“ပ္ဍဲမူသ္ဇိုင် စၞောန်ပ္ညုၚ်ဂၠံၚ်တရဴဖေတ်ဒရေဝ် လ္ပာ်ပိုဲ ပကောံပကေဝ်လဝ်တအ်ဂှ်လေဝ် ပါလုပ်ဒၟံၚ်ရ။ ပရေၚ်စဵုဒၞာကဵုကောန်အရာပ်ကီု သီုကိစ္စပရေၚ်သွက်ဂွံကဵုအရီုဗၚ် ဆေၚ်ရာကဵုထံက်ပၚ်ပရေၚ်မၞိဟ်တအ်လေဝ် တအ်ဏံဂှ် ဒှ်က္ဍိုပ်လ္ပာ်ပိုဲ ပ္တိုန်ထ္ၜးလဝ်ရ”

ဂကောံသဳကၠဳပ္ညဳပ္ညပ်ဗွဲပလး ဂကောံရပ်လွဟ်ကောန်ဍုၚ်အရၚ်ဒေါံပန်ပှ်ော ၇ ဂကောံ ထ္ပက်လဝ်စၟတ်တဲ ပ္ဍဲလိက်ကသုက် NCA ကေုာံ ကဝ်မတဳပ္ညဳပ္ညပ်ဓမံက်ရုပ်ရဴ ပရေၚ်ညဳသၟဟ်ကောန်ဂကူ ကေုာံပရေၚ်ၜိုဟ်လလံ ကံၚ်ဇြဳပၞာန် (NSPNC) တအ်ဂှ် နူဂိတုမာတ်ချ် စၟတ်တ္ၚဲ (၂၈) စဵုကဵုစၟတ်တ္ၚဲ (၂၉)ဂှ် ဆဵုဂဗသဳကၠဳလဝ် ပ္ဍဲနေပျဳဒဝ်ရ။ ဟိုတ်ဂှ်ရ ပ္ဍဲပေါဲသဳကၠဳဏံဂှ် မုဒှ်သဳကၠဳကၠုၚ်လဝ်ရော၊ ပရေၚ်လစွံစိုတ်ၜါလ္ပာ် သာ်လဵု ဂွံကၠုၚ်လဝ်တၚ်တုပ်စိုတ်ရော။ စပ်ကဵုလၟေၚ်ကမၠောန်ပရေၚ်ၜိုဟ်လလံ ဆက်ရေၚ်တၠုၚ်အာဂတဏံတုဲ ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီုဂး သ္ကိုပ်ဗိုလ်ဇၞော်သဝ်ကျဝ်ညောံရ။

-ကိုပ်ကၠာအိုတ်ဏံ ပ္ဍဲပရေၚ်ဆဵုဂဗကဵု ဂကောံညးစၞးပရေၚ်ၜိုဟ်လလံကံၚ်ဇြဳပၞာန်ဂှ် နကဵုဂကောံဒေါံပန်ပှော် (၇) ဂကောံ မုပ္တိုန်ထ္ၜးလဝ် မာန်ကၠုၚ်ရော။

