ဍာ်ဗု – ဂျာန္နဝါရဳ(၃၁)
ရးဒေတၞၚ်သဳ၊ ပွိုၚ်ဍုၚ်ဍာ်ဗု၊ ဒေသကာန်ပေါက်၊ ပ္ဍဲကွာန်မေန်တာ ဟိုတ်နူပျူသဝ်ထဳတအ် ပန်ပှ်ောလဝ် ကောန်ကဵုအပါ ဍိုက်ကၠုၚ်ဒၟံၚ်ကွဳလိုန်ဓာတ် နကဵုလွဟ်သေနာတ်တုဲ ညးမဒှ်ကောန် ဂွံလဝ်ဘဲဝပ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ပရောဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၉) အခိၚ်နူဂယးဂှ် ဥူမေန်လာတ် ကေုာံညးမဒှ်ကောန်တအ်ညးၜါ နူကဵုကွာန် (၆၀)မာၚ် တိုန်ကၠုၚ်လပါ်ကွာန်မေန်တာဏံ နကဵုကွဳလိုန်ဓာတ်ဂှ် ဒးဒုၚ်ပန်လဝ်ရ။
“ညးတအ်ဂှ် ဒှ်ကောန်ကွာန်ဇြေန်ဂူ ကၠောန်ဒၟံၚ်ကၠအ် ပ္ဍဲ (၆၀) မာၚ်ရ။ အရိုဟ်တ္ၚဲအဒိုတ် ညးတအ်တိုန်ဒၟံၚ်ဘာကျာ် ပ္ဍဲကွာန်မေန်တာရ။ အေဂှ် ဂကောံပျူသဝ်ထဳဂှ် ဒၟာနူကဵု ဟွံဒေါံကဵုကွဳလိုန်ဓာတ်ဂးတုဲ ပန်လဝ်ရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲပရေၚ်ဒးဒုၚ်ပန်လဝ်ဂှ် ညးမဒှ်အပါ ဒဳဒၟံၚ်ကွဳလိုန်ဓာတ်ဂှ် ဟွံဒးလဝ် လွဟ်မကမ်တုဲ ပ္ဍဲကဵုကောန် ဍိုက်ပါဗက်ကၠုၚ်လကြဴဂှ်မ္ဂး ဒးလဝ်လွဟ်မကမ် ပ္ဍဲတ္ကအ်ကဵု ပ္ဍဲက္ဍိုပ်တုဲ ဒးဒှ်ဒၟံၚ်ဓဝိၚ်ဂှ်ရ ပလံၚ်ဗစိုပ်ဏာလဝ်ရုၚ်ဂဥုဲထဝါဲရဂှ် ညးဟီုလဝ်ဏီရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၂၅) တေံဂှ် ကြဴနူသ္ကိုပ်အုပ်ဓုပ်ကွာန် (၃)တၠ မပါလုပ် သီုဥူခေန်သိုဝ်တအ် ဒးဒုၚ်ပန်လဝ်တုဲဂှ် ကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍိုက်ကွဳလိုန်ဓာတ်ရ။
ကံၚ်ဇြဳပၞာန်ဂှ် နကဵုတၚ်စောတ်စောဲ ပါလုပ်ဆက်စပ်မံၚ်ကဵု ပရေၚ်ပန်ပှော်ဂှ်ဂးတုဲ ရပ်လဝ်ညးဒေသ(၁၂)တၠတုဲ ကၠောန်သ္ပစၟဳစၟတ်ဒၟံၚ် ပ္ဍဲဗ္ဒပ်ပၞာန်ဍာ် မောရဝတဳတုဲ စဵုကဵုလၟုဟ်ဏံ ကလေၚ်ဗလးကဵုကၠုၚ်လဝ် ဟၟဲဏီရဂှ် ဂွံတီကေတ်ရ။
ကြဴနူပရေၚ်ပန်ပှော်ဂှ်တုဲ ဟိုတ်နူကံၚ်ဇြဳပၞာန် ဗက်ကဵုကၠုၚ်သမ္တီ ဂၠာဲရပ်ညးဍိုက်ကွဳလိုန်ဓာတ်ဏောၚ်ဂှ်ရ ပရေၚ်ညးဒေသတအ် အာကၠုၚ်ဂှ် က္တဵုဒှ်ကၠုၚ်တၚ်ခက်ခုဲရ။
အခိၚ်လၟုဟ်ဏံမ္ဂး ပ္ဍဲဒေသကာန်ပေါက် ဟိုတ်နူကံၚ်ဇြဳပၞာန် ကၟာတ်လဒဵုကၠုၚ် အခေါၚ်ဍိုက်ဒဳကွဳလိုန်ဓာတ်တုဲ သုၚ်စောဲ လၟာ်ဇိုၚ်၊ ကွဳလိုန်၊ သၠာပိ၊ ထဝ်ဠာဇၞော်တအ်တုဲ ဒးအာကၠုၚ်ဒၟံၚ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)