လဂုၚ်၊ ဂျာန္နဝါရဳ(၃၁)
စပ်ကဵုပေါဲရုဲမာဲ ကံၚ်ဇြဳပၞာန်ပလေဝ်ပလေတ်ဒၟံၚ် သွက်ဂွံကၠောန်ဗဒှ်တုဲ မၞိဟ်ပူဂိုလ်၊ ဂကောံ ပံၚ်တောဲရေၚ်တၠုၚ်ဒၟံၚ်တအ်ဂှ် စၟတ်သမ္တီအာ နဒဒှ်ညးကဵုဇြဟတ် ပ္ဍဲအရာကလိလောန် ကမၠောန် သပုန်ဒစဵုဒစးကဵုကၟိန်ဍုၚ်ရောၚ်ဂှ် ဗော်ဒဳမဝ်ကရေဇြဳကောန်ဂကူ (NLD) လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ (၂၉) ဂှ်ရ။
အတိုၚ်တၚ်လလောၚ်တြးဂှ်မ္ဂး ပရေၚ်ကံၚ်ဇြဳပၞာန် ဖံက်ပ္ကဝ်လဝ် သၞောဝ်ဥပဒေမၞုံတန်တဴဒၟံၚ်တုဲ ကလိလောန်လဝ် ပရေၚ်ပုန်ဒစဵုဒစးကဵုကၟိန်ဍုၚ် ကၠောန်ရေၚ်တၠုၚ်ဒၟံၚ်ဂှ် ဟိုန်နူဟွံလုပ်ကဵုသၞောဝ်ဂှ်ရ ပ္ဍဲလတူပေါဲရုဲမာဲ ဍေံတအ်ကၠောန်ဗဒှ်ဂှ် နကဵုဗော် NLD ပါဲတး ဒစဵုဒစးအာရောၚ်ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် နကဵုဗွိုၚ်ကၟိန်ဍုၚ်နာနာဂမၠိုၚ် မပါလုပ်သီုအာဇြဳယာန်တအ်ဂှ် ပရေၚ်ဒက်ပ္တန် ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ကေုာံ ညံၚ်ဂွံဓမံက်ပတိုန်ကေတ်အရေဝ် ဒုဟ်ရာဇဝတ်ကံၚ်ဇြဳပၞာန် ကလိလောန်လဝ် အတိုၚ်သၞောဝ်ဥပဒေ ကၟိန်ဍုၚ်နာနာမာန် သွက်ဂွံကဵုအရီုဗၚ် ညံၚ်ဂွံစိုပ်တရဴ လတူနူဏံမာန်ဂှ် NLD အာတ်မိက်ဗတိုက်ဖ္အောဝ်လဝ် ဗွဲလၟေၚ်မေတ္တာရ။
အတိုၚ်တၚ်ဂၞၚ် ဂကောံကံက်ကပှ်တၚ်ဂၞၚ် ပရေၚ်ဖံက်ပ္ကဝ်အခေါၚ်အရာမၞိဟ် ဗော် NLD (NLD-HRDT) ပကောံပကေဝ်လဝ် စဵုကဵုစိုပ် ဂိတုဂျာန္နဝါရဳ စၟတ်တ္ၚဲ (၅) ပ္ဍဲမွဲကာလသီအဝဵုဏံ ညးလုပ်ဗော် NLD ၁,၂၃၂ တၠ မပါလုပ် သီုညးစၞးကၠတ် (၈၀) တၠတအ်ဂှ် ဒးဒုၚ်ရပ်လဝ်ဖိုဟ်ဏီရ။
ပ္ဍဲကဵုပရေၚ်ပြိုက်ဂစိုတ် ဟၟဲကဵုဟိုတ်ဂှ်လေဝ် ညးစၞးကၠတ်ထဝ် (၂)တၠကီု သီုညးလုပ်ဗော် NLD ၈၄ တၠ နွံကၠုၚ်တုဲ ပ္ဍဲပရေၚ်ကၟာတ်ဒၞာပရေၚ်ပိုၚ်ပြဳ မပါလုပ်သီုသ္ၚိဌာန်တအ်ဂှ်လေဝ် ပရေၚ်ပိုၚ်ပြဳညးစၞးကၠတ်ထဝ် (၂၀၆) တၠကီု သီုညးလုပ်ဗော် NLD (၃၇၁)တၠတအ် ပါလုပ်ဒၟံၚ်ရဂှ် NLD-HRDT ဓမံက်ထ္ၜးလဝ်ရ။
သ္အာၚ်နူဂှ်ပၠန် ရုပ်ဌာန်ဂအုပ်ဗော်ကီု သီုရုၚ်ကဆံၚ်ကဆံၚ်တအ်လေဝ် ပရေၚ်လောန်ၜက်လုပ်စိုပ် ပလီုပလာ်၊ ကေတ်ဏာကပေါတ် ဗော်ပိုၚ်ပြဳလဝ် ဗွဲအဓမ္မ (၁၂၀) ဝါနွံကၠုၚ်တုဲ ပ္ဍဲပရေၚ်ဒဒှ် သ္ၚိဒၟံၚ်ညးဍုၚ်ကွာန်ဂမၠိုၚ် ဒးဒုၚ်ပ္ကီုပရာပ်၊ ပၠံၚ်ၜး၊ ပလီုပလာ် နွံကၠုၚ် (၉၁၃)ဝါဂှ် စမြိုၚ်အပံၚ်လၟိဟ် (၃၅၀၀၀) ပြၚ် ဒးလီုလာ် ဆောံလေၚ်အာလဝ်ရဂှ် သ္ဂးလဝ်ရ။
ပ္ဍဲပေါဲရုဲမာဲနာနာသၞာံ ၂၀၂၀ ဂှ် နကဵုထ္ၜးဟိုတ် စရၚ်မာဲဗၠေတ်မှာ ဒပ်ပၞာန် ရပ်ဒက်က္ဍိုပ်သ္ကိုပ်ကၟိန်ဍုၚ်တအ်တုဲ သီကေတ်လဝ် အဝဵုကၟိန်တန်ကဵုတန်ဂှ်တုဲ လလောၚ်တြးကၠုၚ် ဒဒှ်ရပါဲတးသီရုပ်လဝ် သွဟ်ပေါဲရုဲမာဲဂှ်ရ။
အခိၚ်လၟုဟ်ဏံမ္ဂး ပ္ဍဲအခိၚ်သီအဝဵု ကြပ်ပေၚ်ကၠုၚ် ပွိုၚ်ၜါသၞာံဏံဂှ် ဟိုတ်နူကံၚ်ဇြဳပၞာန်ပျးဌာန်ကၠုၚ် သၞောဝ်ဥပဒေ ပရေၚ်ပ္တိုန်စၟတ်သမ္တီ ဗော်ပရေၚ်ဍုၚ်ကွာန်တုဲ ဗော် (NLD) ဂှ် အကာဲအရာဒးလီုလာ်ကၠုၚ် အလဵုလဵုနွံဒၟံၚ်ရ။
ပရိုၚ်-သြၚ်လောန်တိုၚ်(မ်)