ဖျူ – ဂျာန္နဝါရဳ(၂၈)
ရးဒေသဗဂေါ၊ ပ္ဍဲပွိုၚ်ဍုၚ်ဖျူ ကေုာံပွိုၚ်ဍုၚ်ညံၚ်လေဝ်ပေန်ဂှ် က္ဍိုပ်သ္ကိုပ်ပျူသဝ်ထဳ(၃)တၠ ပံက်ဝိုၚ်ဝေၚ်တုဲ ကဵုဒၟံၚ်ကံၚ်ဇြဳပၞာန် အကံက်တအ်ဂှ် ပန်ပသောၚ်သ္အးလဝ် နဒဒှ်ပရေၚ်ချဳဒရာၚ်ပၞာန် နာန်ထိုက်အံၚ်ရဂှ် PDF ဗဂေါ လလောၚ်တြးလဝ်ပရိုၚ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၅) ပ္ဍဲအခိၚ်နူဂယးဂှ် ပန်ပသောၚ်လဝ် ပျူသဝ်ထဳ မျိုဝ်ဇြဝ်ဥူ၊ က္ဍိုပ်မၞိဟ်ပရမ် ပျူသဝ်ထဳမေန်အံၚ်(က)သဝ်လေဝ်ဂွေကီု သီုသမ္ဘာညး မၞုံယၟုအိမန်တအ်ရ။
ပျူသဝ်ထဳ မျိုဝ်ဇြဝ်ဥူဂှ်မ္ဂး ပသောၚ်သ္အးလဝ် ပ္ဍဲဂၠံၚ်ဗဂေါ ဍုၚ်ညံၚ်ပေန်တာ ပွိုၚ်ဍုၚ်ဖျူတုဲ ညးတေံဂှ် ပရေၚ်ကဵုဒၟံၚ်ပရိုၚ် ကဵုကံၚ်ဇြဳပၞာန်ကီု၊ ပံၚ်ကဵုကောန်ပၞာန်၊ ဗၠာဲသၟိၚ်တအ်တုဲ ကၠောန်သ္ပဒေၚ်ပေါဲဗဝ်၊ ချေဝ်ၜါမ၊ ချေဝ်ပိမဇၞော်တအ်တုဲ ကဵုမံၚ်အကံက်ကဵု ကံၚ်ဇြဳပၞာန်ရဂှ် ဓမံက်ထ္ၜးလဝ်ရ။
သ္အာၚ်နူဂှ်ပၠန် က္ဍိုပ်မၞိုဟ်ပရမ် အထံက်တိုၚ် ကဵုဒၟံၚ်ပရိုၚ်ကံၚ်ဇြဳပၞာန် ပျူသဝ်ထဳမေန်အံၚ်(က)သဝ်လေဝ်ဂွေကီု သီုသမ္ဘာညး မၞုံယၟုအိမန်တအ်ဂှ် ဒးဒုၚ်ပန်ပသောၚ်လဝ် ဃောကလေၚ်စဴကၠုၚ် နူဝိုၚ်စာၚ်တုဲ ညးတအ်ဂှ် ပံၚ်ကဵုကောန်ပၞာန်၊ ဗၠာဲသၟိၚ်တအ်တုဲ ကၠောန်ဗဒှ်ပေါဲစာၚ်၊ ပေါဲဒဵုလာ်၊ ဝိုၚ်ဝေၚ် ဂေတ်မံၚ်လၟေၚ်ၚ်ကွာန်တုဲ ဒှ်မၞိဟ်ကဵုမံၚ်ကံၚ်ဇြဳပၞာန် အကံက်ရဂှ် ဂွံတီကေတ်ရ။
ညးတအ်ဂှ်မ္ဂး ပ.က.ဖ ပွိုၚ်ဍုၚ်ဖျူကဵု ပ.က.ဖ ပွိုၚ်ဍုၚ်ညံၚ်လေဝ်ပေန်တအ် ပန်ပှော်ပသောၚ်သ္အးလဝ်တုဲ ပရေၚ်ဇီုကပိုက် လပါ်ဒပ်စဵုဒၞာညးဍုၚ်ကွာန် မမိက်ကဵုမွဲမွဲ ဟွံမွဲရဂှ် ဟီုသ္ဂးလဝ်ရ။
ပန်ပှော်ဗတိုက်အာ သၟဝ်တဲမပ္တံကဵု အထံက်တိုၚ်ကံၚ်ဇြဳပၞာန် ပျူသဝ်ထဳကဵုပရိုၚ် ကဵုဒၟံၚ်ဒဒိုက်ကဵုညးဍုၚ်ကွာန်၊ ဂကောံသုၚ်ဆီတအ်ဏောၚ်ဂှ် ပ.က.ဖ ပွိုၚ်ဍုၚ်တအ် လလောၚ်တြးလဝ်ပရိုၚ်ရ။
ပရေၚ်ချဳဒရာၚ်ပၞာန် နာန်ထိုက်အံၚ်ဂှ်လေဝ် သွက်ဂွံသၠုၚ်ပတိုန်အာအသိၚ် ပ္ဍဲကဵုဍုၚ်ဇၞော် မပါလုပ်သီုလဂုၚ် အၚ်ဝတအ် နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Bago Region PDF