ကအ်ဗိုတ်၊ ဂျာန္နဝါရဳ (၂၆)
ကြဴနူဒပ်ပၞာန်သီအဝဵုတုဲ ပဋိပက္ခပရေၚ်ပၞာန်ရပ်လွဟ် မက္တဵုဒှ်ကၠုၚ်တံဝွံ အခါလၟုဟ်ဂှ် မုက်ပၞာန်သၠဲလးကၠုၚ် စဵုကဵုဒေသထိၚ်ဒဝ် ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ်ဂကူမန် မရုဲစှ်လဝ် ဂၠံၚ်တရဴဆဵုဂဗသဳကၠဳတံဂှ်ရ။
ပေါဲဗ္တိုက်တံဝွံ အပ္ဍဲခရိုၚ်သဓီု မဒှ်တိဍာ်ထိၚ်ဒဝ် ဗော်ဍုၚ်မန်တၟိဂှ် အပ္ဍဲအကြာမွဲၜါတ္ၚဲဏံ က္တဵုဒှ်ကၠုၚ်ဒၟံၚ် အဆက်က်တုဲ သီုကဵုလၟေၚ်ဒဒှ် ဒးဒုၚ်စံၚ်ပလီု သ္ၚိဌာန်တံလေဝ် နွံကၠုၚ်ရ။
ပ္ဍဲကဵုဂှ် တုဲကၠုၚ်ဂိတုဂျာန္နဝါရဳ (၁၆) တေံ ဂကောံဒပ်ပံၚ်ကောံ KNLA တံ လုပ်စိုပ်စံၚ် ဗ္ဒိုပ်ဗၠာဲသၟိၚ်တိဍာ်ကအ်ဗိန်၊ ပွိုၚ်ဍုၚ်ကအ်ကြိက်ဂှ်တုဲ ကွာန်ကအ်ဍုၚ် ဒၞါဲပေါဲဗ္တိုက် က္တဵုဒှ်လဝ်ဂှ်မ္ဂး ဒှ်တိဍာ်ထိၚ်ဒဝ် ဗော်ဍုၚ်မန်တၟိတုဲ ကဵုဌာန်ဂအုပ်ခရိုၚ်သဓီုဂှ်လေဝ် နွံမံၚ် ခြာခမ္ၚောဲဘာ်မိုၚ်ရ။
သ္အာၚ်နူဂှ်ပၠန် ကွာန်ကအ်ဗိုတ်(ကာန္နဳ) ၊ မိဂလုံ၊ ကအ်ဗိန် ဗ္ဒါဲဍုၚ်ကြုၚ်ဒဵု၊ ပွိုၚ်ဍုၚ်ကအ်ကြိက်၊ တွဵုရးကရေၚ် ဒၞါဲဒေသပေါဲဗ္တိုက် မသ္ကာတ်မြဟ်ဒၟံၚ် စနူဂိတုဂျာန္နဝါရဳ (၂၁) ဒဵုကဵုအခိၚ်လၟုဟ်တံဂှ်လေဝ် ပါလုပ်ဒၟံၚ် ပ္ဍဲတိဍာ်ထိၚ်ဒဝ် ဌာန်ဂအုပ်ခရိုၚ်သဓီု ဗော်ဍုၚ်မန်တၟိတုဲ ဒှ်ကွာန်ဂကူဗွဲမဂၠိုၚ် မသ္ပဒတဴမံၚ်စံၚ်တံရ။
စပ်ကဵုပဋိပက္ခရပ်လွဟ် က္တဵုဒှ် အပ္ဍဲတိဍာ်ထိၚ်ဒဝ် ဗော်ဍုၚ်မန်တၟိဂှ်ကီု၊ သ္ၚိဌာန်ညးဍုၚ်ကွာန်မန်တံ တူပၟတ်လီုလာ်အာဂှ်ကီု၊ ဒးဘဲပၞာန်တံဂှ်ကီုဂှ်တုဲ နကဵုဗော်ဍုၚ်မန်တၟိ ဒဵုကဵုအခိၚ်လၟုဟ် လလောၚ်ပ္တိတ်ဟီုဂးကၠုၚ် မွဲမွဲသာ်ဂှ် ဟွံမွဲဏီရ။
