မတ်မလီု၊ ဂျာန္နဝါရဳ(၃၁)
နကဵုဒပ်ရပ်လွဟ်ဂမၠိုၚ်တအ်ဂှ် ရှ်ေသှ်ေဒ္ဂေတ်ဗက် ဒ္ဂေတ်ဝတ်ပၞာန်တုဲ ဝေၚ်ပါဲကွာန် ဌာန်အရာပ် ညးဍုၚ်ကွာန်တအ် မံၚ်တန်တဴဒၟံၚ်ဂှ်တုဲ ချဳဒရာပံက်အာ မုက်ပေါဲဗတိုက်ညိဂှ် ဗော်ဍုၚ်မန်တၟိ ခရိုၚ်သဓီု ဗတိုက်ဖ္အောဝ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ (၂၉)ဂှ်ရ။
စပ်ကဵုပေါဲဗတိုက် က္တဵုဒှ်လဝ် ပ္ဍဲတွဵုရးကရေၚ် ဍုၚ်ကြုၚ်ဒဵု ကွာန်ကအ်ဗိုတ်(ကာန္နဳ) ကေုာံကွာန်မၞုံဇိုၚ်ကရပ်ဂမၠိုၚ် ကောန်ဂကူမန်ဗွဲမဂၠိုၚ် မံၚ်တန်တဴဒၟံၚ်တအ်ဂှ်တုဲ ဗော်ဍုၚ်မန်တၟိ လလောၚ်တြးကၠုၚ် သာ်ဏံရ။
ပ္ဍဲကွာန်ကအ်ဗိုတ်(ကာန္နဳ) ကေုာံကွာန်မၞုံဇိုၚ်ကရပ်တအ်ဂှ် ပ္ဍဲဂိတုဂျာန္နဝါရဳ နူကဵုစၟတ်တ္ၚဲ (၂၂) စဵုကဵုစၟတ်တ္ၚဲ(၂၆) ဂှ် အကြာကရောၚ်ပၞာန်ပံၚ်တောဲ Lion Battalion Commando ဗိုလ်သဝ်အေဝ်ဇြေဝါ က္ဍိုက်က္ဍိုပ် ကေုာံဒပ် (၅၄၅) သၟဝ်တဲကံၚ်ဇြဳပၞာန်တအ် ပေါဲဗတိုက်ၜါလပါ် က္တဵုဒှ်လဝ်ရ။
ပ္ဍဲကဵုပေါဲဗတိုက်ဂှ် ကရောၚ်ပၞာန်ပံၚ်တောဲ Lion Battalion Commando ဗိုလ်သဝ်အေဝ်ဇြေဝါ က္ဍိုက်က္ဍိုပ် စံၚ်ရုၚ်အုပ်ဓုပ် ကေုာံသ္ၚိဒၟံၚ် ပၞာန်ညးဍုၚ်ကွာန်တအ်မွဲကဆံၚ်ဂှ် ကၠောံထၞာန်ဂွံအာ သ္ၚိဒံၚ်ညးဍုၚ်ကွာန် မၞုံပ္ဍဲကွာန်ကအ်ဗိုတ်(ကာန္နဳ) (၂၁) မကီု ဟိုတ်နူပေါဲဗတိုက်ၜါလပါ်တုဲ သ္ၚိဒၟံၚ် ကွာန်ညံၚ်ယုက် ၜိုတ်(၁၈) မ ဒးတူပၟတ်လီုလာ်အာလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဗော်ဍုၚ်မန်တၟိဂှ်ရ။
သ္အာၚ်နူဂှ်ပၠန် ဟိုတ်နူမကမ်လွဟ်ဇၞော်ကံၚ်ဇြဳပၞာန် ပန်ပှော်ဖျေံခတိုဟ်လဝ်တုဲ သ္ၚိ ပ္ဍဲကွာန်ကအ်ဗိုတ် (၃)မ၊ သ္ၚိ ပ္ဍဲကွာန်ညံၚ်ယုက်(၁)မ၊ သ္ၚိ ပ္ဍဲကွာန်ဂြိုပ်ကြုက် (၇)မ ဒးဇီုကပိုက် လီုလာ်လဝ်ရဂှ် ဟီုသ္ဂးလဝ်ရ။
ပ္ဍဲပေါဲဗတိုက်ၜါလပါ် က္တဵုဒှ်လဝ်ဂှ် ကောန်ကွာန် (၂)တၠ ဂွံလဝ်ဘဲဝပ်နွံဒၟံၚ်ကီု ညးဒေသကဵုလ္ၚီတၠ ဒးဂြိပ်တိတ်ပါဲဓလေတ်ဒၟံၚ် ပ္ဍဲဒေသဗၠးဘဲပၞာန်တအ်ရဂှ် ဟီုသ္ဂးလဝ်ရ။
ဟိုတ်ဂှ်ရ အကာဲအရာဗီုက္တဵုဒှ်လဝ်လၟုဟ်ဏံ ယဝ်ထပ်က္တဵုဒှ်ကၠုၚ်ပၠန်မ္ဂး နကဵုညးဍုၚ်ကွာန် ကောန်ဂကူမန် မၞုံပ္ဍဲဒေသတအ်ဂှ် သွက်ဂွံပလေဝ်ပလေတ်ဖန်ဇန်လဝ် ပရေၚ်ဂီုကၠီု ပ္ဍဲဒေသမာန်ဂှ် ညံၚ်ဂွံပံၚ်တောဲဓမံက်ရုပ်ရဴ မွဲကရောံကဵုဗော်ဍုၚ်မန်တၟိမာန်ဂှ် ဆက်စၠောံရေၚ်တၠုၚ်ကဵု ရုၚ်ပွိုၚ်ဍုၚ်ကေုာံ ခရိုၚ်သဓီု မဆေၚ်စပ်တအ်ညိ အာတ်မိက်ဏာရဂှ် ဗော်ဍုၚ်မန်တၟိလလောၚ်တြးလဝ်ရ။
ဗော်ဍုၚ်မန်တၟိဂှ် ဒှ်ဗော်ရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ပ္ဍဲလိက်ကသုက်တုပ်စိုတ်ပရေၚ်ဒေါံပန်ပှော်အလုံကၟိန်ဍုၚ် NCA ပ္ဍဲလက်ထက်အလဵုအသဳ NLD တေံကီု ကြဴနူဒပ်ပၞာန်သီအဝဵုတုဲ တိုန်စိုပ်လဝ်ပေါဲသဳကၠဳ ပရေၚ်ၜိုဟ်လလံ က္ဍိုပ်သ္ကိုပ်ပၞာန်ကော်ဘိက်ကၠုၚ် ဗၞတ်ပိဝါ မွဲဂကောံရ။
ပရိုၚ်-သြၚ်လောန်တိုၚ်(မ်)