ကျာ်ထဝ်၊ ဂျာန္နဝါရဳ(၂၆)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ် ကွာန်ကညေန်အိုၚ်ဂှ် ကံၚ်ဇြဳပၞာန် ထ္ပက်ပၠုပ်ကရောၚ်ပၞာန်တုဲ စံၚ်ဒၟံၚ်သ္ၚိဌာန်ညးဍုၚ်ကွာန်တအ်ရဂှ် ခရိုၚ်ဒူသထူသဓီု ဒပ်မဟာ(၁) KNU လလောၚ်လဝ်ပရိုၚ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၄) ပ္ဍဲအခိၚ်ဇိုၚ်သဝ်တ္ၚဲဂှ် ဟိုတ်နူကရောၚ်ပၞာန် ဇြဟတ်ပါလုပ် ၜိုတ်(၁၀၀)တၠပြၚ် စံၚ်ပလီုလဝ် သ္ၚိဒၟံၚ်၊ ခရိုၚ်ဗ္ၜေံကီု သီုရုၚ်အှော် ဥူဝေန်လှာၚ် ညးဒေသကွာန်ကညေန်အိုၚ်တုဲ ကာလၚုဟ်မး (၂၀၀)ကိုတ်ပြၚ် ဒးဆောံလေၚ်အာလဝ်ရ။
ကံၚ်ဇြဳပၞာန်ဂှ် ပ္ဍဲအခိၚ်ဇိုၚ်သဝ်တ္ၚဲကဵု အခိၚ်နူဂယး တ္ၚဲတုဲကၠုၚ်တေံလေဝ် ဟိုတ်နူပန်ဖျေံလဝ် လွဟ်ဇၞော်အဆက်က်တုဲ ပရေၚ်ဇီုကပိုက်ဒး သ္ၚိဌာန်ညးဍုၚ်ကွာန်တအ် နွံဒၟံၚ်ရဂှ် ညးတာလျိုၚ် PDF ခရိုၚ်သဓီု ဟီုသ္ဂးလဝ်ရ။
“နူစဍေံတအ်လုပ်ကၠုၚ်ဂှ် ကေတ်လဝ်ပရေၚ်ပန်ရီုလွဟ်ဇၞော် နူကဵု ၂၀၇ တုၚ်ဇယာတ်တုဲ လုပ်ကၠုၚ်ရ။ လုပ်ကၠုၚ်တုဲ စံၚ်ပလီုသ္ၚိရ။ တုဲတှ်ေ အကြာဗွိုၚ်ကွာန်ဂှ် မၚ်ဒၟံၚ်ကၚ်တအ်နွံရ။ ဟွံဂွံကလေၚ်တိတ်အာဏီပုဟ။ စဵုကဵုစၟတ်တ္ၚဲ ၂၅အခိၚ်နူဂယးဏံ ပေါဲဗတိုက် ဟွံဂွံဒှ်လဝ်ဏီပုဟ်။ အကဲအရာဂှ်တှ်ေ မၚ်ရံၚ်မံၚ် သီုၜါလပါ်ရ” ဂှ် ညးတာလျိုၚ် PDF ခရိုၚ်သဓီု ကိုဝ်ဨမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ဒၟာနူပရေၚ်ကံၚ်ဇြဳပၞာန် ပန်ဖျေံလွဟ်ဇၞော် နွံကၠုၚ်ဒၟံၚ်အဆက်က်တုဲ အကာဲအရာ ဇီုကပိုက်ဒးညးဒေသတအ် သောဲသောဲဗြောဲဗြောဲ ဟွံဂွံတီကေတ်လဝ်ဏီရဂှ် ညးဟီုသ္ဂးလဝ်ရ။
ဟိုတ်နူလပါ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်ကြာန်န်တုဲ ညးဒေသ နူကွာန်ဝေန်ကာန်၊ ပျေဉ်ကတိုဝ်ကုမ်၊ ဇြဳပျောၚ်၊ ခယွာတအ် (၃၈၀၀)တၠပြၚ် ဒးဂြိပ်ဒဴ ပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ ကလေၚ်စဴကၠုၚ် ဌာန်ဒၟံၚ်ဟွံမာန်ဏီရဂှ် ဂွံတီကေတ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၁၆)ဂှ်လေဝ် ဒပ်ဖျေံသ္ဇိုၚ်ယှိုဲကျေန်ရးဗဂေါ ခလရ ၅၉၈ ကေုာံဒပ်ဖျေံသ္ဇိုၚ်တုၚ်ဇြယာတ် ခမရ ၂၀၇ တအ် ပန်ဖျေံလဝ်လွဟ်ဇၞော်ဂှ်ရ သ္ၚိဒၟံၚ် နူကွာန်ဝေန်ကာန်(၃)မ ဒးလီုလာ်အာလဝ်ဏီရ။
နူသ္ကုတ်လကြဴ သၞာံ ၂၀၂၁ ဒပ်ပၞာန် သီကေတ်လဝ်အဝဵုကၟိန်ဍုၚ်ဗၟာတုဲ စဵုကဵုဂိတုဂျာန္နဝါရဳ စၟတ်တ္ၚဲ(၁၅)သၞာံဏံ ပ္ဍဲကဵုပွိုၚ်ဍုၚ် (၇)ပွိုၚ်ဍုၚ် ရးဒေသဇၞော် (၅) မပါလုပ်သီုရးဒေသသေတ်ဂါၚ်တအ်ဂှ် သ္ၚိဒၟံၚ်၊ စမြိုၚ်အပံၚ် (၅၇,၈၀၉) ဟွံအောန် ဒးဒုၚ်စံၚ်ပလီုလဝ်ရ။
တၚ်ဂၞၚ်တအ်ဏံဂှ် ဒုၚ်သ္ဇိုၚ်ကဵု ပရိုၚ်မဳဒဳယာဗၠးၜးတအ်ကီု၊ ဒုၚ်သ္ဇိုၚ်ကဵု လတူဂကောံညးအရာပ်တအ် လလောၚ်တြးလဝ်တုဲ ၜိုတ်ဍစိုပ် ၜိုန်ရပကောံပကေဝ်လဝ်ကီုလေဝ် ပ္ဍဲဗလးမုက်တိဂှ် လတူနူဏံ သာတုဲဂၠိုၚ်မာန်ဏီရဂှ် ISP-Myanmar ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)