲတံဂှ် ဂွံတီကေတ်ရ။
ပ္ဍဲကဵုဂိတုဂျာန္နဝါရဳ သတ္တာဟပထမတေံဂှ်လေဝ် အကြာဒပ်စဵုဒၞါညးဒေသ ကေုာံ ဒပ်ကံၚ်ဇြဳ ပ္ဍဲကဵုကွာန်ဇဝါ၊ ဗာန်လမတ်၊ ဗောဓိကာန် ကေုာံ ကွာန် ၆ မိုင်၊ ပွိုၚ်ဍုၚ်တၞၚ်သဳတံဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်လဝ်တုဲ အပ္ဍဲပေါဲဗ္တိုက်ဏံဂှ် ကောန်ဂကောံဒပ်ကံၚ်ဖြဳပၞာန် (၁၂) တၠ ချိုတ်အာတုဲ ကောန်သ္ဂံၚ် (၁) တၠ ပြဟ်လလုဲအာလဝ်ရ။
ပရိုၚ်−သြၚ်လောန်တိုၚ်(မ်)