လဂုၚ်၊ ဂျာန္နဝါရဳ(၂၆)
အလုံမွဲကၟိန်ဍုၚ် ကြဴနူပရေၚ်ပၞာန်သီအဝဵုတုဲ ဟိုတ်နူပဋိပက္ခရပ်လွဟ် ကေုာံပေါဲဗတိုက်တအ်တုဲ နူကဵုဂိတုနဝ်ဝေမ်ဗာ သၞာံတုဲကၠုၚ်တေံ စဵုကဵုဂိတုဂျာန္နဝါရဳ စၟတ်တ္ၚဲ(၁၅) သၞာံဏံ ပ္ဍဲပွိုၚ်ၜါဂိတုလ္ပာ်ဂှ် စမြိုၚ် သ္ၚိဒၟံၚ် ပါလုပ်သီုစမြိုၚ်ပရေၚ်ဘာသာဂမၠိုၚ် ဗ္ဒာဲ၂၀,၀၀၀ မ ဒးဒုၚ်စံၚ်ပလီုလဝ်ရဂှ် ISP-Myanmar လလောၚ်တြးလဝ်ရ။
အတိုၚ်တၚ်ဂၞၚ် ISP-Myanmar မဒှ်ဂကောံသုတေသန လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ (၂၄)ဂှ် ပ္ဍဲပွိုၚ် ၜါဂိတုလ္ပာ်ဏံ သ္ၚိဒၟံၚ်ပ္ဍဲရးသေတ်ဂါၚ်ဟွံအောန်နူ ၁၆,၂၄၆ မ၊ နကဵုတၟံကၠံမ္ဂး ၆၀ တၟံကၠံပြၚ် ထပ်သၠုၚ်ဂၠိုၚ်တိုန်ကၠုၚ်ရ။
ပ္ဍဲကဵုဒးဒုၚ်စံၚ်ပလီုလဝ်ဂှ် ပွိုၚ်ဍုၚ် ထပ်ပဵုဂၠိုၚ်တိုန်ကၠုၚ် (၁၀)ပွိုၚ်ဍုၚ်ကီု၊ အပံၚ်လၟိဟ်စမြိုၚ် သ္ၚိဒၟံၚ် ဟွံအောန်နူ(၆၇၃)မ ဒးလီုလာ်ဆောံလေၚ်လဝ်တုဲ ပ္ဍဲပွိုၚ်ဍုၚ်မျေန်ချာန် ရးဒေသအၚ်ဝဂှ် ဒှ်လၟိဟ်ဂၠိုၚ်အိုတ်တုဲ သ္ၚိဒၟံၚ်၊ စမြိုၚ် ၃၀၀ ပြၚ် ဒးဒုၚ်စံၚ်ပလီုပလာ်ကၠုၚ်လဝ်ရ။
ကြဴနူဒပ်ပၞာန်သီအဝဵု သၞာံ ၂၀၂၁ စဵုကဵုဂိတုဂျာန္နဝါရဳ စၟတ်တ္ၚဲ(၁၅) သၞာံဏံဂှ် ပ္ဍဲကဵုပွိုၚ်ဍုၚ် (၇)ပွိုၚ်ဍုၚ် ရးဒေသဇၞော် (၅) မပါလုပ် သီုရးဒေသ သေတ်ဂါၚ်တအ်ဂှ် သ္ၚိဒၟံၚ်၊ စမြိုၚ်အပံၚ် (၅၇၈၀၉) ဟွံအောန် ဒးဒုၚ်စံၚ်ပလီုလဝ်ရ။
ရးဒေသသေတ်ဂါၚ်ဂှ် ပ္ဍဲမွဲပွိုၚ်ဒပ်ပၞာန်သီလဝ်အဝဵု ဗ္ဒာဲ(၂)သၞာံဂှ် ဂဗုတ်ပရေၚ်စံၚ်ပလီုသ္ၚိဌာန် စမြိုၚ် က္တဵုဒှ်လဝ် အလုံမွဲကၟိန်ဍုၚ် စဵုကဵု ၇၁ တၟံကၠံ က္တဵုဒှ်လဝ်ဂၠိုၚ်အိုတ်ရဂှ် တၚ်ဂၞၚ် ISP-Myanmar တအ်ဓမံက်ထ္ၜးလဝ်ရ။
တၚ်ဂၞၚ်တအ်ဏံဂှ် ဒုၚ်သ္ဇိုၚ်ကဵု ပရိုၚ်မဳဒဳယာဗၠးၜးတအ်ကီု၊ ဒုၚ်သ္ဇိုၚ် လတူဂကောံညးအရာပ်တအ် လလောၚ်တြးလဝ်တုဲ ၜိုတ်ဍစိုပ် ၜိုန်ရပကောံပကေဝ်လဝ်ကီုလေဝ် ပ္ဍဲဗလးမုက်တိဂှ် လတူနူဏံ သာတုဲ ဂၠိုၚ်မာန်မံၚ်ဏီရဂှ် ISP-Myanmar ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)