“ပေါဲရုဲမာဲကံၚ်ဇြဳပၞာန်ဂှ်လေဝ် ပိုဲပါလုပ်ဟွံသေၚ်ပုဟ်၊ ဒစဵုဒစးအာဏောၚ်။ ဗတိုက်သရိုဟ်အာဏောၚ်။ ဟီုတှ်ေ ကိစ္စကံၚ်ဇြဳပၞာန် ကော်ဘိက်ကၠုၚ်တၞဟ်လေဝ် ပိုဲပါလုပ်အာ ဟွံသေၚ်ပုဟ်”

တၚ်ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီုဂး ကံၚ်ဇြဳဖေတ်ဒရေဝ်ဍုၚ်မန်(MSFC) မိသုတဇဝ်

ကဝ်မတဳရေၚ်တၠုၚ် ကေၚ်ကာဍုၚ်မန် ကာလအကြာ (MSICC) ဒက်ပ္တန်လဝ် ပ္ဍဲသၞာံ ၂၀၂၁ သၞာံသီအဝဵုဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၂၂) ကာလသီအဝဵု ကြပ်ပေၚ်ကၠုၚ် အခိၚ်ၜါသၞာံဂှ် ပြံၚ်သၠာဲဒက်ပ္တန်ကၠုၚ် နဒဒှ်ကံၚ်ဇြဳဖေတ်ဒရေဝ်ဍုၚ်မန် (MSFC)ရ။ ဟိုတ်ဂှ်ရ အကာဲအရာ ဒးပြံၚ်သၠာဲဒက်ပ္တန်ကၠုၚ် MSICC နဒဒှ်ကံၚ်ဇြဳဖေတ်ဒရေဝ်ဍုၚ်မန် (MSFC) ကီု၊ လၟေၚ်ကမၠောန်ဆက်ကၠောန်ရေၚ်တၠုၚ်အာ ဂတဏံကီု၊ ဗီုပြၚ်လဵု သွက်ဂွံစဵုဒၞာအာ ပေါဲရုဲမာဲကံၚ်ဇြဳပၞာန်ကၠောန်ဗဒှ်ဏံ နွံရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီုဂး ကံၚ်ဇြဳဖေတ်ဒရေဝ်ဍုၚ်မန် (MSFC) မိသုတဇဝ်ရ။

-အလန်ကိုပ်ကၠာအိုတ်ဏံ နူကဵု MSICC ဂှ် မုဟိုတ်ဂွံပြံၚ်သၠာဲဒက်ပ္တန်ကၠုၚ် ကံၚ်ဇြဳဖေတ်ဒရေဝ်ဍုၚ်မန် (MSFC)ရော။

MSICC ဂှ် ဟိုတ်နူဒှ် ကဝ်မတဳရေၚ်တၠုၚ်ကေၚ်ကာဍုၚ်မန် ကာလအကြာတုဲ သွက်ဂွံဓမံက်ရုပ်ရဴကမၠောန် ဆေၚ်ရာကဵု တွဵုရးဍုၚ်မန်ဂှ် နဒဒှ်ယူနေတ်ဖေတ်ဒရေဝ် ကာလအကြာတွဵုရးဍုၚ်မန်ဂှ် ပြံၚ်သၠာဲစၟတ်သမ္တီကေတ် နဒဒှ်ကံၚ်ဇြဳဖေတ်ဒရေဝ်တွဵုရးဍုၚ်မန်တုဲ မၠောန်ကေၚ်ကာ တွဵုရးဍုၚ်မန်ဂှ် နဒဒှ်သၞောတ်မွဲ သွက်ဂွံဓမံက်အာရုပ်ရဴမာန်တုဲ ပိုဲပြံၚ်သၠာဲကၠုၚ် ယၟုဏံရ။

-လၟေၚ်ကမၠောန် တၚ်ရန်တၟံ ကံၚ်ဇြဳဖေတ်ဒရေဝ်ဍုၚ်မန် (MSFC) ပ္ဍဲသၞာံ ၂၀၂၃ ဏံ အဓိကဂှ် ဒှ်အရာလဵုရော။

