လံၚ်လုၚ်၊ ဂျာန္နဝါရဳ (၃၀)
နကဵုညးဒုၚ်ကာ Non CDM သၟဝ်တဲကံၚ်ဇြဳပၞာန် နူပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳတံ အပ္ဍဲပွိုၚ်မွဲသတ္တာဟ သွက်ဂွံနုက်တိတ်ကဵု ဗွဲမပြဟ်အိုတ်ဂှ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်လံၚ်လုၚ် (LLPDF) တံ ပ္ဍဲဂိတုဂျာန္နဝါရဳ (၂၂) ဂှ် လလောၚ်ပ္တိတ်လဝ် လိက်ကဵုသတိ အလန်လက္ကရဴအိုတ်ရ။
ပဳဒဳအေဖ် လံၚ်လုၚ်ဂှ် ညးဒုၚ်ကာ Non CDM တံဝွံ သွက်အာယုက်ကံၚ်ဇြဳပၞာန် ဂွံဂၠိၚ်ဂှ် ဒဒှ်ရဒှ်မၞိဟ်ရီုဗၚ်ကဵုဒၟံၚ် နဒဒှ်လေံထံက်အဓိကဂှ်ကီု၊ ညးဍုၚ်ကွာန်ဂမၠိုၚ်တံလေဝ် ဒးဆေၚ်ဒၟံၚ်မုက် ကုဒဒိုက်နာနာသာ်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဟိုတ်ဂှ်ရ နကဵုညးဒုၚ်ကာ Non CDM တံ ဂိတုဖေဖဝ်ဝါရဳ စၟတ်တ္ၚဲ (၃) ကၠုၚ်စိုပ်ဏံ စွံလက္ကရဴအိုတ်တုဲ သွက်ဂွံပါ်ဍာန်ကဵု ကံၚ်ဇြဳပၞာန်၊ သွက်ဂွံစ္ဍးအာ ဗွဲမပြဟ်ဂှ် ကဵုလဝ်သတိတုဲ ဟွံဒ္ဂေတ်ဗက် တၚ်ကဵုသတိ လက္ကရဴအိုတ်တံဂှ်မွဲသာ် ယဝ်ရဆက်ကၠောန်ၜိုတ်ဒၟံၚ်မ္ဂး ဒးဒုၚ်စသိုၚ်ဖဵုအဆက်လက္ကရဴတံရောၚ်ဂှ် သ္ဂးလဝ်ရ။
ညးဒုၚ်တာလျိုၚ်လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်လံၚ်လုၚ်ဂှ် ကဵုသတိ ကုညးဒုၚ်ကာ Non CDM တံဂှ်ဝွံ ဒဒှ်ရ ဒှ်အလန်လက္ကရဴအိုတ်ဂှ်ကီု၊ ပွမကေတ်ဒုဟ် သ္ကုတ်လက္ကရဴတံ သ္ကာတ်မြဟ်ကၠုၚ်မာန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်လံၚ်လုၚ်ဂှ် ပ္ဍဲကဵုဌာနမဆေၚ်စပ် မပါလုပ်လဝ် ပ္ဍဲကဵုပရေၚ်ချဳဒရာၚ် ဇြဳဒဳအေမ် ဒစဵုဒစးအဝဵု နနဲဟွံပကီုပရာပ်တံဂှ် ဌာနပရေၚ်ပညာ ပါလုပ်ဂၠိုၚ်အိုတ်တုဲ ပ္ဍဲကဵုအလုံပွိုၚ်ဍုၚ်မွဲဂှ် ညးဒုၚ်ကာကၟိန်ဍုၚ် မသ္ပလဝ် ဇြဳဒဳအေမ်တံ မၞုံဒၟံၚ် (၁၀၀၀) ပြၚ်ဂှ် ဂွံတီကေတ်ရ။
အလုံမွဲကၟိန်ဍုၚ်ဂှ် ညးဒုၚ်ကာ မသ္ပလဝ်ဇြဳဒဳအေမ် ဒၟါနူဟွံဒုၚ်တဲ ကုပရေၚ်ပၞာန်သီအဝဵုတံဂှ် မၞုံဒၟံၚ် ဂၠိုၚ်ကဵုကိုဋ်တုဲ ကံၚ်ဇြဳပၞာန်ဂှ် သုၚ်စောဲနဲကဲနာနာသာ်တုဲ ပ္ဍဵုပ္ဍိုက်ဒၟံၚ်ညးတအ်ရ။
ပရိုၚ်−သြၚ်လောန်တိုၚ်(မ်)