မတ်မလီု – ဂျာန္နဝါရဳ(၃၁)
ပ္ဍဲတ္ၚဲဒပ်ပၞာန် သ္ပမာန်ကေတ်ဇၞး အလဵုအသဳညးဍုၚ်ကွာန်တအ် ရုဲစှ်ပတိုန်လဝ် နကဵုလွဟ် ပၠံၚ်ၜးကေတ်လဝ်အဝဵု ပေၚ်(၂)သၞာံဂှ် ကၠောန်ဗဒှ် ဗကပ်အာဗဗေၚ်ရမျှာၚ်သ္ၚိတ် (silent strike) အလုံမွဲကၟိန်ဍုၚ်ဏောၚ်ဂှ် ဒပ်ပၠန်ဂတးပံၚ်ကောံ လလောၚ်တြးလဝ် ပရိုၚ်ရ။
ပ္ဍဲဂိတုဖေဖဝ်ဝါရဳ သၞာံ ၂၀၂၃ ဒှ်တ္ၚဲ ပၠန်ဂတးက္ညၚ်ပေၚ် (၂)သၞာံဂှ် ဓမံက်အာရုပ်ရဴ (silent strike) ပရေၚ်ရမျှာၚ်ညးဍုၚ်ကွာန်တအ်သ္ၚိတ်ဇြ၊ ပရေၚ်ဂၠံၚ်ဍာန်လ္ၚုကှ်၊ မွဲကရောံကဵု စိုတ်ဓာတ်အံၚ်ဇၞးတအ်ဏောၚ်ဂှ် ဟီုသ္ဂးလဝ်ရ။
“ဂိတုဖေဖဝ်ဝါရဳ စၟတ်တ္ၚဲ (၁) သၞာံ၂၀၂၃ဂှ် ဒှ်အခိၚ်ဒပ်ပၞာန်သီအဝဵုပေၚ် (၂)သၞာံ၊ ပရေၚ်ပၠန်ဂတးက္ညၚ်လေဝ် ပေၚ် (၂)သၞာံရ။ ပ္ဍဲတ္ၚဲဂှ်တှ်ေ သွက်ဂွံထပ်ပ္တိုန်စၟတ်သမ္တီ ဒဒှ်ရညးဍုၚ်ကွာန်ပိုဲတအ် ဆက်လုပ်ဒၟံၚ်ပေါဲဗတိုက် အကြာပရေၚ်ကံၚ်ဇြဳပၞာန် ဍဵုဍိုက်ကြာန်ဓဇန် နဲကဲစုၚ်လေၚ်ဂှ် နွံဒၟံၚ်ပၟိက်ရ” ဂှ် ဒပ်ပံၚ်ကောံပၠန်ဂတးက္ညၚ် ဓမံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲကဵုတ္ၚဲဂှ် ပ္ဍဲကဵုဂၠံၚ်ဇၞော်ကီု၊ ပ္ဍဲဒၞာဲညးဍုၚ်ကွာန်တအ်သုၚ်စောဲကီု နကဵုပရေၚ်သုန်ဂြာံသ္ၚိတ်ဇြ သ္ပကဵုကံၚ်ဇြဳပၞာန် ဖေက်လကိုတ်အာတုဲ အလုံညးဍုၚ်ကွာန်တအ်ဂှ် ဆီဟွံဂံက်ဏီတုဲ ဆက်ပၠန်ဂတး တဝ်စၞေဟ်ဒၟံၚ်ကဵု တၠအဝဵုပၞာန်ဏီဖိုဟ်ရ ဒးထ္ၜးပျးဏောၚ်ဂှ် ဟီုသ္ဂးလဝ်ဏီရ။
နကဵုညးဍုၚ်ကွာန်ဂမၠိုၚ် ပါလုပ်ပ္ဍဲ (silent strike)တုဲ ပေါဲရုဲမာဲပတောံ ဟွံလုပ်ကဵုသၞောဝ် ကံၚ်ဇြဳပၞာန်ပလေဝ်ပလေတ်ကၠုၚ်ဇိုၚ်ဂှ်လေဝ် ဒဒှ်ရဟွံဒုၚ်တဲပုဟ်ဂှ် ဒးဓမံက်ပတိုန်ထ္ၜး ညံၚ်ညးဂၠးကဝ်တအ် ဂွံတီဏောၚ်ဂှ် ဒပ်ပံၚ်ကောံပၠန်ဂတးက္ညၚ် ဓမံက်ထ္ၜးလဝ်ရ။
silent strike ကၠောန်ဗဒှ် ပ္ဍဲဂိတုဖေဖဝ်ဝါရ ကၠုၚ်စိုပ် စၟတ်တ္ၚဲ (၁) ဏံဂှ် ဟိုတ်နူကၠိုဟ်ကဵု ပရေၚ်ချဳဒရာၚ်စသုၚ်မံၚ်စံၚ် ညးဍုၚ်ကွာန်တအ်တုဲ ကၠောန်ဗဒှ်အာ နူအခိၚ် နူဂယး (၁၀) နာဍဳ စဵုကဵု (၃) နာဍဳသဝ်တ္ၚဲဂှ်ရ ဂဥုဲဇဗဇွောံမ စၞစနွံပၟိက်တအ်ဂှ် ပရဟ်ဒုၚ်တုဲ ညံၚ်ဂွံရာန်ပကောံပကေဝ်လဝ်ဂှ် ဗတိုက်ဖ္အောဝ်လဝ်ရ။
ပရိုၚ်-သြၚ်လောန်တိုၚ်(မ်)