ပ္ဍဲပေါဲသဳကၠဳ အလန်ပထမဂှ်တှ်ေ အပြေၚ်ရေၚ်ပ္ညဳပ္ညပ်ပြေပြေပြံၚ်ၚ်မွဲ ပိုဲစက္လေၚ်ဓမံက်ရုပ်ရဴ မာန်ကၠုၚ်ရ။ ပရောပရာ လ္ပာ်ဍေံတအ်ပ္တိုန်ထ္ၜးလဝ်မွဲဂကူဓဝ်သၟး ဟွံသေၚ် ပရောပရာလ္ပာ်ဇကုပ္တိုန်ထ္ၜးလေဝ် ပါလုပ်ဒၟံၚ်ကီု ပရောပရာ မွဲလ္ပာ်တေံမိက်ဂွံဟီုဂှ်လေဝ် တုပ်တုပ်ရလေဝ် ပ္ညဳပ္ညပ် သဳကၠဳကၠုၚ် မာန်လဝ်ရ။ ပရောပရာ လ္ပာ်ပိုဲပ္တိုန်ထ္ၜးလဝ်ဂှ် ဗွဲယျေဘုယျတှ်ေ နွံ (၅) တၚ်ရ။ ညံၚ်ပေါဲသဳကၠဳပရေၚ်ဍုၚ်ကွာန် ပါလုပ်သီုညးဖအိုတ် ဂွံဒှ်ကၠုၚ်မာန်၊ လၟေၚ်ကမၠောန်ပရေၚ်ၜိုဟ်လလံ EAO (၇) ဂကောံ ပလေဝ်ပလေတ်လဝ်လေဝ် ပါလုပ်ဒၟံၚ်ရ။ ပ္ဍဲမူသ္ဇိုင် စၞောန်ပ္ညုၚ်ဂၠံၚ်တရဴဖေတ်ဒရေဝ် လ္ပာ်ပိုဲပကောံပကေဝ်လဝ်တအ်ဂှ်လေဝ် ပါလုပ်ဒၟံၚ်ရ။ ပရေၚ်စဵုဒၞာကဵုကောန်အရာပ်ကီုသီုကိစ္စပရေၚ်သွက်ဂွံကဵုအရီုဗၚ်ဆေၚ်ရာကဵုထံက်ပရံၚ်ပရေၚ်မၞိဟ်တအ်လေဝ် တအ်ဏံဂှ် ဒှ်က္ဍိုပ်လ္ပာ်ပိုဲ ပ္တိုန်ထ္ၜးလဝ်ရ။ တၚ်ဂၞၚ်အာဆဵုဂဗလဝ် မွဲမွဲဂကောံတုဲ သဳကၠဳလဝ် ပ္ဍဲကောံဓရီုတုဲကၠုၚ်ဏံသီုဖအိုတ်ဂှ် ပံၚ်ပကောံကေတ်တုဲ သွက်ဂွံက္လိဂွံတၚ်တုပ်စိုတ်ဒ္တန်ဂှ် တၚ်ဂၞၚ်ထေက်ကဵုဒးသဳကၠဳလေဝ် ဒှ်သဳကၠဳလဝ်ရ။ ဒှ်တၚ်နူလ္ပာ်ပိုဲ ပ္တိုန်ထ္ၜးသဳကၠဳလဝ်ရ။

-သွက်ပေါဲသဳကၠဳပရေၚ်ဍုၚ်ကွာန် ညးဆေၚ်စပ်သီုဖအိုတ် ဂွံပါလုပ်ဂှ်လေဝ် ဒှ်သဳကၠဳလဝ်ဟီုဂှ် ဂွံကၠုၚ်လဝ်တၚ်တုပ်စိုတ် ဗီုလဵုနွံရော။

ပရေၚ်ဆဵုဂဗသဳကၠဳအလန်ပထမဂှ်တှ်ေ အတိုၚ်သဘဴတၚ်လစွံစိုတ်ဂှ်တှ်ေ ကဆံၚ်ဂွံသဳကၠဳကွေံကွေံကြာန်ကြာန်သီုၜါလ္ပာ်ဂှ် ကၠောန်ဟွံမာန်ဏီရ။ အတိုၚ်အခိၚ်ကာလ ပိုဲဂွံလဝ်ပွိုၚ်ၜါတ္ၚဲဂှ်တှ်ေ အတိုၚ်ဗီုပြၚ် ပိုဲရန်လဝ်နူတံတေံ သွက်ဂွံက္လေၚ်ပ္တပ်ကဵု JOINT PROCESS  ဗွဲယေဘုယျတှ်ေ တၚ်ပ္တိုန်ထ္ၜးလ္ပာ်ဇကု လ္ပာ်ဍေံ ပိုဲကၠောန်သ္ပလဝ် ဂတးဂတန်ရ။ ပ္ဍဲလ္တူတၚ်ပ္တိုန်ထ္ၜးလေဝ် တၚ်ဟွံကၠးစိုတ်ဂှ် ကလေၚ်သၟာန်လဝ်၊ ဟီုသှ်လဝ်ရ။ ပ္ဍဲလတူတၚ်ပ္တိုန်ထ္ၜးတအ် ဗွဲပလးဏံ သောၚ်သောၚ်ကၠးကၠး ၜိုဟ်ဟ်သြိုဟ်ဟ် သၠာဲဂတးလဝ် လညာတ်ဇကု လညာတ်ဍေံဂှ် နွံရ။ ပ္ဍဲပြေၚ်ရေၚ်ပိုဲကဵုဖျုန် ကဵုပရေၚ်ပ္တိုန်ထ္ၜးအလန်ဏံမွဲအလန်ဂှ်တှ်ေ ဒဵုကဵုကဆံၚ်ဂှ် နကဵုပိုဲ ပ္ညဳပ္ညပ်သဳကၠဳကၠုၚ်လဝ် သၠဲသၠဲလးလးဟွံမာန်ဏီရ။

-ကံၚ်ဇြဳပၞာန်လေဝ် ပ္တိုန်ထ္ၜးကၠုၚ်လဝ် သွက်ဂွံကၠောန်ဗဒှ်ကောံဓရီုပရေၚ်ၜိုဟ်လလံ နွံဒၟံၚ်ဏောၚ်ဟီုတှ်ေ ကၠောန်ဗဒှ်အာ ကောံဓရီုပရေၚ်ၜိုဟ်လလံ ဗီုပြၚ်လဵုရော။

