ကြုၚ်ဒဵု၊ ဂျာန္နဝါရဳ (၃၀)
အပ္ဍဲပွိုၚ်ဍုၚ်ကြုၚ်ဒဵု တွဵုရးကရေၚ် ပဋိပက္ခပရေၚ်ပၞာန်တံ မက္တဵုဒှ်လဝ် ဗွဲမသ္ကာတ်မြဟ်ဂှ် အကာဲအရာပရေၚ်ပၞာန် ပြဟ်ဟ်ဏံ ညိၚ်ဝတ်ဒၟံၚ်ကီုလေဝ် ဒပ်ကံၚ်ဇြဳပၞာန် ဟိုတ်နူကၠောန်သ္ပပန်ပှော်လဝ် လွဟ်ဇၞော် အပ္ဍဲကွာန်တံဂှ်ရ ညးဍုၚ်ကွာန်ပါဲဒဴဘဲပၞာန် ဗွဲမဂၠိုၚ် ဟွံဂံၚ်ကလေၚ်စဴဌာန်ဒၟံၚ်အိုတ်ဏီပုဟ်ဂှ် ညးဒေသပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာဒပ်ကံၚ်ဇြဳပၞာန် မချဳဒရာၚ်ထ္ပက်ကၠုၚ်ကရောၚ်ပၞာန် လ္ပာ်ကွာန်ကအ်ဗိုတ်၊ ဂြိုပ်ကြုက်၊ ညံၚ်ယုက်တာ(ညောၚ်ရိပ်သာ) ၊ မိဂလုံ၊ ကအ်ကျာ် ပွိုၚ်ဍုၚ်ကြုၚ်ဒဵုဂှ်ကဵု ဒပ်ပံၚ်ကောံမဟာမိတ်ပၠန်ဂတးတံဂှ် ပေါဲဗ္တိုက်သ္ကာတ်မြဟ်လဝ် နူဂိတုဂျာန္နဝါရဳ (၂၀) စဵုကဵု (၂၆) တုဲ ဟိုတ်နူပေါဲဗ္တိုက်တံတုဲ ညးဍုၚ်ကွာန်ဒေသ နူအပ္ဍဲပွိုၚ်ဍုၚ်ကြုၚ်ဒဵု (၁၀၀၀၀) ပြၚ် ဒးဂြိပ်ဒဴပါဲဒလေတ်လဝ်ရ။
ပ္ဍဲကဵုပေါဲဗ္တိုက် မက္တဵုဒှ်လဝ် အပ္ဍဲပွိုၚ်ဍုၚ်ကြုၚ်ဒဵုတံဂှ် လ္ပာ်ဒပ်ကံၚ်ဇြဳပၞာန် ဇီုကပိုက်ဂၠိုၚ်လဝ်တုဲ နူကဵုအပ္ဍဲကွာန် မထ္ပက်ဒၟံၚ်ကရောၚ်ပၞာန်တံဂှ် ကလေၚ်ဆုတ်အာလဝ် ပ္ဍဲဍုၚ်ကြုၚ်ဒဵုတုဲ သွက်ဂွံထ္ပက်ကရောၚ်ပၞာန် လ္ပာ်ကွာန်နံၚ်တမာန်၊ ကအ်ဝါလေဝ် မၞုံလ္ပာ်ဗၟံက်ဍုၚ်ကြုၚ်ဒဵုတံဂှ် လုပ်စိုပ်ကၠုၚ်ဒၟံၚ်ရောၚ် ဂွံတီကေတ် နူကဵုဇရေၚ်ညးဒေသတံရ။
အခိၚ်လၟုဟ်ဂှ် အပ္ဍဲဒေသကြုၚ်ဒဵုဂှ် ပေါဲဗ္တိုက်ဆေၚ်မုက်တံ က္တဵုဒှ်မံၚ်ဟွံမွဲကီုလေဝ် လ္ပာ်ဒပ်ကံၚ်ဇြဳပၞာန်တံ ဟိုတ်နူပန်ပှော်လွဟ်ဇၞော် အပ္ဍဲကွာန်တံ နွံဒၟံၚ်တုဲ ပ္ဍဲအကာဲအရာလၟုဟ်ဂှ် ဟွံဂံၚ်စဴဌာန်ဒၟံၚ်ဏီပုဟ်ဂှ် ညးဒေသပါဲဒဴဘဲပၞာန်မွဲတၠ ဟီုရ။
ညးပါဲဒဴဘဲပၞာန် မၞုံအပ္ဍဲဒေသကြုၚ်ဒဵုတံဝွံ ပါဲဒလေတ်လဝ် ပ္ဍဲဘာလကျာ် ဗ္ဒါဲဗ္ဒါဲကွာန်တံ၊ သ္ၚိမိဿဟာဲပြဲဇွာတံတုဲ လ္ၚဵုတံဂှ်တှ်ေ ဒးပါဲဒလေတ်လဝ် ပ္ဍဲဒဵုဂြိုပ်ယာယဳတုဲ ဂကောံမထံက်ပၚ်ရီုဗၚ်ကဵုဒၟံၚ် သွက်ပရေၚ်မံၚ်စံၚ်တံ ကၠုၚ်စိုပ်ရီုဗၚ်ကဵုဒၟံၚ်ရောၚ်ဂှ် သ္ဂးရ။
ပြဟ်ဟ်ဏံ အပ္ဍဲပွိုၚ်ဍုၚ်ကြုၚ်ဒဵု၊ ကအ်ကြိက် ကေုာံ လှာဒကှ် တိဍာ်ဒပ်မဟာ (၆) ခရိုၚ်ဒူပလာယာ ကေအာန်ယူဂှ် လၟိဟ်ညးပါဲဒဴဘဲပၞာန်တံ သာဂၠိုၚ်ကၠုၚ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် နူကဵုဇရေၚ်ညးမရီုဗၚ်ရေၚ်တၠုၚ်ကဵုဒၟံၚ် သွက်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)