ပ္ဍဲကောံဓရီု (MSFC) သၞာံ ၂၀၂၃ ကၠုၚ်စိုပ်ဏံဂှ် အတိုၚ်လၟေၚ်ဂၠံၚ်တရဴ ဗီုပြၚ်ဗလးတိဖျေံကၠုၚ်လဝ်ဂှ် ပိုဲဂှ် မဏ္ဍိုၚ်ပိတန်ရလေဝ်ဏး။ ချူဓဇက် မူဝါဒဆေၚ်ရာကဵု လၟေၚ်ကမၠောန်မပ္တံ ပရေၚ်ခၞံသၞောဝ်၊ ပရေၚ်အုပ်ဓုပ်၊ ပရေၚ်စဳရေၚ်သၞောဝ်တုဲ သွက်ဂွံကၠောန် ရေၚ်တၠုၚ်ဓမံက်အာရုပ်ရဴဂှ် ရန်လဝ်နွံရ။ ပ္ဍဲသၞာံ ၂၀၂၃ ဂှ်တှ်ေ သွက်ဂွံဗတိုက်သရိုဟ် ပေါဲရုဲမာဲဏံဂှ်လေဝ် ပါလုပ်ဒၟံၚ် နဒဒှ်လၟေၚ်ကမၠောန် မွဲကီုရ။

-အတိုၚ်တၚ်လလောၚ်တြး ကောံဓရီုကံၚ်ဇြဳဖေတ်ဒရေဝ်ဍုၚ်မန် (MSFC) အလန်ပထမဂှ် ဆေၚ်စပ်ကဵု ဂကောံတိုန်စိုပ်လဝ်တအ်တုဲ ဂကောံဇြဟတ်ရပ်လွဟ်ကောန်ဍုၚ်အရၚ် (EROs) ဟီုတုဲ ပါလုပ်ဒၟံၚ်ဂှ်ရ အရာဏံဂှ် မိက်ဂွံသ္ဂး (NMSP) ဟာ။ ဟွံသေၚ်တှ်ေ မိက်ဂွံဟီု ဂကောံလဵုရော။

ယွံဍာံမံၚ်ရ။ တုဲပၠန် ပါဲနူဗော်ဍုၚ်မန်တၟိတုဲ ဂကောံရပ်လွဟ်တၞဟ် ဖျေံလဝ်သ္ဇိုၚ် ပ္ဍဲတွဵုရးဍုၚ်မန်တုဲ ဂကောံရပ်လွဟ်တၞဟ်တအ်လေဝ် နွံဒၟံၚ်ကီုဂှ်ရ ပိုဲမိက်ဂွံကဵု ဆက်သုၚ်စောဲအာ နဒဒှ် EROs ရလေဝ်ဏး။

-တၚ်ရန်တၟံပရေၚ်ဍုၚ်ကွာန်ကဵု ဗီုဗလးမုက်တိထ္ၜးဂၠံၚ် ကံၚ်ဇြဳဖေတ်ဒရေဝ်ဍုၚ်မန် (MSFC) ဂှ် ဒှ်ဒၟံၚ်ဗီုပြၚ်လဵုရော၊ ဟီုထ္ၜးကဵုညိ။

ယွံ၊ တၚ်ရန်တၟံကံၚ်ဇြဳဖေတ်ဒရေဝ်ဍုၚ်မန်ဂှ်တှ်ေ ပ္ဍဲကဵုကောံဓရီုပိုဲလေဝ် သဳကၠဳလဝ်နွံရ။ ပိုဲဂှ် ဒက်ပ္တန်အာ ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ကၟိန်ဍုၚ်ပံၚ်ကောံ ကရောံကောန်ဍုၚ်အရၚ် တၞဟ်တအ်မွဲစွံကီု နဒဒှ်ယူနေတ်ဖေတ်ဒရေဝ်ဍုၚ်မန်ကီု နဒဒှ်ကံၚ်ဇြဳဖေတ်ဒရေဝ်ဍုၚ်မန်ကီု မဏ္ဍိုၚ်ဍုၚ်မန်ပိတန်ဂှ် ဆက်တုဲ ဓမံက်အာရုပ်ရဴဏောၚ်။ ပ္ဍဲသ္ဇိုၚ်သၞောဝ်ဒက်ပ္တန်ဂှ်လေဝ် အရာဏံဂှ် ချူဓဇက်လဝ် အဓိကရ။

-နကဵုကံၚ်ဇြဳဖေတ်ဒရေဝ်ဍုၚ်မန် (MSFC) ဂှ် ပ္ဍဲလတူကောံဓရီု ပရေၚ်စဵုဒၞာကောန်ဂကူကဵု ပရေၚ်ဂီုကၠီု ကော်စ စဵုဒၞာဂီုကၠီု ကံၚ်ဇြဳပၞာန်ကော်ကၠုၚ် ပ္ဍဲဂိတုဖေဖဝ်ဝါရဳ ကၠုၚ်စိုပ် စၟတ်တ္ၚဲ (၁) ဏံဂှ် ညာတ်ကေတ်ဗီုလဵုရော။

