မတ်မလီု၊ ဂျာန္နဝါရဳ (၂၆)
ကံၚ်ဇြဳပၞာန် ကၠောန်သ္ပသွက်ဂွံကေတ်အရေဝ်စၟဳစၟတ် ကုသၞာဲဒဴဇြဳဒဳအေမ် အလုံမွဲကၟိန်ဍုၚ်တံဂှ်ဝွံ ဒှ်သဘဴဖံက်ပ္ကဝ်ထောံ အခေါၚ်အရာမၞိဟ် မံက်က်ထေၚ်ၚ်ရဂှ် သၞာဲဒဴဇြဳဒဳအေမ်တံ ခၠေဝ်ပလန်လဝ်ရ။
ကံၚ်ဇြဳပၞာန်ဝွံ သွက်ဂွံကေတ်အရေဝ် ကုသၞာဲဒဴဇြဳဒဳအေမ် နူရးဒေသ ကေုာံ တွဵုရးနာနာတံဂှ်တုဲ ဒက်လဝ်ဂကောံ ပရေၚ်စၟဳစၟတ် CDM သၞာဲဒဴနူဌာနမဆေၚ်စပ် ကံၚ်ဇြဳပၞာန်တံ သီုကဵုပါလုပ် ဒပ်ပၞာန်တံ မဒှ်ရ။
ဂကောံပရေၚ်စၟဳစၟတ် CDM ဏံဂှ်ဝွံ သွက်ဂွံစၟဳစၟတ် ဒဒှ်မခါန်ကၞက်လဝ် CDM တံ ပ္ဍဲကဵုဘာဗ္တောန်လိက် ကေုာံ ဗ္ဒမ်ဂဥုဲ၊ ရုၚ်ဂဥုဲ ပုဂ္ဂလိကတံ နွံ၊ ဟွံမွဲဂှ်ကဵု ယဝ်ရခါန်ကၞက်လဝ် CDM တံမ္ဂး သွက်ဂွံကၟာတ်လဒဵုထောံဂှ်ကဵု အပ္ဍဲမွဲဂိတု သွက်ဂွံကလေၚ်ဒုၚ်စဳရေၚ် ကုပွမရေၚ်တၠုၚ်ကေတ်အရေဝ်တံဂှ် စၞောန်ပ္ညုၚ်လဝ်ရ။
ကံၚ်ဇြဳပၞာန် ကၠောန်သ္ပ သွက်ဂွံကေတ်အရေဝ် ကုသၞာဲဒဴ မဒတူလိုၚ်ဒၟံၚ် နဒဒှ်ဇြဳဒဳအေမ် ပရေၚ်ချဳဒရာၚ် ဒစဵုဒစးအဝဵု ဟွံပကီုပရာပ်တံဂှ်ဝွံ ဖံက်ပ္ကဝ်အခေါၚ်အရာမၞိဟ်တုဲ ဒှ်ပြဝကဆံၚ်သဝ်ဝ်ရောၚ်ဂှ် သၠာဲဒဴဇြဳဒဳအေမ်မွဲတၠ ကလေၚ်ခၠေဝ်ပလန်လဝ်ရ။
“စကစ ဂှ်တှ်ေ ဗီုဏံရ။ ဍေံဂှ်တှ်ေ ကဵုမံၚ်ဒဒိုက်စုၚ်လေၚ်ရ။ လၟုဟ်ဂှ် ပိုယ်တံဟွံမွဲတှ်ေ အပ္ဍဲတေံ ဍေံတံ ဒှ်ဒဒိုက်ရ။ ဟွံဒှ်ကလောန်တုဲ ဒဵုကဵုအခိၚ်လၟုဟ် ညံၚ်ဇြဳဒဳအေမ်တံ ကၠောန်စမ္ၚးဏံ ဟွံဂွံဂှ် ဗက်ကဵုဒၟံၚ်ဒဒိုက်ဖိုဟ်ရ။ မတံဏံဂှ် ဖံက်ပ္ကဝ်အခေါၚ်အရာမၞိဟ်ရဏောၚ်။ နကဵုပညာပိုယ်တံမလေပ်လဝ်ဂှ် မိက်ဂွံကၠောန်စမ္ၚးဏံတှ်ေ ကၠောန်ဏောၚ်။ လကၠောန်မှ ကၠောန်ဏောၚ်။ ညအ်ဂှ် ဒှ်အာကလောန်ပိုယ်ယျလေဝ်။ ဟီုတှ်ေ ဍေံတံဂှ် ဗက်ကၠုၚ် စဵုကဵုမ္ၚးဏံတုဲ ကဵုဒဒိုက်ဟီုဂှ် ဒးဟီုနကဵုအရေဝ်အရာပ်မ္ဂး ဒှ်မံၚ်ပၞတ်လဝ်စိုတ်ဂှ် မုဟွံသေၚ်မွဲသာ် သၞာဲဒဴမုကၠောန်ဟွံမာန်တံဏံဂှ်မှ ဍေံတံ ဗက်ကၠောန်ဒၟံၚ်မွဲအလန်ဓဝ် နကဵုစိုတ်အာဃာတ ဗီုတံဏံဂှ် ဒးဟီုတပ်ပ်မ္ဂး ကၠောန်ဟွံထေက်ရပုဟ်လေဝ်။ ဆ္ဂး ဍေံတံဂှ် ကၠောန်ထေက် ဟွံထေက်တံဟာဟီုဂှ် ဒှ်မၞိဟ် ဆလအ်မှကူချပ်လဝ် ဟွံသေၚ်ရ။ ဍေံတံဂှ် ဓဇန်ဟွံသေၚ်ပုဟ်၊ ကဆံၚ်သဝ် ယုတ်မာ ၚံက်စၞာဲရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် ကၠောန်သ္ပ သွက်ဂွံကေတ်အရေဝ် ကုသၞာဲဒဴဇြဳဒဳအေမ် မဟွံဒုၚ်တဲ ကုဍေံတံဂှ်ဝွံ နကဵုသၞာဲဒဴ Non-CDM လၟုဟ်တံဂှ် ဂေတ်ဂြိပ်ယန္တယာ ဌာနမဆေၚ်စပ် ကံၚ်ဇြဳပၞာန်တံ ဍိုက်က်ပေၚ်ၚ်ဟွံမာန်လေဝ် ဒှ်မာန်တုဲ အပ္ဍဲအခိၚ်ဍေံတံ အဝဵုမၞုံဂှ် ညံၚ်သၞာဲဒဴ CDM တံ ဂွံကဟောံအာဂှ် ကၠောန်မံၚ်လေဝ် ဒှ်မာန်ရောၚ် သ္ဂးရ။
သၞာဲဒဴ CDM မွဲတၠဂှ်လေဝ် ကံၚ်ဇြဳပၞာန် ကၠောန်သ္ပ သွက်ဂွံကေတ်အရေဝ်ဂှ်ဝွံ ညံၚ်သၞာဲဒဴဇြဳဒဳအေမ်တံ သာ်လဵုမှ ဒတူလိုၚ်ဟွံဂွံဂှ် ကၠောန်ၜိုတ်ဒၟံၚ်ဂှ်ရ သွက်ဂွံထပိုတ်ရိုဟ်ကၞက် ကံၚ်ဇြဳပၞာန်ဂှ် နွံပၟိက်တုဲ ပၠန်ဂတးအာ ဒဵုကဵုအိုတ်ကၞောတ်ရောၚ်ဂှ် ဟီုရ။
“လၟုဟ်ဂှ် စနူကဵုဂွံကေတ်အရေဝ်ဂှ်တုဲ ပလေဝ်ပလေတ်ဒၟံၚ်ယျ။ ဗီုလဵုဂွံဟီုရောတှ်ေ ဒက်ဂကောံတံဏောၚ်။ စၟဳစၟတ်ဏောၚ်၊ လၟုဟ်ဂှ် ညံၚ်ဒတူလိုၚ် သာ်လဵုမှဟွံဂွံဂှ် ညံၚ်ကၠောန်စဟွံဂွံဂှ် ဍေံတံ ပျဲပျာံမံၚ် နကဵုနဲကဲနာနာသာ်ရ။ ဒဵုကဵုလၟုဟ်လေဝ် ဒးဖေက်လကိုတ်ဒၟံၚ်ဖိုဟ်ရ။ မုဟိုတ်ရောဟီုတှ်ေ ရပ်ဇြဳဒဳအေမ်တံဖအိုတ်ဏောၚ် ဟီုဗက်ဂှ် ဒှ်ဘဝ ဒးဓလေတ်ဒၟံၚ်တံဏောၚ်။ ဒှ်သဘဴ ပိုယ်တံ ဒးဂွဳစိုက်လဝ် တွဵုဏောၚ်။ မုမှ ကၠောန်စဟွံဂွံပုဟ်။ ၜိုတ်နွံဂှ် ဂ္ဇအ်စရ။ ဒးဒတူလိုၚ်ဒၟံၚ် အိုတ်ဇိုၚ်အိုတ်ဍာ်ရ။ ဒးရုန်ဂ္စါန်ဒၟံၚ်ရ။ ဒၟါနူဒးရုန်ဂ္စါန်ဒၟံၚ်ဂှ်ရ ဣဏံဂှ် ထပိုတ်ရိုဟ်ကၞက်မှဟေၚ် ဒှ်ဏောၚ်။ ပိုယ်တံဂှ်လေဝ် ၜိုတ်သၟဟ်ဂှ် ဒးအာဒဵုကဵုအိုတ်ကၞောတ်ဏောၚ်။ မုဒှ်ဒှ် နကဵုဆန္ဒမသ္ကာတ်မြဟ်တံဂှ်ရ။ ဣဏံဂှ် ဒးပၠန်ဂတးဍေံတံ နကဵုနဲမသ္ပမာန်တံဂှ်ရ။ ဒှ်သဘဴ ဒးတဝ်စၞေဟ်ဒၟံၚ်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် အတိုၚ်လိက်စၞောန်ပၞုက်ကံၚ်ဇြဳပၞာန် မမံက်တိတ်ကၠုၚ်ဂှ်မ္ဂး ကုသၞာဲဒဴဇြဳဒဳအေမ် မဒးဒုၚ်ပၠောပ်လဝ်စရၚ်ယၟုလီုတံဂှ် သွက်ဂွံမၚ်ရံၚ် စွံပွန် ညံၚ်ဂွိုအ်ဂွံအခေါၚ်တိတ်ဍုၚ်မ္ၚးဂှ်ကီု၊ ကုသၞာဲဒဴဇြဳဒဳအေမ် မဒးဒုၚ်တာဒၞါလဝ် အခေါၚ်တိတ်ဍုၚ်မ္ၚးတံဂှ်လေဝ် သွက်ဂွံပကောံပကေဝ်စရၚ် လၟေၚ်သတ္တာဟတံဂှ် စၞောန်ပ္ညုၚ်လဝ်နွံဒၟံၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ကဵုသၞာဲဒဴဇြဳဒဳအေမ်တံ ပါဲဒလေတ်အာ နူကဵုသ္ၚိသၞာဲဒဴတံ အတေၚ်ဂှ်ကီု၊ ဘပဠ နကဵုနဲကဲနာနာ၊ ဍဵုဍိုက်တံသၟးဟွံက ရပ်ဒက်ဟွံဗဗွဲဓဝ်တုဲ တပ်စုတ်ၝောံပိုဒ် နာနာသာ်တုဲ ဂွံကေတ်အရေဝ်ဂှ်လေဝ် ဆက်ကၠောန်ဒၟံၚ်ရ။
အလုံမွဲကၟိန်ဍုၚ်ဂှ် ဟိုတ်နူဟွံဒုၚ်တဲ ကုပွဒပ်ပၞာန်သီအဝဵုဂှ်ရ သၞာဲဒဴကၟိန်ဍုၚ် မလုပ်လဝ် ပ္ဍဲပရေၚ်ချဳဒရာၚ်ဇြဳဒဳအေမ် ပရေၚ်ဒစဵုဒစးအဝဵု နနဲဟွံပကီုပရာပ်တံ နွံဒၟံၚ် ဂၠိုၚ်ကဵုကိုဋ်ရ။
ပရိုၚ်−သြၚ်လောန်တိုၚ်(မ်)