လွိုၚ်ကဝ်၊ ဨဗြဴ(၁)
ပ္ဍဲကဵုတွဵုရးကရေၚ်ဍာဲ ကံၚ်ဇြဳပၞာန်တံ မထ္ပက်ဒၟံၚ်ပၞာန်ဗွဲမသ္ကာတ်မြဟ်ဂှ် ဟိုတ်နူပေါဲဗ္တိုက်ဂမၠိုၚ်တုဲ လၟိဟ်မၞိဟ်ထောံလသာဌာန်ဒၟံၚ်တုဲ မ္ဒးဂြိပ်ဒဴဒၟံၚ်တံ နွံကၠုၚ် စဵုကဵု (၈၀) တၟံကၠံပြၚ်ယျဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူလလောၚ်တြးပရေၚ်အုပ်ဓုပ်ပၞာန် ပ္ဍဲပွိုၚ်ဍုၚ်ဗဝ်လခေဝ်၊ ဒဳမအ်သဵု၊ ဖရူသဵု ကေုာံ ယှာတဝ် မၞုံတွဵုရးကရေၚ်ဍာဲ ဒၞါဲဂကောံဒပ်စဵုဒၞါညးဍုၚ်ကွာန်တံ မအုပ်လဒံလဝ်ဂှ်တုဲဂှ် ဒပ်ကံၚ်ဇြဳပၞာန် ထ္ပက်ဒၟံၚ်ပၞာန် သ္ကာတ်တ်မြဟ်ဟ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
သွက်ဂွံအုပ်ဓုပ် တွဵုရးကရေၚ်ဍာဲ မဒှ်ဌာန်ကြပ်ကဵုနေဗျဳဒဝ် လ္ဂောံကဵုပရေၚ်ပၞာန်လေဝ် ပၟိက်ဇၞော်တံဂှ် နကဵုတၚ်စၞောန် ဂွံမွဲၝောံတဲ သီမွဲၝောံတဲဂှ် နူကဵုလ္ပာ်ပွိုၚ်ဍုၚ်ဖေဝ်ခုၚ်၊ လွိုၚ်ကဝ် ကေုာံ ဗဝ်လခေဝ်တံဂှ် ဒပ်ကံၚ်ဇြဳပၞာန် ထ္ပက်ဒၟံၚ်ပၞာန် နကဵုကရောၚ်ပၞာန်ဇၞော်ဇၞော်တံရ။
ဟိုတ်နူကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်တံဂှ်ရ အပ္ဍဲဂိတုမာတ်ချ်ဏံ ပေါဲဗ္တိုက်တံ သာသ္ကာတ်မြဟ်ကၠုၚ်တုဲ ပ္ဍဲကဵုတွဵုရးကရေၚ်ဍာဲ လၟိဟ်မၞိဟ် ပွဳပွူ (၃) ကိုဋ်ဓဝ် မမံၚ်တန်တဴဒၟံၚ်ဂှ် ထောံလသာသ္ၚိဌာန်တုဲ မၞိဟ်ဒးဂြိပ်ဒဴဒၟံၚ်တံ မၞုံကၠုၚ်လဝ် စဵုကဵု (၂) ကိုဋ်ဘာ်ပြၚ်ရ။
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံဂှ်လေဝ် မ္ၚးနူကရောၚ်ပၞာန် ဒပ်ကံၚ်ဇြဳပၞာန်တံဂှ် ဟိုတ်နူဗ္တိုက်ဂြာတ်ဗုမ် နကဵုက္ၜၚ်ကျာတံကီုတုဲ ဒှ်ဒၟံၚ်အကာဲအရာ တိသ္ဇက်ဂွံဂြိပ် အောန်စှ်ေကၠုၚ်ရဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠ ဟီုရ။
“ပၞာန်ထ္ပက်တံ ထပ်ကၠုၚ်ပၠန်လေဝ်။ လွဟ်လက်နက်ဇၞော်တံလေဝ် ဗ္တုံတုဲ သီုပန်ကဵုက္ၜၚ်ကျာ။ နူဏေံတေံလေဝ် ပန်ကဵုက္ၜၚ်ကျာပၠန်။ ကၠာဏံဂှ်လေဝ် ၜိုတ်စှ်လ္တုန်နွံ ကၠုၚ်ပန်လဝ်။ ပန်သီုအပ္ဍဲကွာန်တံဏောၚ် အပ္ဍဲကွာန်ဂှ် ဟွံဂံၚ်မံၚ် ဒှ်ဒၟံၚ်ရ” သာ်ဝွံ ဟီုရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပ္ဍဲကဵုဒၞါဲညးဍုၚ်ကွာန်ပါဲဒဴဘဲပၞာန် အပ္ဍဲတွဵုရးကရေၚ်ဍာဲတံ တန်တဴဂၠိုၚ်အိုတ်ဂှ် လၟေၚ်ဒဒှ်တ္ၚဲ ဗ္တိုက်ဒၟံၚ်ကဵုက္ၜၚ်ကျာတံသၟးဟွံက သီုကဵုလွဟ်ဇၞော်တံလေဝ် ပန်ပှော်ဒၟံၚ်အဆက်က်ရ။
