မတ်မလီု၊ ဂျာန္နဝါရဳ(၂၈)
ပ္ဍဲတွဵုရးဍုၚ်မန်၊ ကြဴနူဒဒန်ပသဲကွဳပၟတ် မၞုံအကြာသၞေဟ်မုပ္ပလေန်ကဵု သၞေဟ်ကျာ်ကသာ မၞုံပွိုၚ်ဍုၚ်ကျာ်ထဝ် ဒးဒုၚ်တံၚ်ခတိုဟ်လဝ်မာၚ်တုဲဂှ် ပရေၚ်ဓရိပ်ပလံၚ် ကွဳပၟတ် မတ်မလီု-လဂုၚ်ဂှ် ဒေါံဇူလဝ် မွဲခနဘာ်အံၚ်ရဂှ် ဂွံတီကေတ် နူညးတာလျိုၚ်သၞေဟ်ကွဳပၟတ် ဍုၚ်မတ်မလီုရ။
ဒဒန်ပသဲဂၠံၚ်ကွဳပၟတ်ဏံ ပ္ဍဲဂိတုဂျာန္နဝါရဳ တုဲကၠုၚ်စၟတ်တ္ၚဲ (၂၆) အခိၚ်နူဂယး ၜိုတ်(၄)နာဍဳဂှ် ပါဗုမ်ဖံက်ခတိုဟ်လဝ်မာၚ်ဂှ်ရ ဂၠံၚ်ပသဲကွဳပၟတ်ဂှ် တ္ၚံက်ကဝိုၚ်အာလဝ်နွံကီု သီုကဵုဗ္ဒၚ်ဒဒန်တအ်လေဝ် ဒကးကရောန်ကၠုၚ်လဝ်ရ။
ဟိုတ်နူဒဒန်ပသဲ ဂၠံၚ်ကွဳပၟတ် လီုလာ်လဝ်တုဲ ဟိုတ်နူအကာဲအရာ ပရေၚ်ခိုၚ်ကၠိုက်ဒဒန် ကွဳပၟတ်တတ်အာကၠုၚ်ဟွံမာန်ဂှ်ရ ပ္ဍဲဂိတုဂျာန္နဝါရဳ စၟတ်တ္ၚဲ (၂၇)ဂှ် ပလီုကၠုၚ် လၟေၚ်တရဴကွဳပၟတ် တိုန် RBE စၟတ်(၈၂)ကေုာံ ကွဳပၟတ်ထိုၚ်ကျာပရဟ် တိုန် စၟတ်(၉၀)တအ်ရဂှ် ဟီုသ္ဂးလဝ်ရ။
သၟာအာတရဴ ရာန်လဝ်စၟတ်တဲသွက်လၟေၚ်တရဴ မတ်မလီု-လဂုၚ် ရုပ်သီထောံလဝ်တအ်ဂှ်မ္ဂး ပ္ဍဲရုၚ်စၟတ်တဲကွဳပၟတ်ဇၟာပ်တ္ၚဲဂှ် ကလေၚ်ကဵုအာသြန်ၚုဟ်စၟတ်တဲ စတမ်နူအခိၚ် (၆)နာဍဳနူဂယးတ္ၚဲဏံရဂှ် လလောၚ်တြးလဝ်ရ။
ညးမၞုံတာလျိုၚ်သၞေဟ်ကွဳပၟတ်မတ်မလီုမွဲတၠဂှ်မ္ဂး ဟိုတ်နူကလေၚ်ပလေဝ်ပလေတ်ဒၟံၚ်ဂၠံၚ်ကွဳပၟတ်ဒဒန်ပသဲတုဲ သွက်ဂွံကလေၚ်ဓရိပ်လၟေၚ်တရဴ မတ်မလီု-လဂုၚ်ဂှ် လအ်ၜိုတ်မွဲသတ္တာဟမာန်ရဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ဂၠံၚ်ကွဳပၟတ် မတ်မလီု-လဂုၚ်ဂှ် ကြဴနူဒပ်ပၞာန်သီအဝဵုတုဲ ဟိုတ်နူဒးဒုၚ်တံၚ်ခတိုဟ်လဝ်မာၚ် ဟွံအောန်နူ (၆)ဝါနွံတုဲ ခြာဟွံလအ်ဟွံလအ် ဒးဒေါံဇူဒၟံၚ် ပရေၚ်ဓရိပ် ပလံၚ်ဗစိုပ်ရ။
ပ္ဍဲဂိတုဒဳဇြေမ်ဗာ တုဲကၠုၚ်တေံဂှ်လေဝ် ၜိုန်ရဆက်သၠဲပ္တိတ် ကွဳပၟတ်ဒရိပ်ဗ္တံတၟိကီုလေဝ် ဟိုတ်နူဂၠံၚ်ကွဳပၟတ် ဒးဒုၚ်တံၚ်ခတိုဟ်လဝ်မာၚ်တုဲ လၟေၚ်တရဴဗ္တံဂှ် ဂွံဓရိပ်လဝ် ပွိုၚ်ၜိုတ်မွဲသတ္တာဟတုဲ ဒးကလေၚ်ပလီုကၠုၚ် လၟေၚ်တရဴဂှ်ရ။
ဇၟာပ်ဒဒှ်တ္ၚဲ နဒဒှ်လၟေၚ်တရဴကွဳပၟတ် မတ်မလီု-လဂုၚ်ဂှ် ပ္ဍဲအခိၚ်နူဂယး (၉)နာဍဳ ကွဳပၟတ်ထိုၚ်ကျာ ဓရိပ်ဒၟံၚ်ကီု၊ ပ္ဍဲဇၟာပ်သတ္တာဟ ပ္ဍဲတ္ၚဲအဒိုတ်၊ ဗုဒ္ဓဝါ ကေုာံသိုက်တအ်ဂှ် အခိၚ်နူဂယး(၈)နာဍဳ ကဝါ်ဂှ် ကွဳပၟတ်လဂုၚ်-မတ်မလီု ဂကူ RBE ကွဳပၟတ်တ္ၚဲ ဓရိပ်ပလံၚ်ဒၟံၚ်ရ၊
ပရိုၚ်-သြၚ်လောန်တိုၚ်(မ်)