မတ်မလီု – ဂျာန္နဝါရဳ(၂၈)
အခိၚ်လၟုဟ်ဏံ ဂကောံပၠန်ဂတးသီုဖအိုတ်ဂှ် လးဖျေံဒၟံၚ်မုက်ပၞာန် ပ္ဍဲကဏ္ဍပရေၚ်ဍုၚ်ကွာန် ပရေၚ်ပၞာန်သီုဖအိုတ်ရဂှ် ညးလုပ်ဂကောံကဝ်မတဳ ပရေၚ်ဓမံက်ရုပ်ရဴ ပရေၚ်အုပ်ဓုပ်ညးဍုၚ်ကွာန် ကာလဒေသန္တရအကြာ ဗဟိုဝ် အလဵုအသဳပရေၚ်ညဳသၟဟ်ကောန်ဂကူ ဝန်ဇၞော်သၟာကမၠောန် နာဲသုဝဏ္ဏ ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ(၂၇)တ္ၚဲဏံအခိၚ်နူဂယး ပ္ဍဲပေါဲဆဵုဂဗသဳကၠဳ ကဝ်မတဳဓမံက်ရုပ်ရဴ ပရေၚ်အုပ်ဓုပ်ညးဍုၚ်ကွာန် ကာလဒေသန္တရအကြာ ဗဟိုဝ်ကဵု ဂကောံအုပ်ဓုပ် ရးသေတ်ဂါၚ်၊ ရးမဂွေတအ်ဂှ် ဟီုသ္ဂးလဝ် သာ်ဏံရ။
အခိၚ်လၟုဟ်ဏံဂှ် ပ္ဍဲကဏ္ဍပရေၚ်ဍုၚ်ကွာန်၊ ပရေၚ်ပၞာန်ဖအိုတ်ဂှ် နူဂကောံပၠန်ဂတးသီုဖအိုတ် လးဖျေံဒၟံၚ်မုက်ပၞာန်ရ၊ ပရေၚ်ဓမံက်ရုပ်ရဴ ပရေၚ်အုပ်ဓုပ် ပ္ဍဲဗလးမုက်တိဂှ် ပၟိက်ဇၞော်ဒၟံၚ်တုဲ ပံၚ်တောဲတုဲ သွက်ဂွံရေၚ်တၠုၚ်အာရ။ ပ္ဍဲအရာဓမံက်ရုပ်ရဴဂှ် ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ထတ်ယိုတ်၊ ပရေၚ်စဵုဒၞာ ပ္ဍဲမပ္တံဗီုဏံတအ်ဂှ် နွံဒၟံၚ်ပၟိက် သွက်ဂွံကၠောန်ရေၚ်တၠုၚ် သီုစိုတ်သီုစရိုတ်ရ” ဂှ် ဝန်ဇၞော်ဟီုသ္ဂးလဝ်ရ။
ဂကောံအုပ်ဓုပ်ညးဍုၚ်ကွာန် နူရးသေတ်ဂါၚ်ကေုာံရးမဂွေတအ်ဂှ် သဳကၠဳလဝ်တၚ်ခက်ခုဲဒးဆဵုဂဗလဝ်ပ္ဍဲဗလးမုက်တိတုဲ ညးမၞုံတာလျိုၚ်မဆေၚ်စပ်တအ် ကလေၚ်သောၚ်ကလးကဵုလဝ်ရ။
သ္အာၚ်နူဂှ်ပၠန် ဂကောံအုပ်ဓုပ်ညးဍုၚ်ကွာန် ခရိုၚ်ပခုက္ကူကဵု ခရိုၚ်ကာန်ဘလူတအ် စပ်ကဵုပရေၚ်စှ်ေလ္ၚတ် စၟဳစၟတ်တိဍာ်တုဲ သောၚ်ကလးကဵုလဝ် ပရေၚ်ရေၚ်တၠုၚ်ကမၠောန်၊ တၚ်ကဵုကသပ်၊ တၚ်သ္ၚဳဂၠိပ်တအ်ရဂှ် ဂွံတီကေတ်လဝ်ရ။
ကောံဓရီုဂှ် ဝန်ဇၞော်လုပ်ဂကောံ ကဝ်မတဳ ဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ကာလဒေသန္တရအကြာ ဗဟိုဝ် ဂမၠိုၚ်ကီု။ ဒု-ဝန်ဇၞော်ကၟိန်ဍုၚ်ဂမၠိုၚ်ကီု၊ ဝန်အပ္ဍဲဒ္တန်ဂမၠိုၚ်တအ်ကီု၊ ဖက်ဆောဝန်အပ္ဍဲဒ္တန်ဂမၠိုၚ်၊ ညးမၞုံတာလျိုၚ်နူဌာနနာနာ၊ က္ဍိုပ်သ္ကိုပ်ပရေၚ်အုပ်ဓုပ်ညးဍုၚ်ကွာန် ပ္ဍဲရးသေတ်ဂါၚ် ရးမဂွေတအ် ကေုာံညးလုပ်ဂကောံဂမၠိုၚ်တအ် တိုန်စိုပ်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)