တၠနာဲ ညးမဒှ်ကောန်ဂကောံဇြဟတ်ဖေဝ်ဒရာရးမည (NRFF) ဂှ် အကာဲအရာလၟုဟ်ဝွံ သွက်ဗော်ဍုၚ်မန်တၟိ မဗက်ဂၠံၚ်တရဴ ဆဵုဂဗသဳကၠဳတုဲ ပါဲမံၚ်ပေါဲပၞာန်ဂှ် ဒှ်အကာဲအရာကြေပ်ဂြတ်ရောၚ် သ္ၚဳဂၠိပ်လဝ်ရ။
“သွက်ဗော်ဍုၚ်မန်တၟိဂှ် အခိၚ်ဏံဂှ် ဒှ်ကာလကြေပ်ဂြတ်ရ။ မွဲလ္ပာ်ဂှ် တက်ကျာကဵု SAC ၊ မွဲလ္ပာ်ပၠန်ဂှ်လေဝ် အတိုၚ်သီုဖအိုတ်တီလဝ်ဂှ်ရ ပါဲမံၚ်ပၞာန်၊ ဟိုတ်နူဇြဟတ်တုဲတှ်ေလေဝ်။ ဒးဟီုမ္ဂး အခိၚ်ကာလဗီုလၟုဟ်ဂှ် သွက်ဗော်ဍုၚ်မန်တၟိ ဒှ်အကာဲအရာကြေပ်ဂြတ်ကွေံကွေံဏောၚ်ဂှ် အဲညာတ်ရ။ ချိုတ်ပၠိုတ်မွဲဂှ် အခိၚ်ကောန်ဍုၚ်အရၚ်ဘဝတုပ်သီုဖအိုတ် ဗ္တိုက်ဒၟံၚ် ကုသၞဂှ် ပိုယ်မန်တံလေဝ် ထေက်ကဵုဒးလုပ်ပေါဲဗ္တိုက် မွဲကရောံမွဲစွံရ။ ဆဵုဂဗသဳကၠဳဒၟံၚ်ကဵု ကံၚ်ဇြဳပၞာန် မုပရဲပရာဟွံမွဲဂှ်လေဝ် ဒေါအ်ထေက်ယျဂှ် အဲညာတ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် ပ္ဍဲသၟဝ်သၞောတ်တၠအဝဵုပၞာန်ဂှ် ညးလဵုမွဲမှ ဂွံမံၚ်ၜိုဟ်ဟ်သြိုဟ်ဟ် ဟွံမွဲဂှ်ရ သၞောတ်ဏံ ညံၚ်အာယုက်ဂွိုအ်ဂၠိၚ် နွံပၟိက် ဒးဗ္တိုက်ပ္တိတ် ထပိုတ်ရိုဟ်ကၞက်ဂှ်ရ သွက်အလုံညးဍုၚ်ကွာန်မန်မွဲဂှ် ဗော်ဍုၚ်မန်တၟိလေဝ် နဒဒှ်စဵုဒၞါကောန်ဍုၚ်ကွာန်ဇကုတုဲ နကဵုပရေၚ်ပၞာန် ဂပ်ဝ်ဒးကၠောန်မွဲမွဲသာ်ထေက်ဂှ် တၠနာဲ ထံက်ထ္ၜးလဝ်ရ။
သၟတ်မန်မွဲတၠဂှ် အကာဲအရာလၟုဟ်ဂှ် နကဵုဗော်ဍုၚ်မန်တၟိ အကာဲအရာသဳကၠဳပ္ညဳပ္ညပ်မာန် ကုမဟာမိတ် မဒှ်ဗော်သွးကောန်ဂကူကရေၚ် (KNU) ကေုာံ ဂကောံ PDF အပ္ဍဲဒေသတံ သီုကဵုပါလုပ် ကံၚ်ဇြဳပၞာန်တံဂှ် သ္ၚဳဂၠိပ်လဝ်ရ။
“ညးတံ နကဵုဗော်ဍုၚ်မန်တၟိ သ္ၚိတ်ဇြဒၟံၚ်ဗီုလၟုဟ်ဂှ် အဲထေၚ်ဂှ်တှ်ေ အကာဲအရာ သဳကၠဳပ္ညဳပ္ညပ်မွဲမွဲသာ် ကုလ္ပာ်ကံၚ်ဇြဳပၞာန်ကီု မဟာမိတ် KNU, ဂကောံ PDF မၞုံအပ္ဍဲဒေသညးတံ နွံဂှ် အဲထေၚ်ရ။ ဟိုတ်ဂှ်ရ ညးတံ သ္ၚိတ်ဇြဒၟံၚ်။ ၜိုန်ဂှ်ကီုလေဝ် အပ္ဍဲမွဲၜါတ္ၚဲကၠုၚ်စိုပ်ဏံ နူလ္ပာ်ဗော်ဍုၚ်မန်တၟိ ရမျာၚ်မွဲမွဲ သွဟ်မွဲမွဲ တၚ်လလောၚ်တြးမွဲမွဲ တိတ်ကၠုၚ်ရောၚ်ဂှ် စၟဳလဝ်ရ။ အေဇှ်ဂှ် လ္ပာ်ခိုဟ်ဟာ လ္ပာ်ပရေံဟာဟီုဂှ် ပိုယ်တံလေဝ် ဟီုဟွံမာန်ပုဟ်” သာ်ဝွံ ညးသ္ဂးရ။
နကဵုဗော်ဍုၚ်မန်တၟိ ၜိုန်ရဒတူလိုၚ်ဒၟံၚ် ဂၠံၚ်တရဴပရေၚ်ဍုၚ်ကွာန် မဆဵုဂဗသဳကၠဳဂှ်ကီုလေဝ် ဗီုကဵုလၟုဟ် ပ္ဍဲကဵုဗ္ဒါဲဗ္ဒါဲဗ္ဒိုပ်ဒပ်ညးတံကီု ပ္ဍဲတိဍာ်ထိၚ်ဒဝ်တံကီုဂှ် ဒှ်ကၠုၚ်ဗီုပြၚ်ဗလးမုက်ပၞာန်ယျဟီုမ္ဂး တၚ်ဒတူလိုၚ် ပြံၚ်လှာဲအာမာန်ရောၚ်ဂှ်လေဝ် ညးသ္ဂးရ။
စပ်ကဵုပေါဲဗ္တိုက် မက္တဵုဒှ်ဒၟံၚ် ပ္ဍဲတိဍာ်ထိၚ်ဒဝ် ဗော်ဍုၚ်မန်တၟိဂှ်တုဲ နူကဵုသြၚ်လောန်တိုၚ်(မ်) ၜိုန်ဆက်စၠောံသၟာန်သၟုက် ကုညးမၞုံအခေါၚ်ဟီုဂး ဗော်ဍုၚ်မန်တၟိ နာဲအံၚ်မ္ၚဵု ဟွံအောန်နူကဵု (၁၀) ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပ္ဍဲလက်ထက်အလဵုသဳ NLD ဂှ် ဗော်ဍုၚ်မန်တၟိ မထ္ပက်လဝ်စၟတ်တဲ လိက်ကသုက်ဒေါအ်ပန်ပှော်အလုံဍုၚ်မွဲ (NCA) ဂှ်ဝွံ ကြဴနူဒပ်ပၞာန်သီအဝဵုတုဲဂှ် တိုန်စိုပ်သဳကၠဳလဝ် ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကော်ဘိက်လဝ်ဂှ် စဵုကဵု (၃) ဝါကိတ်တ်ရ။
ပရိုၚ်−သြၚ်လောန်တိုၚ်(မ်)