ကျာ်ထဝ်၊ ဨဗြဴ(၁)
ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ အရာပ်သ္ကုတ်သၟဝ်ကျာ၊ ပ္ဍဲဂၠံၚ်ဇၞော်မ္ၚးဍုၚ်ဂှ် ပ္ဍဲဂိတုမာတ်ချ် (၃၁) အခိၚ်နူဂယးတေံ မၞိဟ်တြုံ (၁) တၠ ဒးဒုၚ်ပၠံၚ်ၜးဂစိုတ်လဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲအခိၚ်ပယျာံနူဂယး ၜိုတ် (၁၀) နာဍဳဂှ် ဂွံဆဵုကေတ်လဝ် ကိုဝ်မေန်န် အာယုက် (၄၀) သၞာံ ဒၟံၚ်ဂၠံၚ် (၂) အရာပ်အံၚ်မၚ်္ဂလာ၊ ဍုၚ်ကျာ်ထဝ်ဂှ် ပ္ဍဲကဵုသ္ကဲဂၠံၚ်ဇၞော်မ္ၚးဍုၚ်ကျာ်ထဝ် နကဵုဘဲဝပ်မထ္ပက်လဝ်ဂမၠိုၚ် သီုကဵုမချိုတ်ဒၟံၚ်ရ။
ကိုဝ်မေန်န် ညးမဗက်တက္ကသဳကွဳလိုန်ဓာတ် သီုကဵုမသွံရာန်ကွဳလိုန်ဓာတ်ဂှ်ဝွံ အခိၚ်မတိတ်ကၠုၚ်ညးမွဲဓဝ် သွက်ဂွံရာန်ကွဳလိုန်ဓာတ်ဂှ် ဒးဒုၚ်ပၠံၚ်ၜးဂစိုတ်လဝ် ပ္ဍဲကဵုဂၠံၚ်မ္ၚးဍုၚ်ဂှ်ရ။
ကိုဝ်မေန်န်ဝွံ ဟိုတ်နူဒးဒုၚ်ပၠံၚ်ၜးဂစိုတ်လဝ်ဂှ်ရ ဂွံကလေၚ်ဆဵုကေတ်လဝ် သီုလမျီုမအိုတ်ဒၟံၚ် နကဵုဝပ်ၜုန်ဂမၠိုၚ် ပ္ဍဲကဵုဗုၚ်၊ ကအ် ကေုာံ မုက်တံဂှ်တုဲ ဂကောံရီုဗၚ်ဟံၚ်ပြာ်ပရေၚ်မၞိဟ်တံဂှ် ပလံၚ်ဗ္စိုပ်လဝ် ရုၚ်ဂဥုဲကျာ်ထဝ်ရ။
ဒၟါနူဒးဒုၚ်ပၠံၚ်ၜးဂစိုတ်ဂှ်ရ သြန် (၃၅) ကိုဋ်၊ မဂွါမွဲတၞုၚ် (၂) ဒ္ကေဝ်ပြၚ် ကေုာံ ဖုၚ်မွဲမ မပါအာ ပ္ဍဲဇရေၚ်ကိုဝ်မေန်န်ဂှ် ဒးဒုၚ်ပၠံၚ်ၜး ပါအာတုဲ ညးမပၠံၚ်ၜးဂမၠိုၚ် ဗၠးမံၚ်ရောၚ်ဂှ် ဂွံတီကေတ်ရ။
ပ္ဍဲကဵုဂၠံၚ်ဇၞော်မ္ၚးဍုၚ်၊ ဍုၚ်ကျာ်ထဝ်ဂှ် မွဲဏှမွဲဏှဟီုဂွံ အတောဲချိၚ်ကျာတံကဵု ရဲအာကၠုၚ်တံ ဒးဒုၚ်ပၠံၚ်ၜးဒၟံၚ်တုဲ ကွဳလိုန်ဓာတ်၊ ဖုၚ် ကေုာံ ထဝ်တံ ပါအာတုဲ မၞိဟ်မဒးချိုတ်အာတံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−သဝ်ဗမာၚ်