လ္တူနူသဳကၠဳဂှ် ကိစ္စသွက်ဂွံကၠောန်ဗဒှ်ကောံဓရီုပရေၚ်ၜိုဟ်လလံဟီုဂှ် ဒှ်တၚ် NSPNC ပ္တိုန်ထ္ၜးလဝ်ရ။ ကဆံၚ်ဂွံသဳကၠဳလဝ်အိုတ်အစောန်ဂှ် ဟၟဲပုဟ်။ ပ္ဍဲလ္တူကောံဓရီုပရေၚ်ၜိုဟ်လလံ လ္ပာ်ဍေံတအ်မိက်ဂွံကၠောန်ဂှ် တၚ်ရန်တၟံ ဗီုလဵုနွံဒၟံၚ်။ ဗီုပြၚ်လဵုမိက်ဂွံကၠောန်ရောဂှ် လ္ပာ်ပိုဲမွဲလ္ပာ် ပ္တိုန်ထ္ၜးလဝ်ရ။ တၚ်ပိုဲဟွံကၠးစိုတ်နွံလေဝ် ကလေၚ်သၟာန်။ ကောံဓရီုပရေၚ်ၜိုဟ်လလံဟီုဂှ် အတိုၚ်ယန္တရာNCA ကၠောန်ကၠုၚ်လဝ်အခိၚ်ကၠာတေံဂှ် အတိုၚ်ပရေၚ်ၜိုဟ်လလံကၟိန်ဍုၚ် ပေန်လုမ် ၂၁ ဗွဝ်ကၠံဂှ်တှ်ေ အတိုၚ်အပြေၚ်ရေၚ်ကီု၊ ဂဂွံကြက်ရှ်သာဍေံကီု ပရေၚ်တၞဟ်ခြာ နွံကၠုၚ်ဏောၚ်ဂှ် မ္တီကေတ်ဗွဲအပြောံသမာန်ရ။

-အလန်လကြဴအိုတ်ဏံ ဂကောံဒေါံပန်ပှ်ောကဵု ကံၚ်ဇြဳပၞာန်တအ် သွက်ဂွံဆက်ဆဵုဂဗအာ ဂတဏံ နွံဟာ၊ ပ္ဍဲအပြေၚ်ရေၚ်ဗီုပြၚ်လဵု သွက်ဂွံဆက်ဆဵုဂဗအာ ညးသ္ကအ်နွံရော။

ဆဵုဂဗဟီုဂှ် သွက်ဂွံသောၚ်ကလးပြသၞာပရေၚ်ဍုၚ်ကွာန် နနဲကဲဆဵုဂဗသဳကၠဳ နဲပရေၚ်ဍုၚ်ကွာန်မာန်ဂှ် ညံၚ်ဂွံဒှ်အပြေၚ်ရေၚ်ပေါဲသဳကၠဳ ပိုဲညးဆေၚ်စပ်သီုဖအိုတ်ပါလုပ် ဂွံဒှ်မာန်ဂှ် လၟုဟ်မှ ဂွံစကၠောန် လၟုဟ်မှဂွံစတမ် ကလေၚ်ကၠောန် ပရေၚ်ပတှ်ေစှ်ေစိုတ်ဂတးဂတန် ကေုာံ JOINT PROCESS ရ။ ပရေၚ်ဆဵုဂဗမွဲအလန်ပၠန်ဂှ် နွံချိုတ်ပၠိုတ်ရ။ ဆ္ဂးဂှ်လေဝ် ပရေၚ်ဆဵုဂဗသဳကၠဳမွဲအလန်ပၠန်လေဝ် ပ္ဍဲအကာဲအရာလ္ပာ်ပိုဲမိက်ဂွံဒှ်သၟးလေဝ် ဟွံပြေပြံၚ်ပုဟ်လေဝ်။

သွက်ပိုဲသီုညးၜါလ္ပာ် အခိၚ်ပြေပြံၚ်၊ အစဳဇန်ဒၞာဲဝါဲကီု ပရေၚ်ပရဟ်ဒုၚ်ပ္ညဳပ္ညပ်ကီု ကၠောန်တုဲမှ ပ္ဍဲလတူတၚ်တုပ်စိုတ် ပိုဲပ္ညဳပ္ညပ်လဝ်ဂှ်ရ အကာဲအရာသွက်ဂွံဒးရေၚ်တၠုၚ်အာဂှ်ရ သွက်ဂွံဟီု တ္ၚဲလဵု အခိၚ်လဵုဂှ်တှ်ေ ဍေံပြဟ်မံၚ်ဏီရ။