ၜိုန်ရပိုဲတအ်သဳကၠဳလဝ် ဟွံမွဲကီုလေဝ် ပိုဲဆက်ဒ္ဂေတ်ဗက်အာ အတိုၚ်မူဟွံပံၚ်တောဲကဵု ကံၚ်ဇြဳပၞာန် ကော်ဘိက်ကၠုၚ်ဂှ်ရ။ ပရေၚ်ဗတိုက်သရိုဟ် တၠအဝဵုပၞာန်ကဵု တၠအဝဵုအလုံအိုဿီုဂှ်လေဝ် ဟိုတ်နူဒှ် မူပိုဲချိုတ်တ်ပၠိုတ်တ်ဂှ်ရ နကဵု (MSFC) ပိုဲ ပါလုပ်ပံၚ်တောဲအာ ဟွံသေၚ်ရဂှ်လေဝ် ညာတ်ကေတ်ရ။

-လတူပေါဲရုဲမာဲကံၚ်ဇြဳပၞာန် ကၠောန်ဗဒှ်လၟုဟ်ဏံ နကဵု (MSFC) လစွံစိုတ် ဗီုလဵုနွံရော။

ပ္ဍဲကဵုဗီုရုပ်တိထ္ၜးဂၠံၚ်တရဴ MSFC ဂှ်တှ်ေ ပ္ဍဲသ္ကုတ်ဗတိုက်သရိုဟ်အာ တၠအဝဵုပၞာန်ကီု သီုတၠအဝဵုသီုဖအိုတ်ဂှ်တှ်ေလေဝ်ဏး။ ပေါဲရုဲမာဲကံၚ်ဇြဳပၞာန်ဂှ်လေဝ် ပိုဲပါလုပ်အာဟွံသေၚ်ပုဟ်။ ဒစဵုဒစးအာဏောၚ်၊ ဗတိုက်သရိုဟ်အာဏောၚ်။ ဟီုတှ်ေ ကိစ္စကံၚ်ဇြဳပၞာန် ကော်ဘိက်ကၠုၚ်တအ်ဂှ်လေဝ် ပါလုပ်အာ ဟွံသေၚ်ပုဟ်။

-ဟီုတှ်ေ ညံၚ်ပေါဲရုဲမာဲ သ္ပကဵုကံၚ်ဇြဳပၞာန် ဂွံလုပ်ကဵုသၞောဝ် ဒှ်ပၞော်တိတ်ပရေၚ်ဍုၚ်ကွာန် ညံၚ်ဟွံဂွံဒှ်ကၠုၚ်ဂှ် နကဵု MSFC ဗီုပြၚ်လဵု သွက်ဂွံစဵုဒၞာအာ ပ္ဍဲတွဵုရးဍုၚ်မန်နွံရော။

MSFC ဂှ် ဆက်ဗလးကဵုဒၟံၚ် ညးစၞး NUCC, NUG တအ်ကဵု MSFC တအ်ဖိုဟ်ရ။ တုဲပၠန် ညးစၞး NUCC တအ်၊ ညးစၞး JCC တအ်လေဝ် ပိုဲဆက်ဗလးဏာဒၟံၚ်ဏီဏောၚ်တှ်ေ တုပ်ဗီုနဲဗီုရုပ်ဗလးတိထ္ၜးဂၠံၚ်တရဴ NUCC, NUG တအ်ကီု MSFC လေဝ် ပံၚ်တောဲ နဒဒှ်ကံၚ်ဇြဳဖေတ်ဒရေတ်တုဲ သွက်ဂွံလုပ်အာပေါဲဗတိုက်၊ တုဲပၠန် ညံၚ်ညးဍုၚ်ကွာန်ဍုၚ်မန်တအ် ဂွံပံၚ်တောဲပါလုပ်ဂှ် အတိုၚ်ပိုဲအာတ်မိက် လလောၚ်တြးလဝ် ကရောံ NUCC, NUG, MSFC ဂှ်ရ။

အတိုၚ်ညးဍုၚ်ကွာန်မန်တအ်လေဝ်  ပါလုပ်အာဂှ် ပိုဲတအ်လေဝ် ဆက်ကၠောန်အာအတိုၚ်ဏံဂှ်ရ ပေါဲရုဲမာဲကံၚ်ဇြဳပၞာန်ကၠောန်ဗဒှ်ဂှ် ပိုဲတအ်စဵုဒၞာ ကၟာတ်လဒဵုအာဏောၚ်။

