ဒဳမအ်သိုဝ် – ဖေဖဝ်ဝါရဳ(၁)
တွဵုရးကရေၚ်ဍာဲ၊ ပ္ဍဲလပါ်ဗၟံက် ပွိုၚ်ဍုၚ်ဒဳမအ်ဇြော ညးဒေသ မၞိဟ်တြုံမွဲတၠဂှ် ဟိုတ်ဇီုကပိုက်ဒးလွဟ်ဇၞော် နူကံၚ်ဇြဳပၞာန် ပန်ဖျေံဏာ ပ္ဍဲဂိတုဂျာန္နဝါရဳ စၟတ်တ္ၚဲ (၂၉) အခိၚ်နူဂယးတုဲ ဒးချိုတ်အာရဂှ် ဂွံတီကေတ်ရ။
ပရေၚ်ဒဒှ်ဂှ် ကြဴနူမၞိဟ်တြုံမွဲတၠ နူဗ္ဒပ်ပါဲပၞာန် ကလေၚ်စဴအာသ္ၚိညးတုဲဂှ် လွဟ်ဇၞော်ဒတုံပြဟ်ခတိုဟ်လဝ် လတူသ္ၚိညးတုဲ ဒးချိုတ်လဝ်ရ။
ညးဒးချိုတ်အာဂှ် ဒှ်ညးမၞုံအာယုက် (၃၅)သၞာံတုဲ ဟွံဂွံတီကေတ်လဝ် တၚ်ဂၞၚ်ညး သောဲသောဲဗြောဲဗြောဲရဂှ် ညးရီုဗၚ် ပရေၚ်ညးပါဲဒဴဘဲပၞာန်တအ် ဟီုသ္ဂးလဝ်ရ။
အကြာဏံ မွဲၜါတ္ၚဲဏံလေဝ် ကွာန်မၞုံဒၟံၚ် ပ္ဍဲပွိုၚ်ဍုၚ်ဒဳမအ်ဇြောတအ်ဂှ် ကောန်ဒပ်ကံၚ်ဇြဳပၞာန်တအ် ထ္ပက်လုပ်ကၠုၚ်ကရောၚ်ပၞာန် နဇြဟတ်ဂၠိုၚ်ဂၠေၚ်တုဲ ပန်ဖျေံဒၟံၚ်လွဟ်ဇၞော်အဆက်က်ရဂှ် ဂွံတီကေတ်ရ။
ပ္ဍဲကွာန်ညးဍုၚ်ကွာန်တအ် မံၚ်တန်တဴဒၟံၚ်ဂှ် နူဗ္ဒပ်ကံၚ်ဇြဳပၞာန် ဖျေံသ္ဇိုၚ်လောပိတ ပန်ဖျေံနၚ်ဒၟံၚ်လွဟ်ဇၞော် ဇၟာပ်ဒဒှ်တ္ၚဲရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၂၂)တေံလေဝ် ပ္ဍဲဗ္ဒပ်ပါဲပၞာန် မၞုံပ္ဍဲပွိုၚ်ဍုၚ်ဒဳမအ်ဇြော မွဲဗ္ဒပ်ဂှ် ဟိုတ်နူမကမ်လွဟ်ဇၞော် ဒတုံပြဟ် ပါ်ခတိုဟ်လဝ်တုဲ မၞိဟ်ပန်တၠ ပါလုပ်သီုကောန်ၚာ်သၟတ်ၜါတၠတအ် ဂွံလဝ်ဘဲဝပ်ဏီရ။
ပ္ဍဲဂိတုဂျာန္နဝါရဳဂှ် ဟိုတ်နူလွဟ်ဇၞော်ကံၚ်ဇြဳပၞာန်တုဲ ညးဍုၚ်ကွာန်စဵုကဵု (၅)တၠ ဒးချိုတ်အာလဝ်တုဲ ဟွံအောန်နူ (၁၀)တၠ ဇီုကပိုက် ဒးလဝ်ဘဲဝပ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံပ္ဍဲဒေသတအ်ဂှ်ရ။
ပရိုၚ်-သြၚ်လောန်တိုၚ်(မ်)