ဍာ်ဗု၊ ဂျာန္နဝါရဳ (၂၈)
ရးဒေသဇၞော်တၞၚ်သဳ၊ ပွိုၚ်ဍုၚ်ဍာ်ဗု၊ ပ္ဍဲဒေသကာန်ပေါက်ဂှ် ဟိုတ်နူလပါ်ကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍိုက်ကွဳလိုန်ဓာတ်တုဲ ပရေၚ်အာကၠုၚ် ဒးဆဵုဂဗဒၟံၚ်ကဵု တၚ်ခက်ခုဲရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၂၅) ဂှ် သ္ကိုပ်အုပ်ဓုပ် ဂကောံကွာန်ကာန်ပေါက် ကံၚ်ဇြဳပၞာန်ခါန်ကၞက်လဝ် ပါလုပ်သီု ဥူခေန်သိုဝ် (၃)တၠတအ်ဂှ် ဒပ်စဵုဒၞာညးဍုၚ်ကွာန် PDF တအ် ကၠုၚ်စိုပ် ပန်ပှော်လဝ် နကဵုကွဳလိုန်ဓာတ်တုဲဂှ် နူလပါ်ကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍိုက်ကွဳလိုန်ဓာတ်ရ။
ကြဴနူပရေၚ်ပန်ပှော်ဒှ်တုဲဂှ် ဟိုတ်နူကံၚ်ဇြဳပၞာန် ကဵုကၠုၚ်သမ္တီမ္ဂး ညးဍိုက်အာကၠုၚ်ကွဳလိုန်ဓာတ်ဂမၠိုၚ် ရပ်ဏောၚ်ဂးတုဲ ဟိုတ်နူဗက်ကဵုကၠုၚ် သမ္တီသာ်ဏံတုဲ သွက်ပရေၚ်အာကၠုၚ် ပ္ဍဲဒေသတအ်ဂှ် ဒှ်ကၠုၚ်ခက်ခုဲရ။
ဒၟာနူလပါ်ကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍာ်ကွဳလိုန်ဓာတ်ဂှ်ရ ပါဲနူပရေၚ်လုပ်ကၠောန်ကမၠောန်ဂှ် စတမ်နူပရေၚ်ထတ်ယိုတ်၊ ပရေၚ်ပိုန်ဒြပ်ကီု သီုကဵုပရေၚ်ပလံၚ်ဘာ ကုကောန်ၚာ်တအ်ဒှ်တမ် ဒးဆေၚ်ဒၟံၚ်မုက်ကဵု တၚ်ခက်ခုဲနာနာသာ်ရဂှ် ညးဒေသမွဲတၠ ဟီုသ္ဂးလဝ်ရ။
အခိၚ်လၟုဟ်ဏံမ္ဂး ညးဒေသကာန်ပေါက်တအ်ဂှ် ဟိုတ်နူလပါ်ကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍိုက်ကွဳလိုန်ဓာတ်ဂှ်ရ ဒးသုၚ်စောဲကၠုၚ် တွာ်ဇိုၚ်၊ ကွဳလိုန်၊ သၠာပိ၊ ကွဳစက်ဓဝ်လာတအ်တုဲ ဒးအာကၠုၚ်ဒၟံၚ်ရ။
ပ္ဍဲပရေၚ်သ္ကိုပ်အုပ်ဓုပ် ဂကောံကွာန်ကာန်ပေါက် ကံၚ်ဇြဳပၞာန်ခါန်ကၞက်လဝ် ပါလုပ်သီုဥူခေန်သိုဝ် (၃) တၠတအ် ဒးဒုၚ်ပန်ပှော်လဝ်ဂှ် ဒးချိုတ်လဝ် မွဲတၠတုဲ သ္ကိုပ်အုပ်ဓုပ်ကဵု ကောန်ရဲညး ဒၟာနူဂွံလဝ်ဘဲဝပ် သ္ကာတ်မြဟ်ဒၟံၚ်ဂှ်ရ တိုန်စိုပ်လွဳလွတ်ဒၟံၚ် ပ္ဍဲရုၚ်ဂဥုဲပွိုၚ်တိုက် ကာန်ပေါက်ရ။
ကံၚ်ဇြဳပၞာန်ဂှ် နကဵုတၚ်စုတ်စောဲ ပါလုပ်ဆေၚ်စပ်ဒၟံၚ် ပ္ဍဲပရေၚ်ပန်ပှော်ဂှ်ဂးတုဲ ရပ်ကေတ်လဝ် ညးဒေသတအ် (၁၂) တၠတုဲ စၟဳစၟတ်ဒၟံၚ် ပ္ဍဲဗ္ဒပ်ပၞာန်ဍာ် မောရဝတဳရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)