-ဗော်ပရေၚ်ဍုၚ်ကွာန်၊ ညးစၞးဒုၚ်ရုဲစှ် ပ္ဍဲတွဵုရးဍုၚ်မန်တအ်ဂှ် နကဵုMSFC မုမိက်ဂွံဟီု နွံရော။

စပ်ကဵုပေါဲရုဲမာဲတုဲ ညးစၞးMSFCဂှ် ပံၚ်တောဲလဝ် ပ္ဍဲကဵု NUCC တုဲဂှ်ရ ပ္ဍဲကဵုကဝ်မတဳဗတိုက်သရိုဟ် ပေါဲရုဲမာဲဂှ်လေဝ် ပလံၚ်ဗစိုပ်ကဵုလဝ်ညးစၞး MSFC နွံမံၚ်ရ။

-အလန်လကြဴအိုတ်ဏံ ပ္ဍဲပရေၚ်ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်ဒကုတ်အာ၊ ပရေၚ်ဂွံဒက်ပ္တန်ကၟိန်ဍုၚ်ပံၚ်ကောံ ဖေတ်ဒရေဝ် နကဵုအခေါၚ်အရာကံကုသိုလ်ဇကု ဇကုဖန်ဖက်ကေတ်မာန်ဂှ် ဗီုပြၚ်လဵု သွက်ဂွံကၠောန်သ္ပအာ ပရေပံၚ်တောဲ စန္ဒက် ပံၚ်တောဲရေၚ်တၠုၚ်အာ ကရောံဂကောံဇြဟတ်ပၠန်ဂတး ပ္ဍဲတွဵုရးဍုၚ်မန် ဗီုပြၚ်လဵုနွံရော။

MSFC ဂှ် မွဲကရောံကဵု NUCC, NUG တအ်မွဲစွံ နဒဒှ် ကံၚ်ဇြဳဖေတ်ဒရေဝ်ဍုၚ်မန် လၟေၚ်ကမၠောန် ပရေၚ်ခၞံသၞောဝ်၊ ပရေၚ်အုပ်ဓုပ်၊ ပရေၚ်စဳရေၚ်သၞောဝ် တွဵုရးဍုၚ်မန်ဂှ်လေဝ် ညံၚ်ဂွံကၠောန်အာ သီုစိုတ်သီုစရိုတ်မာန်ဂှ် ကောန်ဍုၚ်အရၚ် မၞုံပ္ဍဲတွဵုရးဍုၚ်မန် ဥပမာ- ကောန်ဍုၚ်အရၚ် ပအိုဝ်၊ ကရေၚ်၊ ဗၟာတအ်လေဝ် ညံၚ်ဂွံပံၚ်တောဲပါလုပ်ပ္ဍဲ MSFC ကီု၊ ပါလုပ်ပံၚ်တောဲတုဲမှ ဗတိုက်သရိုဟ်ထောံ သၞောတ်တၠအဝဵုသီုဖအိုတ် အတိုၚ် NUCC, NUG တအ်အာတ်မိက်လဝ်ဂှ် ကရောံပရေၚ်ဍုၚ်မန်မွဲစွံတုဲ ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ပိုဲတအ်ရန်တၟံလဝ်ဂှ် သွက်ဂွံဂါံကွာ်အာမာန် သ္ပလဝ်ဒ္တန် ပ္ဍဲကဵုကောံဓရီုသဳကၠဳရ။ နကဵု MSFC လေဝ် တာလျိုၚ်ကံၚ်ဇြဳဖေတ်ဒရေဝ်ဍုၚ်မန် ကၠုၚ်စိုပ်ဂတဏံလေဝ် ပံၚ်ကောံကဵု ဂကောံကောန်ဍုၚ်အရၚ်သ္အာၚ်၊ ဂကောံပၠန်ဂတးက္ညၚ်သ္အာၚ်မွဲစွံ ပါလုပ် သီုကောန်ညးဍုၚ်ကွာန်မန် မွဲကရောံကဵု ညးဍုၚ်ကွာန် မၞုံပ္ဍဲတွဵုရးဍုၚ်မန်မွဲစွံတုဲ ကော်ဘိက်အာ ညံၚ်ဂွံလုပ်ပေါဲဗတိုက်မွဲစွံတုဲ ရေၚ်တၠုၚ်အာ တာလျိုၚ်ကံၚ်ဇြဳဖေတ်ဒရေဝ်ဍုၚ်မန် သီုစိုတ်သီုစရိုတ်ဏောၚ်ဂှ် မိက်ဂွံဟီုသွဟ်ကဵုဏာရ။