ပေါက် – ဂျာန္နဝါရဳ(၃၁)
ပ္ဍဲဒၞာဲဒပ်စဵုဒၞာညးဍုၚ်ကွာန်တအ် ကၠောန်သ္ပဒၟံၚ် ပရေၚ်စၟဳစၟတ် ပ္ဍဲပွိုၚ်ဍုၚ်ပေါက်၊ ရးဒေသမဂွေဂှ် ညးမၞုံကဆံၚ်ဗိုလ်ဇၞော်မွဲတၠ ကေုာံညးမၞုံကဆံၚ်အကြာပ်ဒပ် ကံၚ်ဇြဳပၞာန်တအ် ပါဗက်ကၠုၚ် ကရောံကွဳစက်ညးအရာပ်ဂှ် ဒးဒုၚ်ပန်ပသောၚ်လဝ်တုဲ ဒးချိုတ်အာ ပ္ဍဲကဵုဒၞာဲဂှ်ရဂှ် ပ.က.ဖ မျာၚ် တံဒပ်(၁) ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၇) ဂှ် ကွဳစက်ဂကူ Mark-2 ကောန်ဒပ်ကံၚ်ဇြဳပၞာန် ပန်တၠ တိတ်ကၠုၚ် နူကွာန်ပျူသဝ်ထဳယာဂျဳပေန် ပ္ဍဲဗၟံက်ဍုၚ်ပေါက် ခြာ (၄)မာၚ်ဂှ် ဒးဒုၚ်ဗတိုက်လဝ် ပ္ဍဲဗ္ဒာဲကွာန်အုမ်တာရ။
ဟိုတ်နူပရေၚ်ဒပ်စဵုဒၞာတအ်ဗတိုက်လဝ်တုဲ ကောန်ဒပ်ကံၚ်ဇြဳပၞာန်မွဲတၠကဵု ညးမၞုံယၟုသိုဝ်ထုၚ်လေန် မၞုံကဆံၚ်ဗိုလ် ပါဗက်ကၠုၚ် ပ္ဍဲကွဳစက်ဂှ်မ္ဂး ဂြိပ်တိတ်အာလဝ် သီုကဵုဘဲဝပ်လွဟ်ရဂှ် ပ.က.ဖ မျာၚ် တံဒပ်(၁) ဗိုလ်လေတ်ကျာ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူပရေၚ်ပန်ပှော်ညးသ္ကအ်တုဲ ပ္ဍဲက္ၜံၚ်ကဵု ပ္ဍဲဒၞေဟ် သ္ဂံၚ်ဒပ်စဵုဒၞာမွဲတၠ ဒးလဝ်ဝပ် လွဟ်မကမ်ရဂှ် ညးဟီုလဝ်ဏီရ။
ပရေၚ်ပန်ပှော် ဒှ်လဝ်တုဲဂှ် ၜိုန်ရပလေဝ်ပလေတ် သွက်ဂွံစံၚ်ပလီု ကွဳစက်လပါ်ကံၚ်ဇြဳပၞာန်ကီုလေဝ် သွက်ဂွံကဵုအရီုဗၚ်ပၞာန် ဒၟာနူကြပ်ဒၟံၚ်တုဲ ဂွိၚ်ဖေက်ပရေၚ်ဂီုကၠီု ထောၚ်ပြိုဟ်အာဂှ်ရ ကလေၚ်ဆုတ်ကလေၚ်လဝ်ရဂှ် ဂွံတီကေတ်ရ။
နူကဵုပရေၚ်ပန်ပှော်ဏံ သီဂွံလဝ် လွဟ် MA-3 မွဲဒကိုအ်၊ ဖျေဲကမ် မကမ်နွံ(၆၈) မ၊ Icon မွဲမ၊ ပလောံဒၞာမကမ် မွဲဂတှ်ေတုဲ ပ.က.ဖ မျာၚ် တံဒပ် (၁) ကေုာံ တံဒပ် YDF တအ် ပံၚ်တောဲချဳဒရာၚ်လဝ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)