ကြုၚ်ဒဵု၊ ဂျာန္နဝါရဳ (၂၆)
ပွိုၚ်ဍုၚ်ကြုၚ်ဒဵု တိဍာ် ဒပ်မဟာ(၆) ဗော်သွးကောန်ဂကူကရေၚ် KNU ဂှ် တ္ၚဲဏံ ပ္ဍဲဂိတုဂျာန္နဝါရဳ စၟတ်တ္ၚဲ (၂၅) ဏံလေဝ် အကြာဒပ်ကံၚ်ဇြဳပၞာန်ကဵု ဒပ်မဟာမိတ်ပံၚ်ကောံတအ် ပေါဲဗတိုက် ဆက်က္တဵုဒှ်သ္ကာတ်မြဟ်ဒၟံၚ်တုဲ ဒပ်ကံၚ်ဇြဳပၞာန် ကၠောန်ကၠုၚ်ပရေၚ်ထောံဖျေံဒၟံၚ်ဗုမ် နကဵုက္ၜၚ်ကျာရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုပွိုၚ်ဍုၚ်ကြုၚ်ဒဵု KNU ဂှ် အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ လုပ်စိုပ်ချဳဒရာၚ်ဒၟံၚ်ကဵု ဒပ်မဟာမိတ်ပံၚ်ကောံတအ် ပေါဲဗတိုက် ဆက်က္တဵုဒှ်သ္ကာတ်မြဟ်ဒၟံၚ်တုဲ သ္အာၚ်နူပရေၚ်ပန်ပှော်ဖျေံလွဟ်ဇၞော်ပ္ဍဲကွာန်ဂှ် ဒပ်ကံၚ်ဇြဳပၞာန် ထပ်ကၠောန်ကၠုၚ် ပရေၚ်ပန်ပှော် နကဵုက္ၜၚ်ကျာရ။
ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံဗုမ်တုဲ ပရေၚ်ဇီုကပိုက် လီုလာ်တအ်ဂှ် ပြဟ်ဟ်ဏံ ၜိုန်ရဟွံတီကေတ်လဝ်ဏီကီုလေဝ် အတိုၚ်ညးဍုၚ်ကွာန်တအ် ဟီုဂးလဝ်မ္ဂး အကြာကွာန်ကာန်နဳကဵု ကွာန်က္ဍိုပ်ဒဒန်ဂှ် ပရေၚ်ဂြာတ်ဖျေံဗုမ်တုဲ တိခရိုဟ်လာ်စှ်ေကီု ရမျှာၚ်ဒးဖေက်ဂၟံက် ဂွံမိၚ်လဝ်ထတ်ထတ်ကီုရဂှ် ဟီုသ္ဂးလဝ်ရ။
ပ္ဍဲပွိုၚ်ဍုၚ်ကြုၚ်ဒဵု KNU ဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၀)တေံ ပေါဲဗတိုက် စက္တဵုဒှ်ကၠုၚ်တုဲ ပ္ဍဲဂိတုဂျာန္နဝါရဳ စၟတ်တ္ၚဲ (၂၄)တ္ၚဲတုဲကၠုၚ်ဏံဂှ် ပေါဲဗတိုက်ၜါလပါ် သ္ကာတ်မြဟ်ကၠုၚ်တုဲ ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်မပ္တံကဵု ကာန်နဳ၊ ကအ်ကျာ်တအ်တုဲ သ္ၚိဌာန်ညးဍုၚ်ကွာန် မၞုံပ္ဍဲကွာန်ကာန်နဳတအ်ဂှ်လေဝ် ဒပ်ကံၚ်ဇြဳပၞာန် စံၚ်လဝ် ပ္ဍဲတ္ၚဲတုဲကၠုၚ် အခိၚ်ဇိုၚ်သဝ်တ္ၚဲတေံရဂှ် ဂွံတီကေတ် နူဂကောံဒပ်ပံၚ်ကောံတအ်ရ။
ပ္ဍဲကဵုပေါဲဗတိုက် က္တဵုဒှ်လဝ် ပ္ဍဲပွိုၚ်ဍုၚ်ကြုၚ်ဒဵု အကြာမွဲၜါတ္ၚဲဏံ နူလပါ်ဒပ်မဟာမိတ်ပံၚ်ကောံတအ် မၞိဟ်ဇီုကပိုက်ဂွံလဝ်ဘဲဝပ် နွံဒၟံၚ်ညိညဟေၚ်တုဲ လပါ်ဒပ်ကံၚ်ဇြဳပၞာန်ဂှ် မၞိဟ်ဒးချိုတ်လဝ် ၜိုတ်(၄၀) လပါ်လတူ နွံဒၟံၚ်ရဂှ် ကရောၚ်ပၞာန် Lion Battalion Commando လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၂၅)ဂှ်ရ။
ဟိုတ်နူပေါဲဗတိုက်တုဲ ညးဍုၚ်ကွာန် နူကွာန်နွံဇိုၚ်ဍုၚ်ကြုၚ်ဒဵု ဗွဲမဂၠိုၚ်တအ်ဂှ် ဒးဂြိပ်ဒဴ ပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲတုဲ ညးဍုၚ်ကွာန်ဟွံပါဲဓလေတ် နွံဒၟံၚ်ပ္ဍဲကွာန်တအ်လေဝ် နွံဒၟံၚ်ကီုရဂှ် ညးဒေသတအ် ဟီုသ္ဂးလဝ်ရ။
သ္အာၚ်နူဂှ်ပၠန် တ္ၚဲဏံ ပ္ဍဲအခိၚ်(၁)နာဍဳနူဂယးဂှ်လေဝ် ပ္ဍဲဗွိုၚ်ကမၠောန်ၜံက်ခါဲမိုၚ်သတ္တု မၞုံပ္ဍဲဒေသကျာ်ပိ မဒှ်တိဍာ် ဒပ်မဟာ(၆) ပရေၚ်ပၞာန်ကြံၚ်မ္ၚိုဟ်ဒၟံၚ်ဂှ် ဒပ်ကံၚ်ဇြဳပၞာန် ထပ်ကၠောန်ကၠုၚ် ပရေၚ်ဂြာတ်ထောံဖျေံဗုမ် နကဵုက္ၜၚ်ကျာဂှ် စမြိုၚ်မၞုံပ္ဍဲကတိုၚ်မိုၚ်ဗွဲမဂၠိုၚ်တအ် ဒးဇီုကပိုက် လီုလာ်အာလဝ်နွံရဂှ် ဂွံတီကေတ် နူတမ်ရိုဟ်တၚ်ဂၞၚ်ပရိုၚ် KNU ရ။
ရုၚ်ဌာနမဆေၚ်စပ် သၟဝ်တဲကံၚ်ဇြဳပၞာန် မၞုံပ္ဍဲဍုၚ်ကျာ်ပိဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၂၃)အခိၚ်ဇိုၚ်သဝ်တ္ၚဲ ဒပ်ပံၚ်ကောံ ဒပ်ဒမၠုက်ဍုၚ်ဇၞော်တအ် လုပ်စိုပ်ပသောၚ်သ္အးစံၚ်လဝ်တုဲ သွက်သ္ဇိုၚ်ဝန်ကံၚ်ဇြဳပၞာန်တအ် ဂွံပံၚ်တောဲပါလုပ် ကရောံညးဍုၚ်ကွာန်တုဲ သွက်ဂွံသ္ပCDMဂှ် ဒပ်ပံၚ်ကောံ ကဵုလဝ်သတိရ။
ပရိုၚ်-သြၚ်လောန်တိုၚ်(မ်)