ပ္ဍဲဂိတုမာတ်ချ် (၃၀) တုဲကၠုၚ်တေံဂှ်လေဝ် ဟိုတ်နူကဵုကံၚ်ဇြဳပၞာန်တံ ကၠုၚ်စိုပ်ပန်ပှော်လဝ်ကဵု က္ၜၚ်ကျာဗ္တိုက် ပ္ဍဲဘာဗ္တောန်လိက်မွဲ မၞုံဒိုဟ်ဗၟံက်ဒဳမအ်သဵုတံဂှ်တုဲ ဘာဗ္တောန်လိက်ဂှ် ဇီုကပိုက်လီုလာ်လဝ်တုဲ ညးဒေသပါဲဒဴဘဲပၞာန်မွဲတၠ ချိုတ်အာလဝ်ရ။
အခိၚ်လၟုဟ်ဂှ် ညးဍုၚ်ကွာန်ပါဲဒဴဘဲပၞာန်တံဝွံ သွက်ဂွံထပ်ပါဲဒဴဘဲပၞာန်ပၠန်ဂှ် ပလေဝ်ပလေတ်လဝ် ယာတ်စိုက်ဂွဳတံလၟိုန်တုဲ ဒဵုကဵုဒးမံၚ်စံၚ်ဒၟံၚ်ရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုရ။
“ညးပါဲဒဴဘဲပၞာန်တံဂှ် သီုဖအိုတ်ဒးဟီုမ္ဂး ဒးပလေဝ်လဝ် ကပေါတ်စိုက်ဂွဳတံရ။ ပေါဲဗ္တိုက်ဒှ်ကၠုၚ်မ္ဂး ဒဂူသွက်ဂွံဆုဲ သွက်ဂွံပြံၚ်ရဏောၚ်။ ပ္ဍဲကဵုဗ္ဒိုပ်ပါဲဒဴဘဲပၞာန်ပိုယ်တံဏံဂှ်လေဝ် ဂြာတ်ဒၟံၚ်ကဵုက္ၜၚ်ကျာ၊ ပန်ပှော်အာလွဟ်ဇၞော်တံဂှ် ကၠောန်ဒၟံၚ်နာနာ လၟိုန်ရတုဲ ဒၞါဲလဵုမှ ပိုယ်တံ ဟွံဂီုကၠီုရပုဟ်လေဝ်” သာ်ဝွံ သ္ဂးရ။
မွဲလ္ပာ်ပၠန်ဂှ် ညးဍုၚ်ကွာန်ပါဲဒဴဘဲပၞာန်တံဝွံ ပ္ဍဲကဵုဗ္ဒိုပ်ပါဲဒဴဘဲပၞာန်တံဂှ် ဍာ်လွပ်ဍာ်သုၚ်တံ အောန်စှ်ေကၠုၚ်တုဲ သီုကဵုဒးဆေၚ်ဒၟံၚ်မုက် ကုဇွောံမစၞစပိုတ်အိုတ်တံဂှ်ရ ပ္ဍဲကဵုကောန်ၚာ်သၟတ်တံကဵု ညးအာဇၞော်ယုက်ဗျုထဴတံဂှ် ဒးဒုၚ်စသိုၚ်ဒၟံၚ် ပြသၞာပရေၚ်ထတ်ယုက်တံရ။
ကၠာဂွိုအ်စိုပ် ဒဵုကဵုဂိတုဖေဖဝ်ဝါရဳတုဲကၠုၚ်တေံဏီ ပ္ဍဲတွဵုရးကရေၚ်ဍာဲ ညးပါဲဒဴဘဲပၞာန် (၂) ကိုဋ်ပြၚ်ဟေၚ်နွံလဝ်ဂှ် အပ္ဍဲပွိုၚ်မွဲဂိတုဘာ်ဂှ် လၟိဟ်မၞိဟ်ပါဲဒဴဘဲပၞာန် ထပ်ဂၠိုၚ်တိုန်ကၠုၚ် စဵုကဵု (၅) ဠက်ပြၚ်တုဲ ညးမဒးချိုတ်အာ အဃောမပါဲဒဴဘဲပၞာန်တံဂှ်လေဝ် နွံဒၟံၚ် စဵုကဵု (၁၃၀) ပြၚ်ယျဂှ် ဂွံတီကေတ် နူကဵုဂကောံဖျေံသ္ဇိုၚ်ဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